اسکوئڈ گیمز اسٹار جنگ ہویان نے ساتھی اداکار سے بریک اپ کرلیا

جنوبی کوریا کی معروف اداکارہ اور مشہور ویب سیریز اسکوئڈ گیمز کی اسٹار جنگ ہو یان اور اداکار لی ڈونگ ہوئی کے درمیان علیحدگی ہوگئی ہے۔

جنگ ہو یان کی ایجنسی، سی روم انٹرٹینمنٹ نے اس بات کی تصدیق کی ہے کہ دونوں اداکاروں نے خوش اسلوبی سے علیحدگی اختیار کرلی ہے تاہم دونوں میں دوستی برقرار رہے گی۔

جنگ ہو یان اور لی ڈونگ ہوئی نے 2016 میں اپنے تعلق کا اعتراف کیا تھا اور دونوں نے اپنی فنی مصروفیات کے دوران ایک دوسرے کی بھرپور حمایت بھی کی تھی اس جوڑی کو مداحوں کی جانب سے بھی بےحد پسند کیا گیا تھا۔

یاد رہے کہ جنگ ہو یان نے نیٹ فلکس سیریز ’اسکوئڈ گیم‘ کے ذریعے بین الاقوامی شہرت حاصل کی، جبکہ لی ڈونگ ہوئی نے بھی مختلف ڈراموں اور ویب سیریز، جیسے کہ ’کیسینو‘ میں بہترین اداکاری کا مظاہرہ کیا۔ وہ متعدد ورائٹی شوز میں بھی نظر آئے، جہاں انہوں نے اپنے تعلقات کے بارے میں کھلے عام بات کی۔

اگست 2024 میں ایک ٹی وی شو کے دوران لی ڈونگ ہوئی نے اپنی نئی گرل فرینڈ کے بارے میں بات کرتے ہوئے فخر سے بتایا کہ ’اسکوئڈ گیم‘ کی مرکزی اداکارہ سیبیاک ان کی گرل فرینڈ اور بہترین دوست ہیں۔ یہ بیان نشر ہونے کے بعد مداحوں کی توجہ کا مرکز بنا تھا تاہم اب اس بات کا باقاعدہ اعلان کیا گیا ہے کہ انکی سابقہ گرل فرینڈ جنگ ہویان نے ان سے راہیں جدا کرلی ہیں۔