روزہ قربِ خداوندی کا مظہر

اگر برداشت، رواداری اور تحمل کی دولت سے مسلمانوں کا دامن مالامال ہو، تو اﷲ کی عنایات بھی آبشار کی طرح نازل ہوتی ہیں

پروفیسر تفاخُر محمود گوندل June 10, 2016

اگر برداشت، رواداری اور تحمل کی دولت سے مسلمانوں کا دامن مالامال ہو، تو اﷲ کی عنایات بھی آبشار کی طرح نازل ہوتی ہیں ۔ فوٹو : فائل

حضور سرور ِ عالمؐ کی طرف سے عطا کردہ ضابطۂ حیات کا ہر گوشہ قربِ خداوندی کا مظہر ہے۔ نیت میں اخلاص اور گداز کی دولت موجود ہو تو عبادت کا ہر انداز انسان کو اپنے خالق و مالک کے قریب تر کر دیتا ہے اور بالآخر ایک مقام ایسا بھی آجاتا ہے جب خدائے بزرگ و برتر کا سحاب ِ کرم خود پکار اٹھتا ہے کہ اے میری قربتوں کی انتہا کے طلب گار انسان، مجھے اپنی رضا بتا کہ میں تیری تمناؤں کا محور بن جاؤں گا۔

رمضان المبارک کا مہینہ فیوض و برکات اور نجاتِ اُخروی کے اعتبار سے تمام اسلامی مہینوں کا سردار گردانا جاتا ہے۔ جمالِ فاقہ مستی کا شاہ کار یہ بابرکت مہینہ کبھی گرمیوں میں آتا ہے اور کبھی سردیوں میں۔ اگرچہ موسم ِ سرما میں بھی اس کے ثمراتِ دارین کم نہیں ہوتے مگر گرمیوں کے موسم میں ایک مسلمان کے صبر و شکیبائی کی آزمائش کی انتہا ہوتی ہے۔ برداشت ، رواداری اور تحمل کی دولت سے اگر ایک مسلمان کا دامن مالامال ہو تو اس فیاضِ فطرت کی عطائیں بھی آبشار کی طرح نازل ہوتی ہیں۔ نعائم ِ فطرت کی اہمیت باقی گیارہ مہینوں سے بڑھ کر واضح تر نظر آنے لگتی ہے۔

اﷲ کی رضا ابرِباراں کی طرح برستی ہے۔ معاشرے میں پائے جانے والے عیوب و اسقام سے بچ کر چلنے کا جذبہ آسمان کی رفعتوں کو چھوتا نظر آتا ہے۔ وسعتِ قلبی اور عالی ظرفی لامحدود ہوکر شش جہت میں پھیل جاتی ہے۔ توحید کبریائی کا ڈنکا چارسُو بجنے لگتا ہے۔ طائرانِ زُہد و اتقا فضائے بسیط میں اُڑان بھرنے لگتے ہیں۔ مسجدوں کی چٹائیاں جبینانِ فرزندانِ اسلام سے آشنا ہونے لگتی ہیں۔ دل ہیں کہ سورۃ یٰسین کی گدازِ قرأت سے پگھلنے لگتے ہیں۔ آنکھیں ہیں کہ سورۃ رحمٰن کے سوزِدروں سے اشک بار ہونے لگتی ہیں۔ لب ہیں کہ کلید قرآں کے لمس سے بوسہ ہائے لذت کے مظہر بنتے نظر آتے ہیں۔ وضو کے بعد روزہ دار کی انگشتِ شہادت اٹھتی ہے تو طلب ِ مغفرت کا نمونہ بن جاتی ہے۔ روزہ دار کا دستِ دعا اٹھتا ہے تو رضائے خلاقِ دوجہاں ادائے طلبِ مسلمان پر نثار ہونے لگتی ہے۔

جب ایک مخلص مسلمان سارا دن اپنے مالک کی رضا کے لیے اشتہا اور تشنگی برداشت کرنے کے بعد افطار کے وقت دستر خوان پر بیٹھتا ہے تو ان چند لمحوں کے انتظار میں جو حلاوت محسوس کرتا ہے، کوثر و تسنیم بھی اس پر فدا ہوتے معلوم ہوتے ہیں اور پھر جب مغرب کی اذان کے وقت اﷲ اکبر کی ندا ایک روزہ دار کے فردوسِ گوش بنتی ہے تو وہ دنیا و مافیہا میں پائی جانے والی نعمتوں کو بھول جاتا ہے۔

روزہ افطار کرتے وقت اسے جو لذت و لطافت محسوس ہوتی ہے اس کا اظہار الفاظ کے بیان کا محتاج نہیں۔ اس کے گلوئے خشک میں ٹپکنے والا پانی کا ایک ایک قطرہ اس کے لیے آبِ حیات بن جاتا ہے۔ بے ساختہ اس کی زبان سے اﷲ کی حمد و ثناء کے زم زمے بلند ہونے لگتے ہیں اور وہ پُکار اٹھتا ہے کہ اے فاقہ کش مخلوق کے رازق و خالق میں تیری اس عنایت کے نثار کہ تو نے ایسا فیض رساں ماہ ِ مبارک عطا کیا، جس نے مجھے ایسے روحانی ارتقاء کی دولت سے مالا مال کر دیا کہ بادِسموم کے جھونکے بھی نسیم ِ صبح کی فرحتوں میں بدلتے محسوس ہوتے ہیں۔

