اہم شخصیات کیلیے سی این جی گاڑیوں کے استعمال پر پابندی

ہنگامی حالات میں اگر سی این جی گاڑی استعمال کرنی ہو تو اسپیشل برانچ سے چیک کرائی جائے

Khalid Rasheed March 15, 2016

پنجاب حکومت نے تمام محکموں کو ہدایات جاری کر دیں، پابندی پر سختی سے عملدرآمد کا حکم ۔ فوٹو: فائل

پنجاب حکومت نے صوبے میں سی این جی اسٹیشن کھلنے کے بعد سلنڈر دھماکے اور دہشت گردی کے خدشہ کی وجہ سے وی وی آئی پیز کی نقل و حرکت کیلیے سی این جی گاڑیوں کے استعمال پر پابندی عائد کر دی ہے۔

بیوروکریسی کو بھی ہدایات جاری کی گئی ہیں کہ گھروں اور دفاتر میں پارکنگ سے قبل سرکاری گاڑیوں کو چیک کیا جائے اس ضمن میں سروسز اینڈ جنرل ایڈمنسٹریشن ڈپارٹمنٹ کے پروکیورمنٹ اینڈ ٹرانسپورٹ ونگ نے صوبائی اداروں کے سربراہان، کمشنرز، ڈی سی اوز کو مراسلہ جاری کر دیا۔ ایک اعلیٰ سطح کے اجلاس میں وی وی آئی پیز اور وی آئی پیزکی موومنٹ کیلیے سی این جی گاڑیاں استعمال کرنے کے ایشو کا تفصیلی جائزہ لیا گیا۔

اجلاس میںفیصلہ کیا گیا کہ کسی بھی ناخوشگوار واقعہ سے بچنے کیلیے وی وی آئی پیز اور وی آئی پیز کی پروٹوکول ڈیوٹی کیلیے سی این جی گاڑیاں استعمال نہ کی جائیں، وی وی آئی پی ڈیوٹی کے علاوہ انتہائی ہنگامی حالات میںاگر سی این جی گاڑی کے استعمال کی ضرورت پیش آئے تو ان گاڑیوں کواستعمال سے قبل اسپیشل برانچ کے عملہ سے چیک کرایا جائے۔