بھارتی واویلے نے آئی سی سی کو تشویش کا شکار کر دیا

بھارت سے پوچھا جائے گا کہ ان کی ٹیم ایونٹ میں شرکت کیلیے پاکستان جائے گی یا نہیں

Saleem Khaliq July 14, 2024

(فوٹو: ویب ڈیسک ایکسپریس)

بھارتی واویلے نے آئی سی سی کو تشویش کا شکار کر دیا، چیمپئنز ٹرافی کیلیے بطور پلان بی ہائبرڈ ماڈل پر غور ہونے لگا۔

تفصیلات کے مطابق چیمپئنز ٹرافی کا انعقاد آئندہ برس 19 فروری سے 9 مارچ کے درمیان پاکستان میں ہونا ہے، ایونٹ میں دفاعی چیمپئن و میزبان سمیت افغانستان، آسٹریلیا، بنگلہ دیش، انگلینڈ، بھارت،نیوزی لینڈ اور جنوبی افریقہ کی ٹیمیں شریک ہوں گی، ہر بار کی طرح اب بھی بھارت نے سرحد پار جانے پر نخرے دکھانا شروع کر دیے ہیں، سابقہ طریقہ کار اپناتے ہوئے بی سی سی آئی آفیشلز خود کوئی بات نہیں کر رہے مگر اپنے میڈیا کے ذریعے کئی بار موقف پیش کر چکے۔

یہ بھی پڑھیں: چیمپئینز ٹرافی 2025 نہ کھیلنے نہ آنے کے بیچ بھارتی بورڈ کا بڑا بیان آ گیا

ذرائع کے مطابق بھارتی واویلے نے آئی سی سی کو بھی پریشان کر دیا اور پلان بی پر غور شروع کر دیا گیا ہے، 19 سے 22 جولائی تک کولمبو میں شیڈول سالانہ کانفرنس میں چیمپئنز ٹرافی پر بھی بات ہو گی، ایجنڈے میں پاکستان کے ساتھ کسی دوسرے ملک کو میزبان بنانے کے بجٹ کا بھی ذکر ہے،ذرائع نے بتایا کہ بھارت سے پوچھا جائے گا کہ ان کی ٹیم ایونٹ میں شرکت کیلیے پاکستان جائے گی یا نہیں۔

بی سی سی آئی حکومتی اجازت کی بات کرے گا، ایسے میں ہائبرڈ ماڈل کے تحت یو اے ای کو شریک میزبان بنانے کی تجویز پر بات ہو گی، بھارتی حکومت کبھی تحریری طور پر انکار یا فیصلے کی وجہ نہیں بتاتی، عالمی کونسل کو خدشہ ہے کہ اگر اختتامی مراحل میں بی سی سی آئی نے ٹیم بھیجنے سے منع کیا تو ایونٹ خراب ہو جائیگا،اس لیے پہلے ہی تیاری کر لی جائے۔

مزید پڑھیں: "چیمپینز ٹرافی؛ بھارتی ٹیم میچ کھیلنے پاکستان نہیں جائے گی"

ایشیا کپ میں بھی جب بھارت نے ٹیم پاکستان بھیجنے سے انکار کیا تو سری لنکا اور بنگلہ دیش کو بھی اپنے ساتھ ملا لیا تھا، اب بھی دولت کی طاقت سے دیگر بورڈز کی سپورٹ حاصل کر لی جائے گی،آئی سی سی میں ایک تجویز یہ بھی زیرغور آئی کہ صرف کراچی میں میچز رکھے جائیں کیونکہ وہاں سے ٹیموں کو دبئی آنے جانے میں آسانی ہوگی، مگر پاکستان کے ممکنہ ردعمل کی وجہ سے راولپنڈی اور لاہور کو بھی میزبان شہروں میں برقرار رکھا جائے گا،

پاکستان اور بھارت کو الگ گروپس میں رکھنے پر بھی بات ہوئی مگر پاکستان نے جو مجوزہ شیڈول ارسال کیا ہے اس میں روایتی حریف ٹیمیں بنگلہ دیش اور نیوزی لینڈ کے ساتھ گروپ اے کا حصہ ہیں، گروپ بی میں آسٹریلیا،افغانستان، انگلینڈ اور جنوبی افریقہ کو رکھا گیا ہے، ٹیموں کی آمدورفت کیلیے چارٹرڈ فلائٹس کا انتظام کیا جائے گا،

مزید پڑھیں: چیمپئینز ٹرافی 2025 میں شرکت؛ بھارت پھر آنکھیں دیکھانے لگا

ہائبرڈ ماڈل کی صورت میں اگر بھارت نے ایونٹ میں پیش قدمی جاری رکھی تو پاکستان ممکنہ طور پر ایک سیمی فائنل اور فائنل کی میزبانی سے بھی محروم ہو سکتا ہے،مجوزہ شیڈول کے مطابق19 فروری کو افتتاحی میچ نیشنل اسٹیڈیم کراچی اور 9 مارچ کو فائنل قذافی اسٹیڈیم لاہور میں ہونا ہے، کولمبو میں اگر معاملہ اتفاق رائے سے حل ہوگیا تو آئی سی سی چند روز بعد ایونٹ کا شیڈول جاری کر دے گی۔

دوسری جانب پی سی بی کسی ہائبرڈ ماڈل کے حق میں نہیں اور مکمل ایونٹ کی میزبان پاکستان میں کرنا چاہتا ہے، چیئرمین محسن نقوی کئی بار اس حوالے سے بات کر چکے ہیں، میزبان وینیوز کراچی، لاہور اور راولپنڈی کو اپ گریڈ کرنے کیلیے 12 ارب روپے سے زائد رقم مختص کی جا چکی، آئی سی سی میٹنگ میں پی سی بی کی جانب سے سخت موقف اپنائے جانے کا امکان ہے۔