نطام ِفطرت کی بُوقلمونیاں روزہ دار کے لیے دعاؤں کے نذرانے لیے حاضر ہوتی ہیں۔ تابانیِ سحر اور انجم ِ فروزاں عروسِ زیبائی کے پیچ و خم کھول کر بارگاہِ روزہ دار کے حضور حاضر ہوتے ہیں۔ کم و پیش چودہ گھنٹے تک معدہ خالی رہنے کی وجہ سے روزہ دار کے منہ سے آنے والی ایک خاص بدمزہ بُو برگ ِ گُل کی شمیم انگیزیوں سے بھی بڑھ کر ہوتی ہے۔ ربِ ذوالجلال کا یہ فرمانِ ذی شان کہ روزہ میرے لیے ہے اور میں ہی اس کی جزا دوں گا، کی اہمیت باغِ جنت میں جا کر ظہور پذیر ہوگی۔ محدثین تحریر فرماتے ہیں کہ جب اہل جنت اس کی نعمتوں سے فیض یاب ہو رہے ہوں گے تو ایک روز ندا آئے گی کہ روزہ دار جنہوں نے دنیا میں فقط میری رضا کے لیے متنوع اشیائے خورد و نوش سے کنارہ کشی اختیار کرلی تھی آج انہیں دیدار الٰہی سے مشرف کیا جائے گا۔

آج روزہ داروں کو اﷲ رب العزت اپنے قریب تر لے آنا چاہتے ہیں جو دنیا میں سوچتے رہے کہ ہمارا خالق و مالک کیسا ہے۔ جب روزہ دار ایک جگہ اکھٹے ہوجائیں گے تو ایک زندگی بخش قسم کی ہوا چلنے لگے گی جس کے جھونکے اتنے فرحت آفرین ہوں گے کہ مشام ِ جاں معطر ہوتے چلے جائیں گے پھر روزہ داروں کو لحنِ داؤدی کی مٹھاس سے بہرہ یاب کیا جائے گا۔ یہ اتنی مسحور کُن ہوگی کہ روزہ دار اس کے سوز سے نیم جاں ہوجائیں گے۔

اس کے بعد ندا آئے گی کہ اے میری رضا پر اپنی خواہشات و تمناؤں کو قربان کر دینے والے روزہ دارو، اے دنیا میں اپنی ہر آرزو کو مجھ پر نثار کردینے والو، اے دن کے اجالوں اور رات کی تاریکیوں میری محبت میں منازل طے کرنے والو، اے موسم سرما میں اپنے آرام و آسائش کو تج کر رکوع و سجود میں محو ہوجانے والو، اے تمازتِ آفتاب میں بھی اپنے سامنے سامان ِ لذت موجود ہونے کے باوجود دائرہِ صبر و قرار میں رہنے والو، آج میں تمہیں ایک ایسے انعام سے نواز رہا ہوں جو صرف اور صرف تمہارے لیے مخصوص ہے۔ محدثین تحریر فرماتے ہیں کہ وجد آفرین لمحے کا آغاز ہوگا جو خود روزہ داروں کے تارِنفس کو ہلا دے گا، اس دوران خالقِ ارض و سماء اپنے رُخ سے نقاب الٹ دے گا اور روزہ داروں کے دلوں میں اس قولِ رسول ﷺ کی اہمیت و صداقت راسخ تر ہو جائے گی کہ روزہ میرے لیے ہے اور میں ہی اس کی جزا دوں گا۔

دیدارِ الٰہی سے بڑا انعام کیا ہو سکتا ہے۔ روزہ دار بحر مسرت و شادمانی میں اس طرح غوطہ زن ہوجائیں گے کہ لذاتِ فردوسِ بریں کو یک سر فراموش کردیں گے۔

روزہ دار کے چہرے پر اختتام ِ رمضان تک ایک فطری بالیدگی اور کیفیت جمال پیدا ہوجاتی ہے کہ صاف معلوم ہوتا ہے کہ رضا طلبی پروردگار میں طلب گارِ رحمت نے ارتقاء کی جو منازل طے کی ہیں، انہوں نے اس کے خدوخال کو ایسا رنگِ حسن عطا کردیا ہے کہ جس پر سیارگانِ فلک کی رعنائی بھی نثار ہونے کو تیار ہوتی ہے۔

غروب ِ آفتاب تک اپنے آپ کو بچا کر رکھنے اور پھر اس امتحان میں پورا اترنے والوں کو جو جزا ملے گی اس کا تصور بھی اتنا کیف آفریں اتنا وجد انگیز اتنا خوب صورت ہوتا ہے کہ روزہ دار کی قوتِ احساس حریم ِ قدس کی جانب محو پرواز نظر آنے لگتی ہے۔ شبستانِ غم کی ہر قندیل روشن تر ہونے لگتی ہے۔ تابشِ جلوہ ہائے جمالِ خدا سے نگاہِ روزہ دار میں کمال درجہ کی جاذبیت پیدا ہونے لگتی ہے۔ اس کی وسعتِ نظر میں فرازِ آسمان بھی گُم نظر آنے لگتا ہے جب وہ خلوص و وفا کے ساتھ سحری کرنے کے بعد مسجد کی جانب چلنے لگتا ہے تو قدم قدم پہ جبین ِ نیاز جھکتی معلوم ہوتی ہے۔ انوارِ رب ذوالجلال سمٹ کر اس کے دل کو بُقعہ نور بنا دیتے ہیں۔ مشیت پروردگار اس کی فاقہ مستی پر تبسم فرماتی ہے۔ روزہ دار کے ویرانہ خیال میں ایسے ایسے نقوش ابھرتے ہیں جو اسے فانی کائنات سے بے نیاز کرکے درِکریم پر لے آتے ہیں۔