آیوڈین کی کمی… ماں اور بچے کی صحت و نشوونما کیلئے خطرے کی گھنٹی

خواتین بانجھ پن جبکہ بچے موت کا شکار ہوسکتے ہیں ۔۔۔۔

Khurram Mansoor Qazi October 12, 2014

خواتین بانجھ پن جبکہ بچے موت کا شکار ہوسکتے ہیں۔ فوٹو: فائل

آیوڈینکی کمی پاکستان میں عوامی صحت سے متعلق ایک سنجیدہ مسئلے کی صورت اختیار کر گئی ہے۔ اس کا اندازہ اس امر سے لگایا جا سکتا ہے کہ پاکستان کی آبادی کا 50 فیصد آیوڈین کی کمی کا شکار ہے۔

ماؤں میں آیوڈین کی کمی کی وجہ سے ہر سال تقریباً 2 ملین (20 لاکھ) بچے دماغی کمزوریوں کے ساتھ پیدا ہوتے ہیں جبکہ بقیہ آبادی میں سے 72فیصد بچے آیوڈین کی کمی کا شکار ہیں۔ان حالات کے پیشِ نظر '' دی نیٹ ورک'' نامی تنظیم نے عوام الناس میںآیوڈین کے بارے میں شعور پیدا کرنے کیلئے یونیسف کے تعاون سے "Advocating and promoting the consumption of iodized salt to combat iodine deficiency disorders" کے زیرعنوان ایک عوامی آگہی مہم کا آغاز کیا ہے۔آئیے دیکھتے ہیں کہ آیوڈین کی کمی ماں اور بچوں پر کیا منفی اثرات مرتب کرتی ہے۔

ماہرین کہتے ہیں کہ انسان کو زندگی بھر اپنے 'تھائی رائیڈ گلینڈز' کی نشونما کے لیے 'آیوڈین' کی ضرورت رہتی ہے۔ لیکن ماں بننے والی خاتون کے لیے آیوڈین اس لیے بہت ضروری ہے کہ رحم ِ مادر میں پلنے والے بچے کی ذہنی نشوونما کا دارومدار آیوڈین پر ہوتا ہے۔ مطالعاتی جائزے سے ظاہر ہوا ہے کہ ایسی مائیں جن میں دوران ِ حمل آیوڈین کی شرح کم ہوتی ہے، ان کے بچوں کی ذہنی استعداد اپنے ہمعصر ساتھیوں کی نسبت کم ہوتی ہے۔ یہ بچے اپنی کلاسوں میں املاء، گرامر اور دیگر امور میں دیگر بچوں کی طرح نتائج نہیں دے پاتے۔ تحقیق کے مطابق دوران ِ حمل آیوڈین کی کمی سے بچوں کی ذہنی نشوونما کو نقصان پہنچ سکتا ہے۔ تحقیق کے مطابق دوران ِ حمل چند چھوٹی چھوٹی چیزوں کو نظر انداز کرنے سے بڑے بڑے مسائل جنم لے سکتے ہیں اور بچوں پرمنفی اثرات ڈالتے ہیں۔

اقوام متحدہ کے عالمی ادارہ خوراک نے کہا ہے کہ آیوڈین کی کمی پاکستان کا سنگین مسئلہ ہے۔ صوبہ سرحد، آزاد کشمیر اور فاٹا کے اضلاع سب سے زیادہ آیوڈین کی کمی کا شکار ہیں جو تشویشناک ہے کیونکہ آیوڈین کی کمی گلہڑ، رسولی اور دیگر بیماریوں کا باعث بنتی ہے۔ اس تشویشناک صورتحال کے باعث عالمی ادارہ خوراک، مائیکرو نیوٹرینٹ ، یونیسف اور وزارت صحت مشترکہ طور پر شمالی علاقہ جات اور دیگر علاقوں میں اس مسئلہ کو روکنے اور اس کا حل نکالنے کیلئے سرگرم عمل ہیں۔ منصوبہ کی کامیابی کا انحصار اس بات پر ہے کہ ملک میں آیوڈینائزیشن کو فروغ دیا جائے اور ایسے طریقہ کار وضع کئے جائیں کہ یہ پروگرام زیادہ عرصہ تک جاری ر ہے۔

