ٹریڈ باڈیز کو دسمبر تک آڈٹ رپورٹس جمع کرانے کی ہدایت

ڈی جی ٹی او کاووٹرزلسٹ جاری نہ کرنے پراسلام آبادچیمبرکیخلاف کارروائی کا فیصلہ

اظہر جتوئی October 28, 2016

جہاں تک گزشتہ سال کی آڈٹ رپورٹس اور حسابات کا تعلق ہے وہ معاملات ختم ہوگئے ہیں۔۔ فوٹو: فائل

وزارت تجارت کے ذیلی ادارہ ڈی جی ٹی او نے ایف پی سی سی آئی سمیت ملک بھر کے تمام چیمبرزآف کامرس اینڈ انڈسٹری اور ایسوسی ایشنز کو دسمبر تک اپنی آڈٹ رپورٹس اور مالی حسابات کی تفصیلات جمع کرانے کا حکم دے دیا جبکہ اسلام آباد چیمبر کی طرف سے ووٹرز لسٹ جاری نہ کرنے پر کارروائی کا فیصلہ کیا گیا ہے۔

ڈی جی ٹی او کی دستاویزکے مطابق اس وقت ملک بھر میں 50چیمبرز آف کامرس اینڈ انڈسٹری ہیں، 11ویمن چیمبرز، 8 اسمال چیمبرز،7 جوائنٹ چیمبرز آف کامرس اینڈ انڈسٹری، 122آل پاکستان ٹریڈ آرگنائزیشن اور 8 ٹاؤن ایسوسی ایشنز ہیں،رولز کے تحت ہر ٹریڈ آرگنائزیشن قیام کے 1سال کے اندر ویب سائٹ قائم کرکے عہدیداروں، ایگزیکٹو کمیٹی ممبرز، مینجمنٹ اور ممبرز آف جنرل باڈی کی لسٹ اور رابطہ نمبر، آئندہ کے منصوبے، ویژن، ایگزیکٹو کمیٹیوں کے اجلاس و منٹس، الیکشن کا شیڈول، ووٹرز لسٹ اور الیکشن نتائج کی تفصیلات جاری کرنے کی پابند ہے.

ڈی جی ٹی او نے ایف پی سی سی آئی سمیت ملک بھر کے تمام چیمبرزآف کامرس اینڈ انڈسٹری اور ایسوسی ایشنز کو دسمبر تک اپنی آڈٹ رپورٹس اور مالی حسابات کی تفصیلات جمع کرانے کا حکم دے دیا اور اسلام آباد چیمبر آف کامرس اینڈ انڈسٹری کی طرف سے ووٹرز لسٹ جاری نہ کرنے پر کارروائی کا فیصلہ کیا ہے، آڈٹ رپورٹس اور مالی حسابات جمع نہ کرانے والی تنظیموں کے خلاف بلاامتیاز کارروائی ہوگی، اسلام آباد چیمبر آف کامرس اینڈ انڈسٹری کی ویب سائٹ پر کوئی ووٹر لسٹ اور منٹس آف میٹنگ ابھی تک جاری نہیں کیے گئے جس کے خلاف اپوزیشن نے احتجاج کیا ہے۔

اس حوالے سے جب اپوزیشن کے رہنما شاہد زمان شنواری سے رابطہ کیا گیا تو انہوں نے بتایا کہ الیکشن کے دوران بھی ان کو ووٹر لسٹ فراہم نہیں کی گئی اور ابھی تک میرے بار بار مطالبے کے باوجود لسٹ نہیں مل سکی، ووٹر لسٹ فراہم نہ کرنے کی بڑی وجہ اس میں بوگس ووٹ ہیں، ایسے افراد کو ممبرشپ دی گئی ہے جن کا اپنا کاروبار نہیں، ڈی جی ٹی او نوٹس لے۔

اسلام آباد چیمبر کے صدر اور سینئر نائب صدر سے رابطہ کیا گیا تو انہوں نے فون اٹینڈ نہیں کیا تاہم نائب صدر طاہر ایوب نے رابطہ کرنے پر کہا کہ الیکشن شفاف ہوئے ہیں، ووٹر لسٹوں کو آویزاں کیا گیا تھا،اگر اپوزیشن کو کوئی اعتراض ہے تو اس کے تحفطات دور کرنے کو تیار ہیں۔

اس حوالے سے ڈی جی ٹی او کے ڈائریکٹر محمد نصیر نے رابطہ کرنے پر تصدیق کی کہ ملک بھر کے تمام چیمبرز اور تاجر تنظیموں کو دسمبر تک اپنی آڈٹ رپورٹس جمع کرانے کی ہدایات جاری کی گئی ہیں، اگر اسلام آباد چیمبر نے ویب سائٹ پر ووٹر لسٹ اور منٹس آف میٹنگ جاری نہیں کیے تو یہ خلاف قانون ہے جس پر کارروائی کریں گے، جہاں تک گزشتہ سال کی آڈٹ رپورٹس اور حسابات کا تعلق ہے وہ معاملات ختم ہوگئے ہیں۔