تھائی لینڈ سے آزاد تجارتی معاہدے پر مذاکرات حتمی مراحل میں داخل

پانچواں دوربنکاک میں شروع،18نومبرتک بات چیت ہوگی، پاکستان سے وزارت تجارت وٹیکسٹائل، ایف بی آر، ای ڈی بی افسران شامل

اظہر جتوئی November 16, 2016

اشیا کی فہرستوں کاتبادلہ ہوچکا، وزیرتجارت نے آئندہ ماہ تک ہرصورت ایف ٹی اے کی ہدایت کردی،پاکستانی مفاد مدنظر رہے گا، حکام۔ فوٹو: فائل

پاکستان اور تھائی لینڈ کے درمیان آزاد تجارتی معاہدے (ایف ٹی اے) پر مذاکرات حتمی مرحلے میں داخل ہوگئے، تھائی لینڈ نے 700 اشیا کو ایف ٹی اے میں شامل کرنے کے لیے فہرست فراہم کر دی ہے جبکہ پاکستان نے 500 اشیا کی فہرست دی ہے جبکہ وفاقی وزیر تجارت نے آئندہ ماہ تک ہر صورت ایف ٹی اے کی ہدایت کر دی ہے۔

وزارت تجارت کے حکام نے ''ایکسپریس'' کو بتایا کہ پاک تھائی حکام کے درمیان آزاد تجارتی معاہدے پر مذاکرات کا پانچواں دور بنکاک میں شروع ہوگیا ہے جو4 روز یعنی 18نومبر تک جاری رہے گا، پاکستان کی مذاکراتی ٹیم میں وزارت تجارت، وزارت ٹیکسٹائل انڈسٹری، فیڈرل بورڈ آف ریونیو، انجیئرنگ ڈیولپمنٹ بورڈ کے حکام شامل ہیں۔

وزارت تجارت کے حکام کے مطابق دوطرفہ تجارت میں اضافے کیلیے پاکستان اور تھائی لینڈ کے درمیان آزاد تجارتی معاہدے پر حتمی مذاکرات شروع ہوگئے ہیں، دونوں ممالک نے ایک دوسرے کو اپنی اپنی ترجیحی فہرستیں فراہم کر دی ہیں، تھائی لینڈ نے 700 اشیا کو ایف ٹی اے میں شامل کرنے کی فہرست دی ہے جبکہ پاکستان نے 500 اشیا کی فہرست دی ہے۔

وزارت تجارت کے مطابق تھائی لینڈ کی منڈیوں تک آسان رسائی کے لیے آزاد تجارتی معاہدہ کیا جا رہا ہے،اس وقت تھائی لینڈ سے تجارت میں پاکستان کو 73 کروڑ ڈالر کا خسارہ ہے۔

حکام کے مطابق تھائی لینڈ سے آزاد تجارتی معاہدہ کرتے وقت اپنے مفادات کو مدنظر رکھا جائے گا، اسی لیے چین سمیت دیگر ممالک سے ماضی میں کیے گئے ایف ٹی ایز پر نظر ثانی کی جا رہی ہے۔

ذرائع کے مطابق حکومت نے 2016-17 کیلیے تجارتی خسارے کا اندازہ 20.5 ارب ڈالر لگایا تھا مگر ابتدائی 4ماہ میں ہی یہ 9.3 ارب تک جا پہنچا ہے جو گزشتہ سال کے ابتدائی 4 ماہ سے 22 فیصد زیادہ ہے۔