راولپنڈی میں شہری پر تشدد کرنے والا پولیس افسر گرفتار مقدمہ درج
وارث خان تھانے میں تعینات اے ایس آئی شہزاد کے خلاف مقدمہ درج کرلیا گیا
راولپنڈی کے تھانہ وارث خان میں تعینات اے ایس آئی نے پتنگ بازی پر پکڑے جانے والے شہری کو بدترین تشدد کا نشانہ بنایا جس کی ویڈیو سامنے آنے پر سی پی او نے اُسے معطل کیا اور پھر مقدمہ درج کر کے اے ایس آئی کو گرفتار کرلیا گیا۔
تفصیلات کے مطابق راولپنڈی کے تھانے وارث خان میں پتنگ بازی پر پکڑے جانے والے نوجوانوں پر تھانیدار نے بدترین تشدد کیا۔ شہزاد نامی اے ایس آئی تشدد کے ساتھ نوجوان کو سنگین دھمکیاں بھی دیتا رہا۔
مزید پڑھیں: ٹیکسلا: خاتون پر تشدد کرنے والا پولیس افسر معطل
اے ایس آئی نے شہری کو دھمکی دی کہ 'تیرے خلاف میں خود کارروائی کروں گا'۔
شہری پر بدترین تشدد کی ویڈیو وائرل ہونے کے بعد سی پی او راولپنڈی خالد ہمدانی نے نوٹس لیکر ایس پی راول فیصل سلیم کو انکوائری کا حکم دیا، بعد ازاں اے ایس آئی کو معطل کر کے اُس کو حراست میں لے کر مقدمہ درج کرلیا گیا۔
سی پی او راولپنڈی کا کہنا تھا پولیس کی جانب سے بدسلوکی کسی صورت برداشت نہیں کی جائے گی ۔
واضح رہے کہ اس سے قبل ٹیکسلا میں اے ایس آئی امتیاز ناصر نے سرعام خاتون کو تشدد کا نشانہ بنایا تھا، جس کی ویڈیو سوشل میڈیا پر وائرل ہونے کے بعد سی پی او راولپنڈی نے تحقیقات کروائیں اور تین گھنٹے میں رپورٹ موصول ہونے پر اے ایس آئی کو معطل کردیا۔