سینئر طالبان کمانڈر عمر خالد خراسانی افغان فورسز کے آپریشن میں زخمی

عمرخالد خراسانی کو صوبہ ننگرہار میں نشانہ بنایاگیا جس میں دیگر 9ساتھی مارے گئے، احسان اللہ احسان

Tribune Correspondent/ February 08, 2015

عمر خالد خراسانی کو زخمی حالت میں محفوظ مقام پر منتقل کیا گیا جہاں اس کی حالت بتدریج بہتر ہورہی ہے، ترجمان جماعت الاحرار فوٹو : فائل

SUKKUR: سینئر طالبان کمانڈر اور کالعدم تحریک طالبان پاکستان کی ذیلی تنظیم جماعت الاحرار کے امیر عمر خالد خراسانی افغان اور اتحادی فورسز کے آپریشن میں زخمی ہوگیا۔

جماعت الاحرار کے ترجمان احسان اللہ احسان کے مطابق عمر خالد خراسانی کو افغان صوبے ننگرہار میں نشانہ بنایا گیا جس میں تنظیم کے 9 ساتھی مارے گئے جب کہ عمر خراسانی زخمی ہوا جسے محفوظ مقام پر منتقل کیا گیا جہاں اس کی حالت بتدریج بہتر ہورہی ہے۔

واضح رہے کہ عمر خالد خراسانی مہمند ایجنسی میں کالعدم تحریک طالبان کے امیر کے طور پر فرائض انجام دے چکا ہے تاہم گزشتہ سال طالبان شوریٰ نے عمر خراسانی اور دیگر کمانڈروں کو نیا گروپ بنانے کے باعث تنظیم سے نکال دیا تھا۔