مرد نہ دیکھیں

ہم اپنے گھر کے جو چیلنج ایک دن میں حل کرلیتے ہیں وہ ڈراموں میں کئی قسطوں تک برقرار رہتے ہیں۔

سہیل یوسف April 13, 2015

اگر اس صورتحال میں نئے تجربے کیے جائیں تو تازہ ہوا کا جھونکا ثابت ہوں گے اور بارش کا پہلا قطرہ بھی۔

جی ہاں! یہ ذکر ہے آج کل مختلف چینلز پر چلنے والے پاکستانی ڈراموں کا جنہیں ڈرامہ کے بجائے 'ڈرامی' کہنا ذیادہ بہتر ہوگا کیونکہ تکلیف دہ حقیقت یہ ہے کہ اب وہ صرف خواتین کے لیے بنائے جارہے ہیں۔

اکثر ڈراموں کے نام بھی زنانہ ہیں مثلاً میں 'کوئلہ ہوگئی'، 'کاش میں تیری بیٹی نہ ہوتی' (توکیا پھوپھو کی ہوتی؟)، 'عفت'، 'مریم'، 'کہانی مناحل کی'، 'بڑی آپا'، 'ادھوری عورت'، 'ڈھائی دن کی عورت'، 'من چلی'، 'ملکہ عالیہ'، 'ناجیہ'، 'سمدھن'، 'بلقیس کور'، 'درِشہوار'، 'دوسری بیوی'، 'کنیز'، 'برنس روڈ کی نیلوفر'، 'بہنیں ایسی بھی ہوتی ہیں' اور ویسی ہوتی ہیں وغیرہ وغیرہ۔

اس کے بعد ڈرامہ مزید خود غرضی تک چلا گیا جو ان کے نام سے ظاہر ہے مثلاً میں 'میں بشریٰ'، 'میری ماں'، 'میری بیٹی'، 'میری عنایہ'، ' سسرال میرا' اور شاید اب ان ناموں سے بھی ڈرامے بنیں مثلاً 'میرا بٹوہ'، 'میری نند'، 'میری چپل'، 'میں اور صرف میں'۔

دوسری جانب ڈرامے کا کینوس سکڑ کر چار پانچ کرداروں تک محدود ہوگیا ہے جس میں گھسی پٹی گھریلو کہانیوں کو تین کمروں میں فلمایا جاتا ہے اور کئی قسطوں تک پھیلایا جاتا ہے۔ ان ڈراموں کے 80 فیصد مناظر میں کیمرہ عورتوں پر ہوتا اور مرد کا کردار بہت معمولی ہوتا ہے (شاید اگلے دنوں میں مرد کا کردار بھی خواتین ہی کریں گی)۔

پہلے خواتین سوچتی تھیں کہ کاش وہ مرد ہوتیں تو اُن کی بھی عزت کی جاتی مگر آج کل کے ڈرامے دیکھنے کے بعد اب مرد سوچتے ہیں کاش کہ وہ عورت ہوتے!
— Fahim Patel (@patelfahim) April 11, 2015

آجکل کل کے ڈراموں میں جتنا مظلوم خواتین کو دکھایا جاتا ہے مرد اتنا ظالم نہیں۔ یہ نا انصافی ہے ۔
— Umair Dabeer (محــــــمد عـــــــمیر دبیــــــر) (@UmairDabeer) April 11, 2015

ان سیریلز میں مجموعی طور پر 10 سے 20 اداکار اور اداکارائیں 50 یا 60 ڈراموں میں کام کررہی ہیں جبکہ بعض چہرے تو ٹی وی بند کرنے کے بعد بھی نظر آتے رہتے ہیں۔ دو فنکارائیں ایک ڈرامے میں بہنیں ہیں، دوسرے میں ساس بہو ہیں، تیسرے میں بھابھی اور نند ہیں اور مجال ہے کہ ایک سے دوسرے ڈرامے کی ایکٹنگ میں کوئی فرق آجائے!

