کرکٹرز کی رہائش بورڈ نے قذافی اسٹیڈیم کے قریب عمارت ہی خرید لی

زمین کا اسٹرکچر فلیٹس کا ہے تاہم ہوٹل بنانے کے لیے تبدیلی کرنا ہوگی (فوٹو: فائل)

---

لاہور میں غیرملکی و ملکی کرکٹرز کی رہائش کا بڑا مسئلہ حل کرنے کی کوشش شروع ہوگئی۔

تفصیلات کے مطابق قذافی اسٹیڈیم کے بالکل قریب ایک کثیر المنزلہ عمارت تعمیر ہوئی، سیکیورٹی خدشات کے سبب پی سی بی نے اس پر اعتراض کیا۔ قانونی محاذ آرائی بھی ہوئی، اس دوران تعمیراتی کام رک گیا، بلڈر نے لوگوں سے فلیٹس کی رقوم بھی لی ہوئی تھیں، وہ پھنس جانے پر اس نے پی سی بی کو ہی عمارت خریدنے کی پیشکش کردی۔

ذکا اشرف کے حالیہ دور میں اس منصوبے پر پیش رفت ہوئی تھی، البتہ ذرائع کا کہنا ہے کہ اب پی سی بی نے باقاعدہ طور پر یہ عمارت 4 ارب روپے میں خرید لی ہے، اس کا اسٹرکچر فلیٹس کا ہے، ہوٹل بنانے کیلیے تعمیراتی کام کرنا پڑے گا۔

مزید پڑھیں: کھلاڑیوں کے ہوٹل کیلئے مجوزہ زمین ججز و جرنیلز کو دے دی گئی، نجم سیٹھی

 

منصوبے پر مزید خطیر رقم خرچ ہو گی، البتہ پایہ تکمیل تک پہنچنے کے بعد غیرملکی و ملکی کرکٹرز کی رہائش کا بڑا مسئلہ حل ہو جائے گا، ابھی ٹیمیں مقامی فائیو اسٹار ہوٹل میں قیام کرتی ہیں، جس پر پی سی بی کے کروڑوں روپے خرچ ہوجاتے ہیں،اسی کے ساتھ سیکیورٹی کیلیے ہوٹل سے اسٹیڈیم آمد پر سڑکیں بند کر دی جاتی ہیں جس سے عوام کو مشکلات کا سامنا کرنا پڑتا ہے۔

مزید پڑھیں: کراچی والے اسٹیڈیم کیوں نہیں آتے؟

 

 

قریب رہائش سے سب کو سہولت ہو جائے گی، ساتھ پیسہ بھی بچے گا، یاد رہے کہ نیشنل کرکٹ اکیڈمی میں بھی معیاری رہائشی سہولت موجود ہے تاہم کمروں کی تعداد اتنی زیادہ نہیں کہ ٹیمیں ایک ساتھ قیام کر سکیں۔ پی سی بی لاہور کے بعد کراچی میں بھی نیشنل اسٹیڈیم کے قریب ہوٹل بنانے کا ارادہ رکھتا ہے۔