ڈی چوک پلان مؤخر جماعت اسلامی کے اسلام آباد اور پنڈی میں تین مقامات پر دھرنے

ہمارے 1150 کارکنوں کو گرفتار کیا گیا، مری روڈ پنڈی، چونگی نمبر 26 اور زیرو پوائنٹ پر دھرنا ہوگا

Staff Reporter/Saleh Mughal/ July 26, 2024

جماعت اسلامی نے اسلام آباد اور پنڈی میں تین مقامات پر دھرنے دے دیے (فوٹو اسکرین گریپ)

جماعت اسلامی نے ڈی چوک سے کارکنان کی گرفتاریوں اور راستے بند ہونے کے باعث اسلام آباد اور راولپنڈی میں 3 مقامات پر دھرنا دے دیا۔

ایکسپریس نیوز کے مطابق جماعت اسلامی کے مہنگائی اور عوامی مسائل کے حل کے لیے ڈی چوک پر دھرنے کو روکنے کیلیے پولیس نے نقص امن کے خطرے کے پیش نظر ڈی چوک جانے والے تمام راستوں کو کنٹینر لگا کر بند کیا جبکہ متعدد کارکنان کو اسلام آباد سے گرفتار بھی کیا۔

دھرنے میں لوگوں کو پہنچنے سے روکنے کے لیے شہر کے داخلی راستوں پر بھی کنٹینرز لگا کر راستے بند کیے جبکہ شہر کی اہم شاہراہوں اور چوراہوں پر ٹریفک کے لیے صرف ایک لائن کھلی رکھی گئی جس کی وجہ سے سڑکوں پر گاڑیوں کی لمبی قطاریں لگیں اور شہریوں کو پریشانی کا سامنا کرنا پڑا۔

فیض آباد پر پولیس کی بھاری نفری کو تعینات کیا گیا جبکہ وہاں واٹر کینن اور آنسو گیس سے لیس پولیس کی نفری جبکہ قیدی وینز بھی پنہچائی گئیں۔

دھرنے کے شرکاء سے نمٹنے کے لیے آپریشنل پولیس کو پولیس لائنز سے 10 ہزار آنسو گیس کے شیل جاری کیے گئے جبکہ زیرو پوائنٹ پل کے نیچے دو لینز کھول کر باقی راستے کو کنٹینرز لگا کر بند کردیا گیا ہے، تین سرکاری اسپتالوں کے سربراہان کو شعبہ ایمرجنسی سوموار تک ہائی الرٹ رکھے کی ہدایت کی گئی ہے۔

حافظ نعیم کی قیادت میں قافلہ رکاوٹیں عبور کر کے اسلام آباد میں داخل

جماعت اسلامی پاکستان کے امیر حافظ نعیم الرحمان خیبرپختونخوا کے قافلے کے ساتھ چونگی نمبر 26 سے رکاوٹیں عبور کرتے ہوئے اسلام آباد میں داخل ہوئے۔ اس کے علاوہ بلوچستان کے رکن اسمبلی اور صوبائی امیر مولانا ہدایت الرحمن بلوچ گوادر سے اسلام آباد دھرنے میں شرکت کے لیے کارکنان کے ہمراہ پہنچ گئے۔

امیر جماعت اسلامی حافظ نعیم الرحمن کا 26 نمبر چونگی پر خطاب

حافظ نعیم نے خطاب میں کہا کہ ہم عوام کیلیے دھرنا دینے آئے ہیں، ہم پرامن آئینی جدوجہد کر رہے ہیں اور حکومت سے کہتے ہیں لوگوں کو تنگ مت کرو، یہ کنٹینر ہٹاؤ، سب لوگوں کو دھرنے میں شرکت کرنے دو، ہمارے راستے میں رکاوٹیں کھڑی نہ کی جائیں۔

انہوں نے کہا کہ حکومت فسطائیت پر اتر آئی ہے، یہ دھرنا کئی دھرنوں میں بدل سکتا ہے۔ امیر جماعت اسلامی نے کارکنان کو ہدایت کی کہ وہ پریشان نہ ہوں کیونکہ ہم یہاں رہنے کیلیے آئے ہیں، آپ سب اگلی کال کا انتظار کریں۔