اب ذرا غور کیجئے کہ ماضی کے ڈرامے کتنے گہرے اور وسیع تھے جن میں معاشرے کا ہر فرد دکھائی دیتا تھا۔ ان ڈراموں کو یاد کیجئے تو 'آسمان تک دیوار'، 'ہوائیں'، 'جنگل'، 'وقت'، 'خدا کی بستی'، 'سورج کے ساتھ ساتھ'، 'وارث'، 'پیاس'، 'الاؤ'، 'اندھیرا اجالا'، 'پسِ آئینہ'، 'چاند گرہن'، 'دھواں' اور 'دھوپ کنارے' وغیرہ سمیت کتنے نام ذہن میں آتے ہیں۔ منڈی میں مزدوروں کا نوحہ تھا، جانگلوس میں معاشرے کا استحصال نظر آیا، ڈرامہ 'پناہ' میں سابقہ سوویت یونین اور افغان زندگی دکھائی گئی، 'دھواں' میں منشیات کی تباہیوں کا ذکر تھا اور 'کارواں' میں تھر کی زندگی کے رنگ بھرے تھے۔ ان کے لکھنے والے معاشرے پر کتنی گہری نظر رکھتے تھے اور اداکار کردار میں ڈھلنے کے لیے کس قدر محنت کیا کرتے تھے۔ مختصر یہ کہ آج کے ڈرامے میں مچھیرے، کسان، مزدور، استحصالی طبقہ، ظالم ومظلوم کیوں نظر نہیں آرہے؟

ایک وقت تھا جب ڈراموں میں توازن تھا صرف خواتین کی مظلومیت پر کہانی اور قسطیں نہیں بنائی جاتی تھیں۔
— Sayeda Hira Ali (@SayedaHiraAli) April 11, 2015

آج کل کے ڈرامے دیکھ کر ایسا محسوس ہوتا ہے کہ شاید کچھ عرصے بعد مرد حضرات کا اس معاشرے میں وہی مقام ہو گا جیسا جنگل میں گیڈر کا ہوتا ہے۔
— SaeedAbbasi (@saeedabbasii) April 11, 2015

چلیے، ٹھیک ہے کہ آج زمانہ بدل چکا ہے اور خواتین ہی ڈراموں کی اصل ناظرین ہیں لیکن معاشرے کے باقی مسائل کہاں ہیں؟ دہشتگردی، معاشرتی برائیاں، نوجوانوں کے مسائل، بچوں کی تفریح، بیروزگاری، تاریخی واقعات اور ملکی چیلنج پر کیوں نہیں لکھا جاتا؟ اگر ڈراموں کا مرکز ایک عورت ہے تو پھر پنڈت اللہ بخش پر ڈرامہ کیوں نہیں لکھا جاتا جنہوں نے آزادی کے بعد ایک ہندو کا روپ دھار کر سکھوں کی جانب سے اغواء کی جانے والی کئی پاکستانی خواتین کو وطن واپس لانے کا بندوبست کیا اور اپنی جان خطرے میں ڈالی۔ یا سوات کی بہادر خاتون مسرت زیب پر کوئی کہانی کیوں نہیں بناتا جنہوں نے کئی خواتین کو طالبان کے چنگل سے چھڑایا۔ کرداروں میں پاکستان کی عظیم اور باہمت خواتین کو کیوں نہیں دکھایا جاتا اور ہمارے ڈرامے کی خاتون ہمیشہ روتی کیوں رہتی ہے؟

کچھ دنوں پہلے کراچی لٹریچر فیسٹیول میں ہدایت کارہ ساحرہ کاظمی اور اداکار خالد انعم نے کہا تھا کہ اتنے سارے ٹی وی چینلز ہونے کے باوجود ورائٹی نہیں ہے۔ انہوں نے ٹی وی چینلزکو آفر دی کہ وہ ایک گھنٹہ بچوں کے پروگرام یا ڈرامے کرنا چاہتے ہیں کوئی چینل انہیں جگہ دے لیکن کروڑوں بچوں کی تربیت و تفریح کی کس کو فکر یہاں تو سب ایک سمت میں بھاگ رہے ہیں۔

آج کے پاکستانی ڈراموں میں مرد کو کائنات کی بدترین مخلوق دکھایا جاتا ہے جس میں کوئی اچھائی نہیں۔ وہ ہوس کا مارا ہے جس کا محور صرف اور صرف عورت اور زندگی کا پہلا مقصد شادی، دوسرا مقصد دوسری شادی اور تیسرا مقصد افیئر ہے۔ میں نے ایسے ہزاروں پڑھے لکھے نوجوان دیکھے ہیں جو اپنی محدود آمدنی سے گھر چلاتے ہیں، زندگی کی دوڑ دھوپ میں دو دو ملازمتیں کرتے ہیں، چھٹی میں بچوں کو باہر لے جاتے ہیں، اچھی ملازمتوں کے لیے سی وی بھیجتے رہتے ہیں، بیوی کا خیال رکھتے ہیں، دفتر سے گھریلو خرچ کے لیے قرض لے کر مہینوں تنخواہ کٹواتے ہیں اور جوائنٹ فیملی کو متوازن رکھنے کی کوشش کرتے ہیں۔ لیکن ساس، بہو کے بیچ پھنس کر اپنی ماں اور بیوی کے درمیان کچلے جاتے ہیں۔ خواتین یہ کیوں نہیں سمجھتیں کہ وہ مرد کے جذبات کا محور یا ایموشنل جنریٹر ہیں اور کوئی اس پر ڈرامہ کیوں نہیں بناتا۔ افسوس! ان ڈراموں نے مرد و عورت کے خوبصورت رشتے کو سمجھنے اور بڑھانے کے بجائے مرد و عورت کو ایک دوسرے کے مقابل لاکھڑا کیا ہے۔