آیوڈین ملا نمک بنانے والے اداروں کی بھی تربیت کرنے کی ضرورت ہے تاکہ وہ اس قابل ہو سکیں کہ پوٹاشیم آیوڈیٹ اپنے ذرائع سے حاصل کر سکیں جبکہ محکمہ صحت کو آیوڈین ملے نمک کی فروخت اور تقسیم کے طریقہ کار کو بھی منصوبے کا حصہ بنانا چاہئے۔ پاکستان جیسے ترقی پذیر ملک کا ایک اہم مسئلہ غیر متوازن خوراک کا استعمال یا غذائیت کی کمی سے ہونے والے امراض ہیں جن میں آیوڈین کی کمی سے ہونے والے امراض سر فہرست ہیں ۔ پاکستان کے بہت سے علاقے خاص طور پر شمالی علاقہ جات دنیا بھر میں آیوڈین کی کمی سے ہونے والے امراض کی وجہ سے جانے جاتے ہیں۔

https://img.express.pk/media/images/Iodine/Iodine.webp

آیوڈین ایک اہم غذائی عنصر ہے۔ آیوڈین غدود میں جا کر اہم کیمیائی مرکبات بناتی ہے۔آیوڈین ایک ایساکیمیائی مادہ ہے جو تھائرائیڈ ہارمون کی کیمیائی ساخت کا ایک لازمی جز ہے۔ تھائرائیڈ انسان کے جسم کی گردن کے سامنے والے حصے میں تتلی کی شکل سے مشابہہ ایک اہم ترین گلینڈ ہے۔یہ گلینڈ دو ہارمونز، تھائروکسین (T4) اور ٹرائی آیڈوتھائرونین (T3) بناتا ہے۔ یہ دونوں ہارمون خون میں شامل ہونے کے بعد مخصوص اعضاء (جگر، دل، دماغ اور گردوں) کی کارکردگی میں اہم رول ادا کرتے ہیں۔

غذا چاہے نباتات سے حاصل کی جائے یا حیوانات سے، اس میں موجود آیوڈین کا انحصار اس بات پر ہوتا ہے کہ جس زمین میں وہ کاشت کئے جا رہے ہیں یا جس ماحول میں وہ پرورش پا رہے ہوتے ہیں اس میں آیوڈین کی کتنی مقدار موجود ہے۔ ایسی زمین جس میں آیوڈین کی کم مقدار موجود ہو اس پر اگنے والی فصلوں میں بھی آیوڈین کی کم مقدار موجود ہوتی ہے۔اس کے علاوہ آیوڈین کی کمی کا شکار زمین پر چگنے چرنے والے جانوروں میں بھی آیوڈین کی کمی ہو جاتی ہے۔

ہماری پوری زندگی کے لئے چائے کے چمچے سے بھی کم آیوڈین کی ضرورت ہوتی ہے۔ قدرتی طور پر آیوڈین کی ایک اچھی مقدار سمندری خوراک جیسے مچھلی،، جھینگے وغیرہ میںپائی جاتی ہے لیکن عام مشاہدے میں یہ بات دیکھنے میںآئی ہے کہ آج کل اس مہنگائی کے دور میں قدرتی آیوڈین کی حامل سبزیاں، مچھلی اور گوشت وغیرہ عام مطلوبہ مقدار میں نہیں کھائے جا سکتے لہٰذا آیوڈین کی کمی ایک یقینی امر ہے اور اس کی کمی سے مختلف عوارض پیدا ہو جاتے ہیں،جن میں گلے کا گلہڑ صاف نظر آتا ہے، لیکن نظر نہ آنے والے عوارض بہت خطر ناک ہیں۔

