پٹرولیم مصنوعات کی قیمتوں میں معمولی ردوبدل متوقع

پٹرول، کیروسین آئل کی قیمتوں میں ایک روپے تک کمی کاامکان ہے

Zafar Bhutta December 29, 2023

ہائی اسپیڈ ڈیزل اور لائٹ ڈیزل کی قیمتوں میں 2 روپے تک اضافہ ہو سکتا ۔ فوٹو: فائل

عالمی سطح پر برینٹ کی قیمتوں میں معمولی اضافے کے بعد نگران حکومت نئے سال کے پہلے ماہ جنوری 2024 کے پہلے ہاف میں پٹرولیم مصنوعات کی قیمتوں کو برقرار رکھ سکتی ہے۔

آئل انڈسٹری کے اندازوں کے مطابق پٹرول اور کیروسین آئل کی قیمتوں میں ایک روپے تک کمی ہو سکتی ہے جبکہ ہائی سپیڈ ڈیزل اور لائٹ ڈیزل کی قیمتوں میں 2 روپے تک اضافہ ہو سکتا ہے۔

او ایم سیز کے تخمینے ایکسچینج ریٹ اور موجودہ پٹرولیم لیوی اور جنرل سیل ٹیکس کی شرحوں میں صفر ایڈجسٹمنٹ پر مبنی ہیں۔حکومت پٹرول اور ایچ ایس ڈی پر 60 روپے فی لیٹر پی ایل اور جی ایس ٹی پر صفر کی شرح وصول کر رہی ہے۔

یہ بھی پڑھیں: یکم جنوری سے پٹرول کی قیمت میں معمولی کمی کا امکان

بین الاقوامی سطح پر برینٹ تیل کی قیمتیں 16 دسمبر 2023 سے 77.95 ڈالر سے 81.07 ڈالر فی بیرل کے درمیان رہیں۔ آخری جائزہ میں، حکومت نے ڈالر کے مقابلے میں 284.28 روپے کی شرح تبادلہ کا اطلاق کیا۔

خام تیل کی نقل و حمل کرنے والی تجارتی کمپنیوں نے یمن میں حوثی باغیوں کے ڈرون اور میزائل حملوں کے خطرے سے بچنے کے لیے بحیرہ احمر کے راستے کچھ ٹینکروں کو بھیجنا بند کر دیا۔

ماہرین کا کہنا ہے کہ تیل کے جہازوں کے ری روٹ سے سفر میں تاخیر اور اضافی اخراجات میں اضافہ ہوگا۔