شہر کی سڑکیں خراب ہیں ٹوئٹر سے مدد لیجیے

پاناما میں سوشل سروس نے حکام کی ناک میں دَم کردیا، سڑکوں کی مرمت پر مجبور

عبدالریحان July 12, 2015

حکام کو سڑکوں کی مرمت پر آمادہ کرنے کے لیے ٹیلی میٹرو رپورٹا کی ٹیم نے دیگر طریقے بھی اپنائے تھے:فوٹو : فائل

دنیا بھر میں تیس کروڑ سے زاید لوگ ٹوئٹر کا استعمال کرتے ہیں۔ وہ اس ویب سائٹ کے ذریعے اپنی لمحہ بہ لمحہ مصروفیات سے فالوورز کو آگاہ رکھتے ہیں۔ تاہم سماجی رابطے کی ویب سائٹ سے معاشرتی فلاح و بہبود کے لیے کام لینے کی مثالیں خال خال ہی نظر آتی ہیں۔

ٹوئٹر کو سماجی بھلائی کے کاموں میں استعمال کرنے کی شان دار مثال لاطینی امریکا کے ملک پاناما میں سامنے آئی۔ پاناما سٹی، پاناما کا دارالحکومت ہے۔ اس کے باوجود شہر کی بیشتر سڑکیں ٹوٹ پھوٹ کا شکار ہیں۔ سڑکوں کی خستہ حالی طویل عرصے سے شہریوں کے لیے مسئلہ بنی ہوئی ہے، مگر انتظامیہ اس طرف توجہ دینے کے لیے تیار نہیں۔ ٹیلی ویڑن پر اس بارے میں متعدد بار خبریں چلائی گئیں، رپورٹس دکھائی گئیں، مگر نتیجہ وہی ڈھاک کے تین پات۔ بالآخر ایک ٹیلی ویژن چینل سے نشر ہونے والے پروگرام کی ٹیم نے اس سلسلے میں ٹوئٹر سے مدد لینے کا فیصلہ کیا۔

ٹیم کے ارکان نے حرکت کو محسوس کرنے والے ڈیجیٹل آلے مختلف علاقوں کی خراب ترین سڑکوں میں نمودار ہونے والے گڑھوں میں رکھ دیے۔ اب جب بھی کسی گاڑی کا پہیہ مضبوط آلے پر سے گزرتا، تو یہ خودکار طور پر پبلک ورکس ڈیپارٹمنٹ کے ٹوئٹر اکاؤنٹ پر ایک پیغام بھیج دیتا۔ یوں پبلک ورکس ڈیپارٹمنٹ کو دن بھر میں ہزاروں پیغامات موصول ہونے لگے۔ پیغامات کی بھرمار سے تنگ آکر بالآخر پبلک ورکس ڈیپارٹمنٹ کے اہل کار حرکت میں آئے، اور رفتہ رفتہ سڑکوں کی مرمت ہونے لگی۔

پاناما وسطی اور جنوبی امریکا کی تیزی سے اْبھرتی ہوئی معیشت ہے۔ پاناما سٹی، ملکی ترقی کا مرکز ہے۔ یہاں بہت سرعت سے فلک بوس عمارتیں کھڑی ہوئیں۔ فلک بوس عمارتیں تو تیار ہوگئیں کیوں کہ وہ نجی شعبے نے تیار کی تھیں، مگر سڑکوں کی حالت ویسی کی ویسی ہی رہی۔ لاطینی امریکا کا دبئی کہلانے والے شہر کی سڑکیں اْدھڑی ہوئی تھیں اور ان میں جا بہ جا گڑھے پڑے ہوئے تھے۔ یوں ان سڑکوں پر گاڑی چلانا کسی بھیانک خواب سے کم نہیں تھا۔

سڑکوں کی بدحالی کی جانب سرکاری حکام کی توجہ مبذول کروانے کے دیگر طریقوں میں ناکامی کے بعد '' ٹیلی میٹرو رپورٹا'' نامی پروگرام کی ٹیم نے ایک اشتہار ساز ایجنسی کے تعاون سے یہ مہم تشکیل دی۔ انھوں نے شہر کی مصروف اور خراب ترین سڑکوں کے گڑھوں میں ٹویٹ کرنے والے آلات نصب کردیے۔ جب بھی یہ آلات کسی گاڑی کے پہیے تلے آتے تو دباؤ پڑنے کے نتیجے میں ایک مزاحیہ ٹوئٹ پبلک ورکس ڈیپارٹمنٹ کے ٹوئٹر اکاؤنٹ میں پہنچ جاتا جس میں گڑھے کا محل وقوع بھی موجود ہوتا۔

حکام کو سڑکوں کی مرمت پر آمادہ کرنے کے لیے ٹیلی میٹرو رپورٹا کی ٹیم نے دیگر طریقے بھی اپنائے تھے، مگر یہ ترکیب سب سے زیادہ کارگر ثابت ہوئی ہے، اور اب شہر کی سڑکوں میں پڑے ہوئے گڑھے تیزی سے غائب ہورہے ہیں۔