’’چنبیلی‘‘ کی مائرہ خان کی نئی فلم ’’بدل‘‘ اگلے ماہ ریلیز ہوگی

ٹی وی کی طرح فلمیں بھی مختلف موضوعات پر بنائی جا رہی ہیں اور فلم بین بھی انھیں پسند کر رہے ہیں،مائرہ خان

Javed Yousuf December 03, 2015

’’بدل‘‘ میں میرے کردار کو پسند کیا جائے گا، اداکارہ۔ فوٹو : فائل

معروف اداکارہ و ماڈل مائرہ خان کی فلم ''بدل'' (Revenge of the worthless) 15) جنوری کو ریلیز کرنے کا اعلان کر دیا گیا۔

جمال شاہ کی بطور ڈائریکٹر پہلی فلم کی دیگر کاسٹ میں فردوس جمال، ایوب کھوسو، شامل خان، بلال خٹک، افتخار قیصر اور عبدالرحمان شامل ہیں۔ مائرہ خان جنہوں نے کیریئر کا آغاز ڈرامہ سیریل ''جیسے جانتے نہیں'' سے کیا۔ اس میں جاندار ایکٹنگ پر انھیں متعدد ڈرامہ سیریلز مل گئیں۔ اداکاری کے ساتھ کمپیئرنگ بھی کر رہی ہیں۔ مائرہ خان نے انٹرویو دیتے ہوئے کہا کہ ٹی وی کی طرح فلمیں بھی مختلف موضوعات پر بنائی جا رہی ہیں اور فلم بین بھی انھیں پسند کر رہے ہیں۔

اس کی وجہ شاید فلم میکنگ میں آنے والوں کا تعلق ٹی وی سے ہی ہے اس لیے وہ چھوٹی اسکرین کی طرح بڑی اسکرین پر بھی کامیڈی، رومانٹک، ایکشن اور تھرل کے ساتھ سوشل موضوعات کا بھی انتخاب کر رہے ہیں۔ ماضی میں ہماری فلمیں یکسانیت کا شکار تھیں، اسکرپٹ سمیت کسی بھی شعبے پر توجہ نہیں دی گئی، جس نے اسٹوڈیو اور سینما انڈسٹری کو تباہی کے دہانے پر پہنچا دیا تھا۔ پوری دنیا میں فلم میکنگ میں ایک انقلاب آچکا ہے، اس کو ساتھ لے کر ہم آگے بڑھ سکتے ہیں۔

سنجیدہ کردار کرنے کے سوال پر اداکارہ کا کہنا تھا کہ کامیڈی سمیت ہر طرح کے کردار کرنا چاہتی ہوں اس بارے میں پروڈیوسر اور ڈائریکٹر سے جب بھی پوچھا تو ان کا ایک ہی جواب ہوتا کہ تم سے بہتر یہ کوئی نہیں کر سکتا۔ ''بدل'' میرے کیریئر کی دوسری فلم ہے۔ اس سے قبل سیاسی موضوع پر بنائی جانے والی فلم ''چنبیلی'' ریلیز ہو چکی ہے۔ اس میں بہترین Debut اداکارہ ایوارڈ کے لیے نامزد بھی ہوئی۔ انھوں نے کہا کہ ''بدل'' میں میرے کردار کو پسند کیا جائے گا۔