ن لیگ کو 21ویں ترمیم کی منظوری کیلئے سینیٹ میں مشکلات

سینیٹ میں اس وقت پیپلز پارٹی اور اسکے اتحادیوں کی اکثریت ہے، آئندہ سال حکمراں جماعت کو اکثریت مل جائیگی

تنویر محمود راجہ December 29, 2014

اکثریت نہ ہونے کے باعث اہم بل زیرالتوا، آنکھیں بند کرکے فیصلہ نہیں کرینگے،حاجی عدیل۔ فوٹو: فائل

آئندہ سال مارچ میں ہونے والے سینیٹ انتخابات تک اہم قانون سازی کو موخر رکھنے والی ن لیگ کو 21 ویں آئینی ترمیم کی منظوری کیلئے سینیٹ میں مشکلات پیش آسکتی ہیں۔

پیپلزپارٹی، عوامی نیشنل پارٹی، متحدہ سمیت بعض جماعتوں کا خیال ہے کہ دہشت گردی کے مقدمات کوجلد نمٹانے کے لئے ملک میں فوجی عدالتوں کے قیام سے متعلق جلدبازی میں فیصلہ کرنے کے بجائے سینیٹ میں اس معاملے پر تفصیلی بحث کی جائے۔

سینیٹ میں اس وقت پیپلزپارٹی اور اس کی اتحادی جماعتوں کی اکثریت ہے اورآئندہ سال مارچ میں سینیٹ انتخابات کے بعد حکمراں جماعت کواکثریت حاصل ہوجائے گی۔ یہی وجہ ہے کہ (ن) لیگ کی طرف سے اب تک صرف 3 بل سینیٹ میں بھیجے گئے جب کہ اس وقت بھی متعدد اہم بل تاحال زیرالتوا ہیں۔ ایکسپریس سے گفتگو کرتے ہوئے اے این پی کے سینیٹرحاجی عدیل نے کہاکہ ان کی جماعت آنکھیں بند کرکے اس ترمیم پرکوئی فیصلہ نہیں کرے گی۔