Why drama these days are typical? Portraying woman a villain n cause of every thing? #PkDrama
— Salaar Sulayman (@salaarsulayman) April 11, 2015

پھر ان ڈراموں میں حقیقت سے دوری اور مسائل کو بڑا کرکے دکھانا بھی شامل ہے۔ ہم اپنے گھر کے جو چیلنج ایک دن میں حل کرلیتے ہیں وہ ڈراموں میں کئی قسطوں تک برقرار رہتے ہیں۔ دوسری جانب اسٹار ڈراموں سے ایک وبا آئی ہے جسے ہم جھوٹ ہی کہیں گے مثلاً ایک پاکستانی ڈرامے میں ایک خاتون پالتو کتوں کو آدم خور بنانے کے لیے روزانہ انسانی گوشت کھلاتی نظر آتی ہیں۔ پورا ڈرامہ ختم ہوگیا لیکن یہ پتہ نہیں چلا کہ وہ انسانی گوشت کہاں سے لائیں یا کس دوکان سے خریدتی تھیں۔ ایک اور ڈرامے میں ایک بہن کی جگہ دوسری کو نکاح کے لیے بٹھادیا جاتا ہے اور کسی کو شک بھی نہیں ہوتا۔ شاید نکاح کے وقت شناختی کارڈ بھی نہیں دیکھا گیا تھا۔

بھارتی ڈراموں میں ایسی ایبنارمل صورتحال عام دیکھی جاتی تھی مثلاً ایک زمانے میں لفظ 'ک' سے شروع ہونے والے ڈرامے بڑے مقبول تھے اور ان میں ایک ڈرامہ 'کُم کُم' تھا جس کی ہیروئن ایک بڑی دماغی سرجری کے اگلے دن آئینے کے سامنے اپنے لمبے بال سنوارتی نظر آتی ہیں۔ کاف سے شروع ہونے والے ان کے دیگر ڈراموں میں 'کیونکہ ساس بھی کبھی بہو تھی'، 'کبھی سوتن کبھی سہیلی'، 'کہانی گھر گھر کی' ، 'کسوٹی زندگی کی' پاکستان میں مقبول رہے اور اگر یہ سلسلہ جاری رہتا تو آج 'کبھی کچھ کچھوے کبوتر تھے' کے نام سے بھی ایک ڈرامہ دیکھنے کو ملتا!

ڈرامے اور مظلوم خواتین دو الگ الگ کہانیاں ہیں
— Nadia Arshad (@naya_190) April 11, 2015

لیکن یہ نہیں کہ سارے ڈرامے یکسانیت کے شکار ہیں بلکہ موضوعات کی یکسانیت انہیں بوجھل بنارہی ہیں۔ اگر اس صورتحال میں نئے تجربے کیے جائیں تو تازہ ہوا کا جھونکا ثابت ہوں گے اور بارش کا پہلا قطرہ بھی۔ ناظرین کی فکر نہ کیجئے کہ وہ موجود ہے اور تبدیلی چاہتی ہے ایک قدم آگے بڑھانے اور زندگی کے ذرا اور قریب آنے کی دیر ہے۔

[poll id="351"]

نوٹ: ایکسپریس نیوز اور اس کی پالیسی کا اس بلاگر کے خیالات سے متفق ہونا ضروری نہیں ہے۔

اگر آپ بھی ہمارے لیے اردو بلاگ لکھنا چاہتے ہیں تو قلم اٹھائیے اور 500 سے 800 الفاظ پر مشتمل تحریر اپنی تصویر، مکمل نام، فون نمبر ، فیس بک اور ٹویٹر آئی ڈیز اوراپنے مختصر مگر جامع تعارف کے ساتھ [email protected] پر ای میل کریں۔ بلاگ کے ساتھ تصاویر اورویڈیو لنکس بھی بھیجے جاسکتے ہیں۔