میاں صاحب ضد چھوڑیے پی آئی اے کو کھڑا کیجیے

خسارہ تو ملک کا بھی بہت بڑھ چکا ہے، کہیں ملک کی بھی نجکاری تو نہیں ہوجائے گی۔ فوٹو:فائل

---

''نواز شریف صاحب نے پاکستان انٹرنیشنل ائیرلائن (پی آئی اے) کے دو ملازمین کی شہادت کی ذمہ داری قبول کرتے ہوئے استعفیٰ دے دیا۔''

''یہ آپ کی خواہش ہے یا خبر!!''

''خبر تو ہو نہیں سکتی اسی لیے خواہش کو ہی خبر بنایا ہے۔''

''بھلا وہ کیوں استعفیٰ دیں وہ 'ذمہ دار' نہیں۔''

''وہ غیر ذمہ دار ہیں تو پھر ذمہ دار کون ہے؟ کیونکہ قانون نافذ کرنے والے اداروں نے بھی ذمہ داری قبول کرنے سے انکار کردیا ہے۔''

''ان کی ذمہ داری ہے جو گولیوں کا نشانہ بنے۔ یہ گولیوں کے سامنے نہ آتے اور نہ یہ واقعہ پیش آتا۔''

''تمہارا مطلب ہے گھر بیٹھ کر احتجاج کرتے۔''

''جی ہاں! احتجاج کرنے کا حق صرف سیاستدانوں کے پاس ہے۔ عوام یہ کام کرے گی تو اسے گولیاں اور لاٹھیاں کھانی ہوں گی۔''

''ہمارے ملک کا المیہ ہے کہ بڑے بڑے واقعات اور سانحات پیش آتے ہیں لیکن کوئی ذمہ داری قبول نہیں کرتا۔''

''ایسی بھی کوئی بات نہیں ایک جماعت ہے جو ہر واقعہ کی ذمہ داری بلاجھجھک قبول کرتی ہے۔''

''وہ کون سی جماعت ہے؟''

''طالبان اور القاعدہ ۔۔۔ کم از کم ہر واقعہ کی ذمہ داری قبول کرتے ہیں چاہے کسی نے بھی کیا ہو۔''

''لیکن اس بار تو انہوں نے بھی ذمہ داری قبول نہیں کی۔''

''اسی لیے تو چیئرمین پی آئی اے نے استعفیٰ دے دیا ہے ۔''

''کیا وہ ذمہ دار ہیں؟''

''جب ذمہ دار لوگ اپنی ذمہ داری قبول نہ کریں تو ان کو اپنی ذمہ داری پر رہنے کا کیا حق پہنچتا ہے؟''

''یہ حق ان کو عوام نے دیا ہے۔''

''عوام نے ملک کو چلانے کا حق دیا تھا نہ کہ ملک کے اثاثوں کو بیچنے کا۔''

''پی آئی اے کی نجکاری کیے بغیر نہیں چلایا جاسکتا۔''

''اب ایسی بات بھی نہیں، میاں صاحب ملک چلا سکتے ہیں تو پی آئی اے کیا چیز ہے؟ ان کے پاس ایسا نسخہ خاص ہے جس پر عمل کرکے پی آئی اے کو نہ صرف بچایا جاسکتا ہے بلکہ اڑایا بھی جاسکتا ہے۔ انہوں نے وہ نسخہ خاص زرداری صاحب کو دیا تھا کہ وہ نیویارک کا ہوٹل بیچ کر پی آئی اے کو کھڑا کریں۔ ''

''میاں صاحب کے پاس تو کچھ بھی نہیں! اگر کچھ ہوتا تو وہ پی آئی اے کبھی نہ بیچتے۔ خسارہ بہت بڑھ چکا ہے۔''

''خسارہ تو ملک کا بھی بہت بڑھ چکا ہے، کہیں ملک کی بھی نجکاری تو نہیں ہوجائے گی۔ اگر اسی طرح نجکاری کا عمل جاری رہا تو وہ دن بھی دور نہیں جب ملک بھی بک جائے گا۔ پہلے جنگیں لڑ کر ملک پر قبضہ کیا جاتا تھا لیکن اب ملک کے اثاثہ جات پر قبضہ کیا جاتا ہے۔ ''

''سب بیچ دے ۔۔۔ نیا پاکستا ن نہیں چاہیے!!''

''سب بیچنے کے بعد سیاستدان تو ملک سے باہر چلے جائیں گے لیکن عوام ان کے قرضے نسل در نسل غلامی کی صورت اتارے گی۔''

''اگر یہ بات ہے تو ہم اگلے الیکشن میں انہیں ووٹ نہیں دیں گے۔''

''آپ اپنا ووٹ اپنے پاس رکھیں، اگلے الیکشن تک تو یہ سب بیچ چکے ہوں گے ۔''

''اچھا اسی لیے زرداری صاحب پہلے ہی ملک سے باہر جاچکے ہیں۔''

''اور اب میاں صاحب ۔۔۔!!''



[poll id="936"]

نوٹ: ایکسپریس نیوز اور اس کی پالیسی کا اس بلاگر کے خیالات سے متفق ہونا ضروری نہیں ہے۔

اگر آپ بھی ہمارے لیے اردو بلاگ لکھنا چاہتے ہیں تو قلم اٹھائیے اور 500 الفاظ پر مشتمل تحریر اپنی تصویر، مکمل نام، فون نمبر ، فیس بک اور ٹویٹر آئی ڈیز اوراپنے مختصر مگر جامع تعارف کے ساتھ [email protected] پر ای میل کریں۔ بلاگ کے ساتھ تصاویر اورویڈیو لنکس۔