آج لاکھوں افراد ذہنی اور جسمانی عوارض کی پسماندگی کا شکار ہیں لیکن افسوس ہے کہ ان کو یہ بھی خبر نہیں ہے کہ ان کی یہ کیفیت آیو ڈین کی کمی کی وجہ سے ہوئی ہے۔ ایک بالغ فرد کو ہر روز 150 مائیکرو گرام آیوڈین کی ضرورت ہوتی ہے۔ دوسری طرف حاملہ ماؤں کو روزانہ 220 مائیکروگرام آیوڈین جبکہ دودھ پلانے والی ماؤں کو روزانہ 290 مائیکروگرام آیوڈین کی ضرورت ہوتی ہے۔ خوراک میں آیوڈین کا ایک بڑا ذریعہ دودھ ہے لیکن بہت سی مچھلیوں اور سبزیوں میں بھی آیوڈین پایا جاتا ہے۔ بازار میں 'آیوڈین ملا نمک' بھی بآسانی دستیاب ہے۔آیوڈین کی کمی درج ذیل نقائص پیدا کر سکتی ہے۔

٭ تھائرائیڈ گلینڈ کا سائز بڑھ جانا
٭ گلہڑ
٭ ذہانت میں بے حد کمی
٭ بانجھ پن
٭ حمل کا گرنا
٭ ہایپوتھائرائڈ ازم
٭ ماں کے شکم میں بچے کی موت
٭ بچے کا پیدائش سے ہی نابینا،گونگا،بہرا یا بدصورت ہونا
٭ دماغی نقائص
٭ عضلات اور نسوں کی کمزوری اورپیچیدگیاں

نمک سے اشیائے خورد و نوش نمکین اور خوش مزہ ہو جاتی ہیں۔ یہ وہ شے ہے جو دنیا کے ہر گوشے میں پائی جاتی ہے ۔ نمک انسانی جسم کے ہر محلول میں موجود ہے۔پیشاب ہو یا فضلہ، خون ہو یا مادہِ تولید یا جسم کا کوئی بھی خلیہ ہو،نمک اپنی موجودگی کا احساس دلاتا ہے۔ جس نمک کے بارے میںہم بات کر رہے ہیں اسے ڈاکٹری اصطلاح میں سوڈیم کلورائیڈ کہا جاتا ہے۔ یہ قدرتی ذرات کا ایک مخصوص مرکب ہے جو انسانی جسم کے ہر ایک خلیہ (Cell) میں پایا جاتا ہے۔

نمک اور پانی جسم کے خلیات کی زندگی کے لئے لازم و ملزوم ہیں۔ دونوں جسم کے سبھی خلیات کی مخصوص کارکردگی کیلئے اہم ترین اجزاء ہیں۔ اہم نمکیات میں کلورائیڈ، کاربونیٹ،سلفیٹ اور بائی کاربونیٹ قابل ذکر ہیں جو سوڈیم،پوٹاشیم،کیلشیم اور میگنیشیم کے ساتھ گھل مل کر جسم کیلئے کام کرتے ہیں۔ یہ مختلف قسم کے نمکیات جسم میں پانی اور خون کا توازن برقرار رکھنے کے علاوہ ایک مناسب تیزابی ماحول قائم رکھنے میں اہم کردار ادا کرتے ہیں۔ نمک بالخصوص دانتوں اور ہڈیوں کو لازمی غذائی اجزا سپلائی کرنے کیلئے ضروری ہے اور یہ عضلات و نسوں کی فعالیت کیلئے بھی لازمی ہے۔

