بھارتی فلم انڈسٹری کے مداحوں کی بے تابی سے منتظر فلم ’پشپا 2: دی رول‘ کی شوٹنگ اپنے اختتام کی جانب بڑھ رہی ہے اور الو ارجن کی قیادت میں فلم کا کلائمیکس شوٹ جاری ہے، جبکہ ڈائریکٹر سکوکمار اور ان کی ٹیم 27 نومبر تک پروجیکٹ مکمل کرنے کے لیے دن رات محنت کر رہی ہے۔
ذرائع کے مطابق، پشپا 2 کی شوٹنگ کے 7 دن باقی ہیں، جس میں 2 دن کا ایک خاص گانا اور 5 دن کا کلائمیکس شامل ہے۔ اس دوران، الو ارجن خود شوٹنگ کے کلائمیکس کی نگرانی کر رہے ہیں۔
ڈائریکٹر سکوکمار اور Mythri مووی میکرز نے پوسٹ پروڈکشن کے مختلف مراحل کو تیزی سے مکمل کرنے کے لیے متعدد ٹیمیں مقرر کی ہیں۔ وی ایف ایکس، ایڈیٹنگ، اور بیک گراؤنڈ اسکور پر کام کرنے والی چار مختلف ٹیمیں فلم کو وقت پر مکمل کرنے کے لیے مصروف ہیں۔ ذرائع نے بتایا ہے کہ فلم کو 28 نومبر تک سنسر بورڈ کے حوالے کر دیا جائے گا، اور یہ 5 دسمبر کو سینما گھروں کی زینت بنے گی۔
اس فلم میں الو ارجن کے ساتھ رشمیکا مندانا اور فہد فاصل مرکزی کردار ادا کر رہے ہیں۔ تجارتی ماہرین کے مطابق، فلم ہندی بیلٹ میں ریکارڈ توڑ افتتاح کرے گی اور باکس آفس پر تہلکہ مچائے گی۔