کراچی میں سینے سے باہردل والا بچہ آپریشن کے فوری بعد انتقال کرگیا

ڈاکٹر سہیل کی سربراہی میں ٹیم نے پونے2 گھنٹے آپریشن کیا تاہم بچہ جانبر نہ ہو سکا

Express Desk May 04, 2016

80 لاکھ بچوں کے بعد دنیا میں ایک بچہ ایسا جنم لیتا ہے جس کا دل جسم سے باہر ہو، ماہرین فوٹو؛ فائل

BAGHDAD: کراچی کے قومی ادارہ برائے امراض قلب میں داخل سینے سے باہر دل والا بچہ عبدالحنان آپریشن کے بعد انتقال کر گیا۔

قومی ادارہ برائے امراض قلب کے ایگزیکٹو ڈائریکٹر پروفیسر ندیم قمر نے بتایا کہ ڈاکٹر سہیل بنگش کی سربراہی میں دس رکنی ٹیم نے بچے کا آپریشن کیا جو پونے 2گھنٹے جاری رہا۔ ڈاکٹروں نے آپریشن کے نتیجے میں بچے کے دل کو پسلیوں کے اوپر جلد کے اندر محفوظ کیا تھا۔ ڈاکٹروں نے بچے کو نگرانی کیلیے مصنوعی سانس پر رکھا تھا تاہم عبدالحنان آپریشن کے 2 گھنٹے بعد انتقال کر گیا۔

ماہرین کے مطابق 80لاکھ بچوں کے بعد دنیا میں ایک بچہ ایکٹوپیا کارڈس کا پیدا ہوتا ہے۔ واضح رہے عبد الحنان نے کا دل قدرتی طور پر جسم سے باہر تھا جسے فوری طور پر قومی ادارہ صحت برائے اطفال منتقل کیا گیا جس کے بعد ڈاکٹروں نے آپریشن کیلیے اسے قومی ادارہ برائے امراض قلب منتقل کیا تھا۔