آیوڈین بھی آکسیجن ، ہائیڈروجن اور آئرن کی طرح ایک ایسا قدرتی کیمیائی جز ہے جو کئی کیمیائی صورتوں میں دستیاب ہوتا ہے۔ سب سے اہم آیوڈین، آیوڈیٹ اور آیوڈائیڈ ہے۔ یہ سمندری پانی میں وافر مقدار میں موجود ہوتا ہے۔ زمین اور سادہ تازہ پانی میں اس کی مقدارنہ ہونے کے برابر ہوتی ہے۔ اونچے پہاڑوں،ان کے دامن اور سیلابی علاقوں میں اس کی کمی ہوتی ہے۔ایک سروے کے مطابق آیوڈین کی کمی 130ممالک میں صحت عامہ کا ایک اہم اور توجہ طلب مسئلہ ہے۔ ایک اندازے کے مطابق دنیا بھر میں740 ملین لوگ آیوڈین کی کمی کے شکار ہیں۔ کہا جاتا ہے کہ دنیا کی آبادی کے ایک تہائی حصہ کو آیوڈین کی کمی سے پیدا ہونے والے نقائص کا خطرہ لاحق ہے۔ گلہڑاور آیوڈین کی کمی سے پیدا ہونے والے دوسرے نقائص مثلاًذہنی کمزوری، نابیناپن،گونگا پن اور بہرا پن ہیں۔

آیوڈین کی ضروری مقدار اور اسے حاصل کرنے کے ذرائع

چونکہ تھائرائیڈ ہارمون صحت مند زندگی کیلئے لازمی ہے کئی بین الاقوامی گروپوں نے آیوڈین کی جو مقدار تعین کی ہے وہ عالمی ادارہ صحت یونیسیف اور آئی سی سی آئی ڈی ڈی جیسی تنظیموں سے میل کھاتی ہے۔ ایک فرد واحد کیلئے آیوڈین کی درج ذیل مقدار ضروری ہے۔

0 تا 7 سال تک...... 90 مائیکروگرام

7 تا 12 سال تک...... 120 مائیکروگرام

12 سال کے بعد...... 150 مائیکروگرام

حاملہ اور بچوں کو دودھ پلانے والی عورتوں میں ...... 6200 مائیکروگرام

آیوڈین کا کچھ حصہ اشیائے خورد و نوش سے ملتا ہے۔ سمندری غذائوں میں آیوڈین وافر مقدار میں موجود ہوتا ہے۔ تازہ پانی میں پائی جانے والی مچھلی سے ہمیں اس پانی میں پائے جانے والی آیوڈین کی مقدار کا پتہ چل سکتا ہے۔ دوسری غذائوں میں آیوڈین کی مقدار کا اندازہ اس بات سے لگایا جاسکتا ہے کہ وہ غذائیں کہاں سے حاصل کی گئی ہیں اور ان میں کیا کیا ملایاگیا ہے۔ اگر کسی زمین میں آیوڈین موجود نہیں ہے تو اس زمین میں اُگنے والے پودوں میں بھی آیوڈین کی کمی ہوگی ۔دودھ اور دودھ سے بنی اشیائے خوردنی میں آیوڈین موجود ہوتا ہے بشرطیکہ دودھ دینے والے جانور کو غذائی صورت میں آیوڈین ملتا رہا ہو۔

آیوڈائز ڈسالٹ یعنی وہ نمک جس میں آیوڈین ملایاگیا ہو، ایک خصوصی نمک ہے جو آیوڈین کی کمی پورا کرنے کیلئے استعمال کیا جاتا ہے۔ جو نمک عام طور استعمال کیا جاتا تھااس میں قدرتی طور پر آیوڈین نہیں ہوتا تھا، اس لئے عام نمک میں آیوڈین ملایاگیا تاکہ عام انسان اس کی کمی کے شکار نہ ہوں۔ آپ آیوڈین نمک یا بغیر آیوڈین نمک خرید سکتے ہیں لیکن دونوں کی قیمت تقریباً مساوی ہے۔

عمومی طور ہمیں یہ پتہ نہیں چل سکتا ہے کہ ہم کتنا آیوڈین لے رہے ہیں کیونکہ بازاری غذائوں میں اس کی نشاندہی نہیں کی جاتی ہے۔ درج ذیل نقاط کو بنیاد بنا کرآپ سرسری اندازہ لگا سکتے ہیں کہ آپ کتنا آیوڈین لے رہے ہیں۔ کیا آپ کے نمک میں آیوڈین ہے ۔ روزانہ کتنا نمک استعمال کرتے ہیں ٭ وٹامنز یا کوئی سپلیمنٹ لے رہے ہیں جس میں آیوڈین موجود ہے۔ آپ کی روز مرہ ڈائٹ کیا ہے۔ کیا آپ گوشت، دودھ، دودھ سے بنی اشیاء اور سمندری غذا کھاتے ہیں۔

