یورپی یونین کے تحفظات پر موقف پیش کر دیاوزارت تجارت

عالمی تجارتی حجم میں کمی کے باوجود جی ایس پی پلس کی بدولت پاکستان کی برآمدات کو استحکام ملا ہے

اظہر جتوئی December 02, 2015

عالمی تجارتی حجم میں کمی کے باوجود جی ایس پی پلس کی بدولت پاکستان کی برآمدات کو استحکام ملا ہے۔ فوٹو: فائل

وزارت تجارت نے کہا ہے کہ پاکستان نے جی ایس پی پلس پر یورپی یونین کے تحفظات پر اپنا موقف پیش کر دیا، جنوری میں جی ایس پی پلس کا ریویو ہوگا، 10سال تک پاکستان کا جی ایس پی اسٹیٹس کوئی نہیں چھین سکتا۔

وزارت تجارت کے ذرائع کے مطابق پاکستان نے یورپی یونین کو جی ایس پی پلس کے پاکستانی معیشت سے متعلق فوائد سے آگاہ کیا گیااوربتایا گیاکہ پاکستان نے دہشت گردی کے خلاف جنگ میں نمایاں کامیابیاں حاصل کی ہیں جس کی بدولت ملک میں امن قائم ہو ا ہے اور معاشی استحکام آیا ہے۔

انھوں نے بتایا کہ پاکستان نے اقوام متحدہ کے کنونشن پر عملدرآمد کے لیے ٹریٹی امپلی منٹیشن سیل قائم کیا ہے، عالمی تجارتی حجم میں کمی کے باوجود جی ایس پی پلس کی بدولت پاکستان کی برآمدات کو استحکام ملا ہے، یورپی یونین کو اقوام متحدہ کے 27کنونشن پر عملدرآمد سے متعلق کیے گئے اقدامات پر بھی اپنا موقف پیش کر دیا ہے۔ پاکستان کے جی ایس پی پلس کا ریویو آئندہ سال جنوری میں ہو گا۔ اس حوالے سے وفاقی وزیر تجارت خرم دستگیر نے رابطہ کرنے پر ''ایکسپریس'' سے بات چیت میں تصدیق کی کہ جی ایس پی پلس پر یورپی یونین کے تحفظات پر اپنا موقف پیش کر دیا، آئندہ ماہ جی ایس پی پلس کا ریویو ہوگا۔

انہوں نے واضح کیا کہ 10 سال تک پاکستان کا جی ایس پی اسٹیٹس کوئی نہیں چھین سکتا، ہر 2 سال بعد جی ایس پی پلس پر ریویو ہوگا جس میں تجارت کی ترقی کا جائزہ لیا جائے گا، پاکستان کی عالمی ذمے داریوں پر پیشرفت کی تفصیلات سے آگاہ کر دیا گیا ہے۔ انھوں نے بتایا کہ پاکستان نے اقوام متحدہ کے کنونشن پر عملدرآمد کے لیے ٹریٹی امپلی منٹیشن سیل قائم کیا ہے۔