سپریم کورٹ ایل پی جی کوٹے میں بد عنوانی کی انکوائری رپورٹ مستردخواجہ آصف بطور گواہ تحقیقاتی کمیٹی میں ط

لارجربینچ کاٹھوس پیشرفت پرمبنی رپورٹ جمعرات کوجمع کرانے کاحکم،وکیل تبدیلی کیلیے مطمئن کریں، عدالت کی اعتزازکوہدایت

Ghulam Nabi Yousufzai/Numainda Express February 11, 2014

سوئی سدرن کمپنی کے بورڈنے سوالنامے کاجواب نہیںدیا،متعلقہ ریکارڈڈھونڈنے میںدشواری کاسامناہے،عبوری رپورٹ فوٹو: فائل

سپریم کورٹ نے جامشورو جوائنٹ وینچر اور سوئی سدرن گیس لمیٹڈکے درمیان ایل پی جی معاہدے میں بے قاعدگیوں اور عدم شفافیت کے بارے میں ایف آئی اے کی عبوری انکوائری رپورٹ مستردکردی ہے۔

عدالت نے ایف آئی اے کوجمعرات13فروری کو اگلی سماعت پر ٹھوس پیشرفت پر مبنی رپورٹ جمع کرانے کی ہدایت کی ۔عدالت نے آبزرویشن دی کہ اگر ایف آئی اے انکوائری کی صلاحیت نہیں رکھتی توانکوائری کسی اور تفتیشی ایجنسی کو سونپی جا سکتی ہے۔جسٹس ناصرالملک کی سربراہی میں5 رکنی لارجر بینچ نے سماعت کی۔ایف آئی اے اکنامک کرائمز ونگ کے ڈائریکٹر زاہد احمد نے رپورٹ پیش کی اور بتایا کہ متعلقہ اداروں سے ریکارڈ نہیں مل سکا ،کچھ لوگوں کے بیانات ریکارڈکیے گئے ہیں۔جسٹس ناصرالملک نے استفسارکیا کہ جس کمیٹی نے معاہدے کی منظوری دی تھی۔

اس میں شامل پارلیمنٹیرین سے انکوائری ہوئی ہے ؟تفتیشی افسر نے بتایا کہ انھیں لکھا گیا ہے لیکن تاحال جواب نہیں ملا،کچھ لوگوں کے پتے بھی نہیں ملے۔ جسٹس جواد ایس خواجہ نے کہا کہ تفتیش صرف بیان ریکارڈکرانے کا نام نہیں،تفتیشی ایجنسی کو دلچسپی ہوگی تو انکوائری کی جائے گی، ان معاملات پر آنکھیں بند نہیںکر سکتے۔عدالت نے سماعت ملتوی کرتے ہوئے5 رکنی بینچ کی دوبارہ تشکیل کیلیے معاملہ چیف جسٹس کو بھیج دیا ہے۔

ایف آئی اے نے ایل پی جی کوٹے کے معاہدے میں اربوں روپے کے نقصان کے معاملے میں وفاقی وزیر خواجہ آصف کو بطورگواہ بیان ریکارڈکرانے کیلیے اگلے ہفتے طلب کر لیا ہے۔ایف آئی اے کی6رکنی کمیٹی معاملے کی تحقیقات کررہی ہے۔ سپریم کورٹ نے خواجہ آصف کی پٹیشن پر 12مارچ2003 کو یہ معاہدہ غیر شفاف قرار دیتے ہو ئے کالعدم کر دیا تھا ۔

کمیٹی نے اب تک سابق سیکریٹری پٹرولیم عبداللہ یوسف،منور بصیر احمد، سعید اللہ، محمد الطاف، زیبا علی اور شاہد محمود خان کے بیانات ریکارڈکیے ہیں۔عبوری رپورٹ کے مطابق ایس ایس جی کمپنی کے بورڈ آف ڈائریکٹرکوگزشتہ مہینے سوالنامہ بھجوا دیا گیا تھا لیکن جواب نہیں آیا ،بورڈکے ارکان کے مطابق معاملہ 10 سال پرانا ہے، متعلقہ ریکارڈ ڈھونڈنے میں دشواری کا سا منا ہے۔رپورٹ میںکہا گیا ہے کہ خواجہ آصف کا بیان اگلے ہفتے ریکارڈکیا جائے گا۔