رات کے وقت دوہا گیا دودھ زیادہ خواب آورہوتا ہے

رات کے وقت دوہا گیا دودھ دماغ پر خواب آور دوا جیسے اثرات مرتب کرتا ہے،تحقیق

ع۔ر December 22, 2015

رات کے وقت دوہا گیا دودھ دماغ پر خواب آور دوا جیسے اثرات مرتب کرتا ہے،تحقیق:فوٹو: فائل

بے خوابی کا شکار افراد کو رات کے وقت دودھ پینا تجویز کیا جاتا ہے۔ دودھ پی کر سونے سے عام طور پر اچھی نیند آتی ہے۔ اسی بات نے سائنس دانوں کو دودھ کے خواب آور اثرات کی جانچ کرنے پر اکسایا۔

تحقیق کے نتائج سے ماہرین پر یہ حیران کُن انکشاف ہوا کہ رات کے وقت دوہا گیا دودھ دن میں حاصل کیے گئے دودھ کے مقابلے میں زیادہ خواب آور ہوتا ہے ! چناں چہ اگر آپ کو نیند نہیں آرہی تو بستر سے اٹھیں گائے بھینس یا بکری کا دودھ دوہیں اور اُبال کر نیم گرم پی کر لیٹ جائیں۔ کچھ ہی دیر میں آپ نیند کی میٹھی وادیوں کی سیر کررہے ہوں گے! کم از کم سائنس دانوں کی حالیہ تحقیق یہی کہتی ہے۔

جنوبی کوریا میں قائم یومی ینگ انسٹیٹیوٹ فار نیوروسائنس کے محققین نے کئی ماہ کی تحقیق کے بعد یہ نتیجہ اخذ کیا۔ سائنس دانوں کا کہنا ہے کہ رات کے وقت دوہے گئے دودھ میں ٹرپٹو فین اور میلاٹونن نامی مرکبات کی مقدار بڑھی ہوئی ہوتی ہے۔ مویشیوں سے دن میں حاصل کیے گئے دودھ میں یہ مرکبات کم مقدار میں ہوتے ہیں۔ میلاٹونن دودھ میں قدرتی طور پر پایا جانے والا ہارمون ہے جو سونے اور جاگنے کے فعل کو باقاعدہ رکھنے میں معاون ثابت ہوتا ہے۔ ٹرپٹوفین کو سیروٹونن اور میلاٹونن میں بدلا جاسکتا ہے۔

تحقیق کے دوران سائنس دانوں نے چند عمررسیدہ مریضوں پر گائے بھینسوں کے رات اور دن میں دوہے گئے دودھ کے الگ الگ تجربات کیے۔ چند روز تک انھیں شب بسری کے وقت دن میں دوہا گیا دودھ پلا کر اس کے اثرات کا جائزہ لیا گیا۔ اس دوران دیکھا گیا کہ دودھ سے ان کے خون میں کن اجزا کی مقدار میں کمی بیشی واقع ہوتی ہے اور اس تغیر کے دماغ پر کیا اثرات مرتب ہوتے ہیں۔ یہی تجربہ بعدازاں رات کے وقت دوہے گئے دودھ کے ساتھ دہرایا گیا۔ ماہرین نے دیکھا کہ رات کے وقت دوہا گیا دودھ پینے کے بعد معمرافراد زیادہ بہتر نیند سوئے۔

قبل ازیں یہی تجربہ ماہرین چوہوں پر دہراچکے تھے۔ چوہوں کی الگ الگ تعداد کو دودھ، پانی اور ایک خواب آور دوا دی گئی۔ پھر انھیں بیس منٹ تک ایک گھومتے ہوئے سلنڈر پر چھوڑ دیا گیا۔ سائنس دانوں نے دیکھا کہ جن چوہوں کو رات کے وقت دوہا گیا دودھ اور خواب آور دوا دی گئی تھی وہ سلنڈر پر اپنا توازن برقرار نہیں رکھ پارہے تھے۔ ان کے مقابلے میں مویشیوں سے دن کے وقت حاصل کیا گیا دودھ اور پانی پینے والے چوہے زیادہ چاق چوبند اور چُست تھے۔

تحقیق کے نتائج بیان کرتے ہوئے سائنس دانوں کا کہنا تھا رات کے وقت دوہا گیا دودھ دماغ پر خواب آور دوا جیسے اثرات مرتب کرتا ہے۔ چناں چہ بے خوابی میں مبتلا افراد کے لیے یہ خواب آور ادویہ کا بہترین نعم البدل ثابت ہوسکتا ہے۔