ایکسپورٹ جولائی میں ڈیڑھ ارب ڈالرسے بھی گرگئی

7فیصدگھٹ کر 1ارب 48کروڑڈالرتک محدود، رجحان برقرار رہنے پر سالانہ برآمدات 20 ارب ڈالر سے بھی نیچے جانے کا خدشہ

Kamran Aziz August 11, 2016

تجارتی خسارے کے ساتھ کرنٹ اکاؤنٹ خسارہ بڑھنے سے ادائیگیوں کے توازن کا بحران پیدا،آئی ایم ایف کے پاس پھرجانا پڑ سکتا ہے فوٹو: فائل

پاکستانی برآمدات میں کمی کا سلسلہ رک نہ سکا بلکہ صورتحال پالیسی سازوں کے لیے لمحہ فکریہ بن گئی ہے، رواں مالی سال کے پہلے ماہ کے دوران برآمدات ڈیڑھ ارب ڈالر سے بھی گر گئیں، اگریہ رجحان برقرار رہا تو تجارتی خسارے کے ساتھ کرنٹ اکاؤنٹ خسارہ بڑھنے سے زرمبادلہ ذخائر میں کمی اور ادائیگیوں کے توازن کا بحران کھڑا ہو سکتا ہے۔

جس کے نتیجے میں پاکستان کو ایک بار پھر آئی ایم ایف کے پاس جانا پڑ سکتا ہے کیونکہ زرمبادلہ کے حصول کے تمام ذرائع بشمول ترسیلات زر دباؤ میں آنے کا بھی اندیشہ ہے۔ پاکستان بیوروشماریات سے جاری کردہ اعدادوشمار کے مطابق جولائی 2016میں برآمدات صرف 1ارب 47کروڑ 90لاکھ ڈالر رہیں جو جولائی 2015 میں 1ارب 58 کروڑ 80 لاکھ ڈالر کی ایکسپورٹ سے 6.86 فیصد کم ہے، اگر یہی رجحان رہا تو 3سالہ ٹریڈ پالیسی فریم ورک کے تحت برآمدات کو 35ارب ڈالرتک لے بڑھانا تو ایک طرف ایکسپورٹ 20 ارب ڈالر سے بھی گر جائے گی۔

اعدادوشمار کے مطابق جولائی 2016 میں پاکستانی درآمدات 6.24 فیصد کے سال بہ سال اضافے سے 3ارب 55کروڑ 70لاکھ ڈالر تک پہنچ گئیں، جولائی 2015میں درآمدی بل 3ارب 34کروڑ 80لاکھ ڈالر رہا تھا، برآمدات میں کمی اور درآمدات میں اضافے کے نتیجے میں جولائی کی تجارت میں پاکستان کو 2ارب 7 کروڑ 80 لاکھ ڈالر کا خسارہ ہوا، یہ گزشتہ مالی سال کی اسی مدت میں 1ارب 76کروڑ ڈالر کے خسارے سے 18.07 فیصد زیادہ ہے۔ اعداد و شمار کے مطابق جون کے مقابلے میں برآمدات میں 10.42 فیصد، درآمدات میں20.37 فیصدا ورتجارتی خسارے میں 26.21فیصدکمی ہوئی، جون میں درآمدات4ارب 46 کروڑ 70لاکھ ڈالر، برآمدات1ارب 65کروڑ 10 لاکھ ڈالر اور تجارتی خسارہ2ارب 81کروڑ 60لاکھ ڈالر رہا تھا۔