غیر منقولہ جائیداد کی فروخت سے حاصل آمدنی پر ٹیکس غیر قانونی قرار

ایک جائیداد اس غرض سے خریدی ہوکہ مستقبل میں بیچ کر منافع کمایا جائے گا تو اسے تجارتی سرگرمی نہیں کہا جاسکتا، چیف جسٹس

عابد علی آرائیں May 20, 2017

جائیدادخرید وفروخت کی مستقل سرگرمیاں تجارت ہیں اور آمدن پر ٹیکس لاگو ہوتا ہے،سپریم کورٹ نے اپیل منظورکرلی۔ فوٹو: فائل

سپریم کورٹ نے غیر منقولہ جائیداد کی فروخت سے حاصل ہونے والی آمدن پر انکم ٹیکس کے اطلاق کو غیر قانونی قرار دیتے ہوئے کہا ہے کہ انکم ٹیکس کا اطلاق تجارت کیلیے غیر منقولہ جائیداد کی خرید وفروخت پر ہوتا ہے۔

چیف جسٹس میاں ثاقب نثارکی سربراہی میں فل بینچ نے 13 اپریل 2017 کو محفوظ کیا گیا فیصلہ جاری کردیا تاہم 20 صفحات پر مشتمل فیصلہ میں عدالت عظمیٰ نے فینسی فاؤنڈیشن کراچی کی اپیل منظور کرتے ہوئے قرار دیاکہ کسی فرد یا کمپنی کی طرف سے جائیدادکی خرید وفروخت کی مستقل سرگرمیاں تجارت کے زمرے میں آتا ہے اور ان سرگرمیوں سے حاصل ہونے والی آمدن پر انکم ٹیکس کا اطلاق ہوتا ہے لیکن اگر ایک واحد غیر منقولہ جائیداد کسی فرد یا ادارے نے اس غرض سے خریدی ہوکہ مستقبل میں اسے بیچ کر منافع کمایا جائے گا تو اسے تجارتی سرگرمی نہیں کہا جاسکتا اور اس پر انکم ٹیکس کا اطلاق نہیں ہوگا۔

یہ بات قابل ذکر ہے کہ فینسی فاؤنڈیشن نے 1963 میں کراچی میں 18 لاکھ 95 ہزار روپے میں ایک پلاٹ خریدا اور 1995 میں اسے 18 کروڑ 28 لاکھ میں بیچا۔ محکمہ انکم ٹیکس نے حاصل ہونے والی آمدن پر ٹیکس لاگو کیا کہ قانون کے مطابق اصل سرمائے پر حاصل ہونے والی آمدن پر ٹیکس لاگو ہوتا ہے۔ اس فیصلے کیخلاف اپیلٹ ٹربیونل نے اپیل خارج کی تھی جبکہ ہائیکورٹ نے رٹ بھی مسترد کردی تھی۔