پرائیویٹ آپریٹرز نے آفر لیٹر کے بغیر ہی حج بکنگ شروع کر دی

وزارت مذہبی امورکے احکام کے تحت آفرلیٹر کے اجرا سے قبل بکنگ کی اجازت نہیں ہے

Nasiruddin May 04, 2017

4 سے 15 لاکھ کے پرائیویٹ حج پیکیجز، قرعہ اندازی کے ناکام افراد نے رجوع کرنا شروع کر دیا۔ فوٹو: فائل

پرائیویٹ ٹور آپریٹرز نے وزارت مذہبی امور کی جانب سے آفرلیٹر کے اجرا کے بغیر ہی حج بکنگ شروع کردی ہے۔

پرائیویٹ کمپنیوں کے حج پیکیجز 4 لاکھ سے 15 لاکھ روپے تک ہیں تاہم سرکاری اسکیم میں قرعہ اندازی میں محروم رہ جانے والے افراد نے بھی فریضہ حج کی ادائیگی کیلیے پرائیویٹ کمپنیوں سے رجوع کرنا شروع کردیا جبکہ قرعہ اندازی میں محروم رہ جانے والوں کو ان کی رقومات کی واپسی کا عمل ابھی شروع نہیں ہوا ہے۔

ذرائع کے مطابق وزارت مذہبی امور کے احکام کے تحت ٹورآپریٹرز کو آفرلیٹر کے اجرا سے قبل بکنگ کی اجازت نہیں ہے اور یہ غیرقانونی عمل ہے اس جرم کے مرتکب حج کمپنیوں کیخلاف حکومت کارروائی کرسکتی ہے، وزارت مذہبی امور پرائیویٹ اسکیم کے تحت حج کے خواہشمند حضرات کو متنبہ کرچکی ہے کہ وہ صرف وزارت کے پاس رجسٹرڈ ٹور آپریٹرزسے ہی رجوع کریں ان کے علاوہ کوئی بھی ٹورآپریٹر حج درخواستیں وصول کرنے کا مجاز نہیں ہے۔

واضح رہے کہ اس سال سرکاری اسکیم کے تحت وزارت مذہبی امور کو ریکارڈ3 لاکھ 38 ہزار حج درخواستیں موصول ہوئی تھیں جبکہ قرعہ اندازی میں ایک لاکھ 7 ہزار خوش نصیبوں کے نام نکلے ہیں جو سال سرکاری اسکیم کے تحت فریضہ حج ادا کریں گے۔