حکومت کا غیر معیاری سولر پینلز کی درآمد کا نوٹس

شمسی توانائی کے درآمدہ آلات انسانی صحت کے ساتھ قیمتی برقی آلات کے لیے بھی نقصان دہ ہیں

تنویر محمود راجہ September 21, 2015

ملک بھر میں قائم کسٹم کلیئرنگ دفاتر میں ایسے ماہرین کو تعینات کیا جائے جو ان آلات کی کیفیت اور معیار کو چیک کرسکیں۔ فوٹو فائل

وفاقی حکومت نے رواں مالی سال (2015-16) کے دوران ملک میں شمسی توانائی کے غیر معیاری آلات کی درآمد کا نوٹس لیتے ہوئے وزارت پانی و بجلی اور ایف بی آر کو ہر صورت معیاری آلات کی درآمد یقینی بنانے کی ہدایت کر دی۔

اس سلسلے میں ایکسپریس کو دستیاب دستاویزات کے مطابق حکومت کی طرف سے ایف بی آر کو جاری کردہ احکامات میں کہا گیا ہے کہ رواں مالی سال کے دوران فیڈرل بورڈ آف ریونیو اس امر کو یقینی بنائے کہ ملک میں شمسی توانائی کے آلات کی درآمد کے دوران ان میں موجود مٹیریل بین الاقوامی معیار کے عین مطابق ہے۔

دستاویزات کے مطابق حکومت نے یہ احکامات ملک میں شمسی توانائی کے غیر معیاری آلات کی درآمد سے متعلق شکایات پر جاری کیے جس پر متبادل توانائی ڈیولپمنٹ بورڈ نے تمام صوبائی محکمہ توانائی، فیڈرل بورڈ آف ریونیو، انجینئرنگ ڈیولپمنٹ بورڈ، پاکستان کونسل آف رینیوبل انرجی ٹیکنالوجیز، پاکستان اسٹینڈرڈز اینڈ کوالٹی کنٹرول اتھارٹی، رینیوبل انرجی ایسوسی ایشن آف پاکستان، چیمبرز آف کامرس، کسٹم کلیئرنگ ایجنٹ ایسوسی ایشن سمیت متعلقہ اسٹیک ہولڈرز کے ساتھ تفصیلی مشاورت کی اور اس بارے میں ان کی آرا لی گئیں جس کے بعد ایک تفصیلی رپورٹ تیار کی گئی جس میں کہا گیا کہ ملک میں اس وقت درآمد کیے جانے والے شمسی توانائی کے آلات نہ صرف انسانی صحت کے لیے نقصان دہ ثابت ہو رہے ہیں بلکہ ان سے صارفین کے قیمتی برقی آلات بھی متاثر ہو رہے تھے۔

اس رپورٹ کی روشنی میں وزارت پانی و بجلی نے بھی اپنی سفارشات تیار کیں جن میں کہا گیا کہ ملک میں غیرمعیاری آلات کی درآمد روکنے کے لیے ایف بی آر کو متحرک کیا جائے اور ملک بھر میں قائم کسٹم کلیئرنگ دفاتر میں ایسے ماہرین کو تعینات کیا جائے جو ان آلات کی کیفیت اور معیار کو چیک کرسکیں۔