جڑواں شہروں میں سیکیورٹی کیمرے 30 جون تک لگانے کی ڈیڈلائن

آبپارہ چوک سے لے کر پورے کشمیر ہائی وے اور مرکزی شاہراہوں پر کیمروں کی تنصیب کا کام مکمل ہو چکا ہے

Iftikhar Chohadary May 18, 2015

آبپارہ چوک سے لے کر پورے کشمیر ہائی وے اور مرکزی شاہراہوں پر کیمروں کی تنصیب کا کام مکمل ہو چکا ہے۔فوٹو: فائل

وزیر داخلہ چوہدری نثار علی خان نے جڑواں شہروں سے دہشت گردوں اور جرائم پیشہ عناصر کو جدید طریقہ سیکیورٹی کے تحت قانون کی گرفت میں لینے کی خاطر 1500سیکیورٹی کیمروں کی تنصیب کے جاری منصوبہ کو 30 جون تک مکمل کرنے کی ڈیڈ لائن دے دی ہے۔

ذرائع نے بتایا کہ وزارت داخلہ کے تحت مذکورہ بالامنصوبہ پیپلز پارٹی کے دور حکومت میں شروع کیا گیا تھا جس کے مطابق اسلام آباد میں1200 جبکہ باقی 300 کیمرے راولپنڈی میں مری روڈ پر نصب کیے جانے تھے، منصوبے کے مطابق سہالہ سے زیرو پوائنٹ، مری اور آزاد کشمیرکو ملانے والی 17 میل سے سرینا ہوٹل چوک، ترنول سے موٹر وے چوک اور کشمیر ہائی وے،گولڑہ چوک، آئی جے پرنسپل روڈ، راولپنڈی مری روڈ اور اسلام آباد مری روڈ پرکیمروں کی تنصیب کا 80 فیصد کام مکمل کر لیا گیا ہے، باقی ماندہ کام مکمل کرنے کیلیے 2 ماہ مانگے گئے تھے جس میں وزیر داخلہ نے متعلقہ چینی کمپنی کو آئندہ ماہ (جون) کی 30 تاریخ کی ڈیڈ لائن دیتے ہوئے منصوبہ مکمل کرنے کی ہدایت کی ہے۔

ذرائع کا کہنا ہے کہ مجموعی کام کا 80 فیصد مکمل کیا جا چکا ہے، آبپارہ چوک سے لے کر پورے کشمیر ہائی وے اور مرکزی شاہراہوں پر کیمروں کی تنصیب کا کام مکمل ہو چکا ہے، ان کیمروں کی تنصیب سے پورا اسلام آباد شہر اور مضافات کی شاہراہوں پر ہونے والے جرائم مرکزی کنٹرول روم میں مانیٹرکیے جا سکیںگے جس پر متعلقہ تھانے کی پولیس کو فوری الرٹ کرکے ملزمان کو قانون کی گرفت میں لیا جا سکے گا۔