امیر جماعت اسلامی پاکستان حافظ نعیم الرحمن اسلام آباد ایکسپریس وے دھرنے میں پہنچ گئے

امیر جماعت اسلامی حافظ نعیم الرحمان نے ایکسپریس وے پر دھرنے کے شرکا سے خطاب میں کہا کہ اربوں روپے کھائے جارہے ہیں، آئی پی پیز اس ملک کو کھا رہی ہیں، ہمارے دھرنے کا آغاز ہوچکا ہے۔ حکومت سے بس ایک ہی مطالبہ ہے عوام کو ریلیف دیں، آئی پی پیز کو بند کرنا ہوگا۔

انہوں نے کہا کہ احتجاج ہمارا آئینی حق ہے٫ ہمارے گرفتار کارکنان رہا کئے جائیں، حکومت ہمارا راستہ نا روکے ورنہ کراچی سے لے کر چترال تک دھرنے دیں گے۔

جماعت اسلامی کے کارکنان نے فیض آباد پر رکھے کنٹینرز کو اپنی مدد آپ کے تحت ہٹا کر راستہ کھولا جس کے بعد اسلام آباد سے پنڈی میں قافلہ داخل ہوا اور لیاقت باغ پر پڑاؤ ڈالا۔

اسلام آباد اور راولپنڈی میں تین مقامات پر دھرنا دینے کا اعلان

جماعت اسلامی نے کارکنان کی ڈی چوک پر گرفتاریوں گرفتاریوں اور رکاوٹیں کھڑی ہونے کی وجہ سے اسلام آباد میں تین مقامات پر دھرنا دینے کا فیصلہ کیا ہے۔ مرکزی ترجمان قیصر شریف نے بتایا کہ جماعت اسلامی نے تین مقامات پر دھرنے دینے کا فیصلہ کیا ہے، جس کے تحت مری روڈ راولپنڈی، زیرو پوائنٹ اور 26 نمبر چونگی پر دھرنا دیا جائے گا۔

انہوں نے بتایا کہ مری روڈ راولپنڈی پر دھرنے کی قیادت امیر العظیم، ڈاکٹر اسامہ رضی نائب امیر ، صوبائی اور ضلعی قیادت کرے گی جبکہ زیرو پوائنٹ اسلام آباد کے دھرنے کی قیادت حافظ نعیم الرحمان کریں گے جس میں نائب امیر لیاقت بلوچ ، میاں محمد اسلم ، صوبائی اور اسلام آباد کی قیادت شریک ہوگی۔

مزید پڑھیں: نئے الیکشن کی بات کرنے والا ایجنٹ ہوسکتا ہے ملک کا وفادار نہیں، حافظ نعیم

انہوں نے بتایا کہ تیسرا دھرنا 26 نمبر چونگی پر ہو گا، جس میں نائب امیر ڈاکٹر عطا الرحمن ، پروفیسر محمد ابراہیم اور صوبائی قیادت لیڈ کرے گی اور آئی پی پیز، تنخواہ دار طبقے پر ٹیکسوں کے بوجھ سمیت دیگر مطالبات کی منظوری تک تینوں مقامات پر دھرنا جاری رہے گا۔

قیصر شریف نے کاہ کہ امیر جماعت اسلامی حافظ نعیم الرحمن کی ہدایت پر جہاں رکاوٹ ہو گی وہیں شرکا دھرنے پر بیٹھ جائیں گے، اب جماعت اسلامی کا ایک نہیں کئی دھرنے ہونگے۔

انہوں نے دعویٰ کیا کہ پولیس نے ہمارے 1150 کارکنان کو گرفتار کیاجبکہ درجنوں کو تشدد کا نشانہ بنایا ہے، عوام کی بڑی تعداد کو دھرنے میں دیکھ کر حکومت بوکلاہٹ کا شکار ہے اور فسطائیت پر اتر آئی ہے۔