بالی ووڈ کے مشہور اداکار آر مادھون، جو رواں سال "شیطان" میں اپنی زبردست اداکاری کے باعث تعریفیں حاصل کر چکے ہیں، ایک اور دلچسپ پروجیکٹ میں نظر آئیں گے۔
مادھون اور فاطمہ ثنا شیخ کی نئی فلم کا نام "آپ جیسا کوئی" رکھا گیا ہے، جو کہ پہلے "ٹھرکی" کے نام سے مشہور تھی۔
ذرائع کے مطابق، "آپ جیسا کوئی" کا عنوان فلم کی کہانی کے مطابق رکھا گیا ہے اور یہ 1980 کی کلاسک فلم "قربانی" کے مشہور گانے سے متاثر ہے۔ اس فلم میں مادھون کے ساتھ فاطمہ ثنا شیخ کے علاوہ نمیت داس اور کرن واہی بھی اہم کردار ادا کریں گے۔
فلم کی کہانی ایک ایسے آدمی کے گرد گھومتی ہے جو اپنی زندگی کے وسط 40 کی دہائی میں ڈیٹنگ ایپ کے ذریعے ایک نوجوان لڑکی سے ملتا ہے۔ فلم کی شوٹنگ ممبئی میں شروع ہوچکی ہے اور دسمبر میں کولکتہ میں اس کے مزید حصے فلمائے جائیں گے۔
یہ فلم ڈھرمٹک انٹرٹینمنٹ کے بینر تلے بن رہی ہے اور نیٹ فلکس پر ریلیز ہوگی۔ فلم کی ہدایتکاری ویویک سونی کر رہے ہیں، جن کی ایک اور فلم "چاند میرا دل" بھی جلد ریلیز ہونے والی ہے۔
آر مادھون، "آپ جیسا کوئی" کے ساتھ ساتھ "دے دے پیار دے 2" کی شوٹنگ بھی مکمل کر چکے ہیں، جس میں ان کے ساتھ اجے دیوگن نظر آئیں گے۔ دوسری طرف، فاطمہ ثنا شیخ جلد ہی انوراگ باسو کی فلم "میٹرو… ان دنوں" میں بھی جلوہ گر ہوں گی۔