دوپٹا روپ نے اوڑھے رنگ اور پھول

ماڈل: مہوش آفتاب ۔ فوٹو : فائل

---

مشرقی روایات کا اپنا حُسن ہے۔

شادی بیاہ کی ست رنگی اور بلندآہنگ رسومات سے لے کر تہواروں کی گہماگہمی تک اور چٹ پٹے پکوانوں سے سجے دستر خوان سے نت نئے انداز کے ملبوسات تک، مشرق میں بڑی رنگارنگی پائی جاتی ہے۔ دوپٹا مشرق کی دل کش روایات میں سے ایک ہے۔ شلوار قمیص ہو یا چوڑی دار پاجامہ کُرتا، دوپٹے کی سنگت ہی ان ملبوسات کا حُسن دوبالا کرتی ہے۔

دوپٹا آنچل بن کر سر پر سایہ فگن ہو، سینہ ڈھانپنے نسوانی حیا کا پاس دار بنے، گلے کا ہار ہو کر روپ کو چار چاند لگائے یا ہوا کے سنگ لہرائے، یہ ہر حال میں شخصیت کو دل کشی عطا کرتا اور سراپے کو من موہنا بناتا ہے۔ اگر لباس سادہ ہو تب بھی دوپٹے کے رنگ اور نقوش شخصیت کو انفرادیت اور خوب صورتی عطا کردیتے ہیں۔ یوں شرم وحیا کی یہ علامت آرائش وزیبائش کا ذریعہ بھی بن جاتی ہے۔