عمران خان کی زندگی پر مبنی فلم کپتانکے مرکزی کرداروں کو قتل کی دھمکیاں

عبدالمنان بٹ کے مطابق دھمکی آمیز پیغامات " ویل وشر"کے آئی ڈی سے دیئے جارہے ہیں

Asad Kharal October 08, 2012

عمران خان کا کردار ادا کرنے والے عبدالمنان بٹ اور جمائمہ خان کا کردار ادا کرنے والی سعیدہ امتیاز کو فلم میں کام بند نہ کرنے پر قتل کی دھمکیاں دی جارہی ہیں، فوٹو : پبلیسٹی

VIENNA: عمران خان کی زندگی پر بنائی جانے والی فلم "کپتان"کے مرکزی کرداروں کو قتل سمیت سنگین نتائج کی دھمکیاں، اداکاروں نے ایف آئی اے سائبر کرائم سرکل سے رابطہ کرلیا۔

فلم میں عمران خان کا کردار ادا کرنے والے عبدالمنان بٹ اور جمائمہ خان کا کردار ادا کرنے والی سعیدہ امتیاز کا کہنا ہے کہ فلم میں کام بند نہ کرنے پر قتل کی دھمکیاں دی جارہی ہیں، عبدالمنان بٹ نے مزید کہا کہ دھمکی آمیز پیغامات " ویل وشر"کے آئی ڈی سے دیئے جارہے ہیں ۔

دھمکی دینے والے شخص نے سماجی ویب سائٹ پر پیغام میں کہا ہے کہ فلم ریلیز کی تو ملک میں بڑے پیمانے پر خون خرابہ ہوگا جبکہ اداکاروں نے عمران خان اور فلم کے ڈائریکٹر کوبھی دھمکیوں سے آگاہ کردیا ہے، ایف آئی اے سائبر کرائم سرکل نے دھمکی دینے والے ملزمان کی تلاش شروع کردی ہے ۔