حکومت ٹریڈ پالیسی2015 18کا آج اعلان کرے گی

تحقیق وترقی کے ذریعے ٹیکسٹائل کے ہر شعبے کی الگ الگ پالیسی بنائی جائے گی

اظہر جتوئی March 22, 2016

تحقیق وترقی کے ذریعے ٹیکسٹائل کے ہر شعبے کی الگ الگ پالیسی بنائی جائے گی فوٹو: اے ایف پی/فائل

وفاقی حکومت 9ماہ بعد منگل کو باقاعدہ نئی ٹریڈ پالیسی 2015-18 کا اعلان کرے گی، وزیر اعظم پالیسی کی منظوری دے چکے ہیں جس میں برآمدی ہدف 35ارب ڈالر مقرر کر دیا گیاہے، نئی سرمایہ کاری پر 20 فیصد اورجدید مشینری پر 50فیصد مارک اپ سپورٹ فراہم کی جائے گی، تجارتی پالیسی پر عمل درآمد کے لیے 20ارب روپے مختص کیے جائیں گے۔

27عالمی کنونشن پر عملدرآمد کی مانیٹرنگ کی جائے گا۔ ''ایکسپریس'' کو موصولہ ٹریڈ پالیسی دستاویزات کے مطابق نئی پالیسی کے تحت 2018تک ایکسپورٹ بڑھا کر35ارب ڈالر تک پہنچائی جائے گی، علاقائی تجارت کو فروغ اور تجارت کو فعال اور جدید تقاضوں کے مطابق ڈھالنے کے لیے اقدامات کیے جائیں گے، نئی پالیسی کے 4 ستون بنائے گئے ہیں جن میں اعلیٰ معیار کی پیداوار، مارکیٹ تک رسائی، ادارہ جاتی ترقی اور تجارتی سہولتوں کی فراہمی شامل ہے۔

تحقیق وترقی کے ذریعے ٹیکسٹائل کے ہر شعبے کی الگ الگ پالیسی بنائی جائے گی، برانڈنگ اور سرٹیفکیشن کے لیے گرانٹ فراہم، ویلیو ایڈیشن کی حوصلہ افزائی کی جائے گی، 27 عالمی کنونشن پر عمل درآمد کیا جائے گا، نئی تجارتی منڈیاں تلاش کی جائیں گی جن میں آسیان، افریقہ، لاطینی امریکا سمیت دیگر ممالک شامل ہیں، فارما سیوٹیکل، کاسمیٹکس اور چاول کی برآمد میں اضافے کے لیے ایکسپورٹ پروموشن کونسلز کے نئے ادارے بنائے جائیں گے۔

سارک ، ای سی او اور آسیان ممالک سے ریجنل تعاون بڑھانے کے لیے گورنمنٹ پروکیورمنٹ اور ٹریڈ فیسیلیٹی معاہدے کیے جائیں گے، کاروباری لاگت کم کرنے کے مقصد سے ریل سروس کی بہتری کے لیے ٹاسک فورس بنائی جائے گی،کوالٹی اسٹینڈرڈ کے لیے وزارت سائنس اینڈ ٹیکنالوجی سے مل کر بین الاوزارتی ورکنگ گروپ بنایا جائے گا۔

نئی تجارتی پالیسی کے تحٹ 2015تا2018کی 3سالہ مدت میں میں فشریزکی 2 ارب 45 کروڑ ڈالر کی برآمدات، گوشت 1ارب 68کروڑڈالر، چاول 13ارب، سبزی و پھلوں کی 6ارب50 کروڑ ڈالر کی ایکسپورٹ کی کوشش کی جائیگی، اسی طرح پنکھوں کی برآمدات 82کروڑ ڈالر،کٹلری 1ارب 92کروڑ ڈالر،کھیلوں کا سامان7 ارب 76کروڑ ڈالر، سرجیکل 7ارب 40کروڑ ڈالر، چمڑہ 3ارب 29کروڑ ڈالر اور فارماسیوٹیکل 1ارب 24کروڑ ڈالر سے زائد بڑھانے کی کوشش کی جائے گی، نئی سرمایہ کاری پر20فیصد انویسٹمنٹ سپورٹ اور مشینری پر50فیصد مارک اپ سپورٹ فراہم کی جائے گی۔