غیرمعیاری سولرپینلزکی درآمدپرپابندی عائدکرانے کافیصلہ

سولرپینلز میں سے نکلنے والی شعاعیں انسانی صحت کے لیے نہایت مضرہیں، ماہرین

تنویر محمود راجہ July 14, 2015

سولرپینلز میں سے نکلنے والی شعاعیں انسانی صحت کے لیے نہایت مضرہیں، ماہرین۔ فوٹو فائل

ISLAMABAD: وزارت پانی وبجلی نے غیرمعیاری سولرپینلزکی درآمدکا نوٹس لیتے ہوئے ان پر پابندی عائدکرانے کافیصلہ کیاہے،اس سلسلے میں وزارت سائنس وٹیکنالوجی،پاکستان کونسل آف سائینٹفک اینڈ انڈسٹریل ریسرچ،وزارت خزانہ اور ایف بی آرسے آرا طلب کی گئی ہیں۔

ذرائع کے مطابق نجی شعبے کی طرف سے ملک میں درآمد کیے جانیوالے سولرپینلزکے معیارکے حوالے سے ماہرین نے عدم اعتمادکا اظہارکرتے ہوئے کہاہے کہ اس میں سے نکلنے والی شعاعیں انسانی صحت کیلیے نہایت مضرہیں جبکہ ان پینلزکی درآمدکے وقت معیارکوبھی مدنظرنہیں رکھاجا رہا۔مختلف اداروں نے درآمدکیے جانیوالے پینلزکو ناقابل استعمال قراردیتے ہوئے کہا ہے کہ اس سے نہ صرف انسانی صحت بلکہ گھریلوبرقی آلات پربھی منفی اثرات مرتب ہوتے ہیں۔

ایکسپریس کے رابطہ کرنے پروزارت پانی وبجلی کے سینئرافسرنے بتایاکہ وزارت نے اس بارے میں مناسب پالیسی بنانے کافیصلہ کیاہے ،اس سارے عمل میں ایف بی آراوروزارت خزانہ کی رضامندی ضروری ہے۔