فلم انڈسٹری کو پروان چڑھانے کیلیے محنت کی ضرورت ہے ثروت گیلانی

اب تو بالی ووڈ فنکار بھی ہماری فلموں میں کام کرنے لگے ہیں،

Javed Yousuf September 19, 2016

پاکستان فلم انڈسٹری ابھی نوزائیدہ بچہ کی طرح ہے جس کو پروان چڑھانے کے لیے ابھی بہت وقت اور محنت کی ضرورت ہے، اداکارہ۔ فوٹو : فائل

ISLAMABAD: عید پر پاکستانی فلموں کی کامیابی خوش آئند ہے،ہمیں اپنی فلموں کو بین الاقوامی مارکیٹ میں بھی ریلیز کرنے کے لیے منصوبہ بندی کرنی چاہیے ۔ ان خیالات کا اظہار ماڈل واداکارہ ثروت گیلانی نے اپنے ایک انٹرویو میں کیا۔ ان کا کہنا تھا کہ ایک عرصہ بعد عیدالضحیٰ پر تین پاکستانی فلموں کا سینماگھروں میں نمائش کے لیے پیش کیا جانا ، اس بات کی دلیل ہے کہ پاکستان فلم انڈسٹری کا اچھا دور لوٹ رہا ہے۔

چند سال پہلے تو صورتحال اتنی خراب تھی کہ عیدالفطر اور عیدالضحی پر ہالی ووڈ اور بالی ووڈ فلمیں ہی دکھائی دیتی تھی اورایسے لگتا تھا کہ شاید اب ہم اپنی فلمیں سینماگھرو میں نہیں دیکھ سکیں گے ۔ بھلا ہو نئے فلم میکرز کا جنہوں نے ہمت کا مظاہرہ کرتے ہوئے ناممکن کو ممکن کردکھایا۔ حالات اس تیزی سے بدلے کہ بین الاقوامی معیار کی فلمیں بنانے کا رحجان فروغ پارہا ہے، ان میں زیادہ تر نئے لوگ ہی ہیں۔اب تو بالی ووڈ فنکار بھی ہماری فلموں میں کام کرنے لگے ہیں۔

ماضی میں ایسی کوئی فلم نہیں جس میں بھارتی فنکاروں نے کام کیا ہوا، البتہ ہمارے فنکاراور گلوکار تو بالی ووڈ فلموں کا حصہ بنتے چلے آرہے ہیں۔ عیدالضحیٰ پر ریلیز ہونے والی تینوں فلمیں اپنے موضوع، پروڈکشن، کاسٹنگ سمیت ہر لحاظ سے بہترین ہیں۔ پاکستان فلم انڈسٹری ابھی نوزائیدہ بچہ کی طرح ہے ،جس کو پروان چڑھانے کے لیے ابھی بہت وقت اور محنت کی ضرورت ہے۔جس کے لیے ہمیں نیشنل ازم کا مظاہرہ کرتے ہوئے اس کی پروموشن اور ترقی کے لیے مل جل کر کام کرنا چاہیے۔ہونا تو یہ چاہیے تھا کہ وقت کی نزاکت اور حالات کو دیکھتے ہوئے بیک وقت فلمیں لگانے سے اجتناب کیا جائے تاکہ ہر فلم کو باکس آفس پر اچھا رسپانس ملے۔ان کا اچھا بزنس فلموں میں مزید سرمایہ کاری بڑھانے میں مددگار ثابت ہوگا۔