آیوڈین کی کمی سے عورت کے شکم میں پروان چڑھتے ہوئے بچے اور پھر نوزائیدہ شیر خوار بچے کی صحت پر زبردست منفی اور خطرناک اثرات مرتب ہوتے ہیں۔ اگر ایک عورت کے جسم میں آیوڈین کی کمی ہو تو وہ بانجھ پن،اسقاطِ حمل اور حمل کی کئی پیچیدگیوں کا شکار ہوسکتی ہے۔ تھائرائیڈ ہارمون دماغ کی نشو و نما کیلئے انتہائی ضروری ہے۔

اگر نوزائیدہ بچہ آیوڈین کی کمی کا شکار ہوا ہو تو وہ ذہنی اور جسمانی طورپر کمزور ہوتا ہے، اس کا وزن بھی کم ہوتا ہے اور اس کی زندگی بھی خطرے میں پڑ سکتی ہے جبکہ بچہ پوری طرح ذہنی طور پر ناکارہ ہونے کے علاوہ بہرا، گونگا، نابینا،پست قامت، فالج زدہ ہونے کے علاوہ عضلات اور نسوں کی پیچیدگیوں کا شکار ہوسکتا ہے۔ان مضر اثرات کے علاوہ آیوڈین کی کمی سے سماجی ڈھانچے پر بھی منفی اثرات پڑتے ہیں، ایسے علاقے اقتصادی طور بھی پیچھے رہ جاتے ہیں۔

عام آبادی میں آیوڈین کی مقدار کا اندازہ پیشاب کی جانچ سے لگایا جاسکتا ہے۔کسی بھی ذریعہ سے جو آیوڈین آپ کے جسم میںپہنچتا ہے اس کا90فیصد پیشاب کے ذریعہ خارج ہوتا ہے اس لئے پیشاب کا تجزیہ، آیوڈین کی مقدار کا پتہ لگانے کا ایک اہم طریقہ ہے۔ الٹراسائونڈ مشین کے ذریعہ تھائرائیڈ گلینڈ کے سائز کا پتہ چلتا ہے او ریہ آیوڈین کی کمی کا پتہ لگانے کا ایک بہترین طریقہ ہے۔

آیوڈین کی کمی دور کرنے کیلئے اسے عام نمک کے ساتھ آسانی سے ملایا جاسکتا ہے کیونکہ ہر انسان نمک کا استعمال کرتا ہے۔ اب سوال یہ ہے کہ آپ کے گھر میں کونسا نمک استعمال ہورہا ہے، آپ ہر روز نمک استعمال کرتے ہیں لیکن کیاآپ نے کبھی سوچا ہے کہ آپ کے نمک میں آیوڈین ہے یا نہیں۔

آپ ذرا اپنی شریک حیات سے پوچھیں کہ وہ آپ کو کونسا نمک کھلا رہی ہے۔اگر اسے نہیں معلوم توآپ ذرا کشٹ کریں ،ایک آلو کو چھیل کر اس کے قتلے بنائیں اور پھر ایک قتلے پر چٹکی بھر نمک چھڑکیں۔ تھوڑی دیر انتظار کرنے کے بعد اگرآلو کے قتلے کا رنگ بینگنی ہو جائے توآپ کے نمک میں آیوڈین ہے اور اگرآلو کے قتلے کا رنگ نہیں بدلا توآپ بازار کا رخ کر یں، وہاں سے ''آیوڈین ملا نمک'' ( SALT IODISED) خرید کر لائیں اور کھانے پکانے میں یہی نمک استعمال کریں تاکہ آپ اورآپ کے اہل و عیال آیوڈین کی کمی کا شکار ہو کر عوارض میں مبتلا نہ ہوں۔