پاکستان کا روس و دیگر سابقہ سوویت ریاستوں سے آزاد تجارتی معاہدے کا فیصلہ

وسطی ایشیائی ریاستوں کو پاکستان کی برآمدات میں اضافے کیلیے تجارتی نمائشوں کا ایک جامع منصوبہ منظور کیا گیا

اظہر جتوئی February 29, 2016

وزارت تجارت کے مطابق پاکستانی برآمدات اور وسطی ایشیائی درآمدات میں تجارتی مطابقت ہے۔ فوٹو: فائل

پاکستان نے روس سمیت دیگر سابقہ سوویت ریاستوں سے انٹرا ٹریڈ میں اضافے کیلیے آزاد تجارتی معاہدہ کرنے کا فیصلہ کیا ہے، اس سلسلے میں حکمت عملی طے کر لی گئی ہے۔

ایکسپریس کو موصول دستاویزات کے مطابق روس نے پاک روس بین الحکومتی کمیشن برائے تجارت، معیشت، سائنس اور تکنیکی تعاون کیلیے پاکستان سے خوردنی اور زرعی اشیا درآمد کرنے میں گہری دلچسپی کا اظہار کیا ہے۔ روس نے امریکا اور یورپی یونین سمیت نیٹو ممالک سے ان اشیا کی درآمد پر پابندی عائد کر رکھی ہے،حکومت نے ان مواقع سے استفادہ حاصل کرنے کیلیے روس کو جوائنٹ ورکنگ گروپ کی تجویز پیش کر دی ہے۔ دستاویزات کے مطابق پاکستان اور رشین فیڈریشن کے درمیان گزشتہ تین سالوں کے دوران کسی تجارتی معاہدے پر دستخط نہیں ہوئے۔

رشین فیڈریشن اس وقت یورو ایشین اکنامک یونین (سی سی یو) کی رکن ہے جوکہ رشین فیڈریشن اور دیگر سابقہ سوویت ریاستوں کی ایک کسٹمز یونین ہے۔ ای ای یو کی منڈی میں مقابلے کی حیثیت تک رسائی حاصل کرنے کیلیے وزارت تجارت اور وزارت خارجہ نے ایک دوسرے سے مشاورت کے بعد ای ای یو سے فری ٹریڈ ایگریمنٹ کے لیے بات چیت کا آغاز کرنے کیلیے رجوع کر رہے ہیں۔

دستاویزات کے مطابق پاکستان اور رشین فیڈریشن کے درمیان انٹرا ٹریڈ 39کروڑ ڈالر ہے جس میں پاکستان کی روس کو برآمدات 18کروڑ 38لاکھ ڈالر اور درآمدات 20 کروڑ 64لاکھ ڈالر ہے۔ وسطی ایشیائی ریاستوں کو پاکستان کی برآمدات میں اضافے کیلیے تجارتی نمائشوں کا ایک جامع منصوبہ منظور کیا گیا۔

منصوبے کے تحت وزارت تجارت اور ٹریڈ ڈیولپمنٹ اتھارٹی آف پاکستان قازقستان، کرغزساتان، ازبکستان اور تاجکستان میں مئی کے آغاز میں روڈ شوز کا انعقاد کرے گی جس میں فارماسیوٹیکلز، ٹیکسٹائل،کھیلوں کے سامان، سرجیکل آلات، زرعی مصنوعات اور آٹو پارٹس کی نمائش کی جائے گی اور برآمدی آرڈر حاصل کرنے کیلیے پاکستانی تاجروں کی مقامی تاجروں سے ملاقاتوں کا اہتمام کیا جائے گا تاکہ کاروباری حضرات کے مابین پارٹنر شپ استوار کی جا سکے۔

وزارت تجارت کے مطابق پاکستانی برآمدات اور وسطی ایشیائی درآمدات میں تجارتی مطابقت ہے۔ حال ہی میں پاکستان کے علاقائی رابطہ کاری کے پروجیکٹس کے آغاز کی بدولت تجارتی ترسیل میں آسانی پیدا ہو گی اور کم لاگت ترسیل کی بدولت برآمدی اشیا کی قیمتیں کم ہوں گی۔