پشاور میں تاریخی قائد اعظم ہاؤس کی تزئین و آرائش کا فیصلہ

نشترآباد میں واقع قائد اعظم ہاؤس کی دیواروں اورچھتوں کو پرانی طرز پر بحال کیا جائیگا

احتشام بشیر November 17, 2023

ڈپٹی کمشنرپشاور کی زیرصدارت پرانی عمارتوں کی بحالی سے متعلق اجلاس ہوا:فوٹو:ویب ڈیسک

پشاور میں تاریخی قائد اعظم ہاؤس کی تزئین اور آرائش اور بحالی کا فیصلہ کیا گیا ہے۔

کمشنر پشاور نے نشترآباد کے علاقے میں 1935 میں بننے والے قائدِاعظم ہاوس میں پرانے طرز کے ٹف ٹائلزاور چھتوں کی پرانی طرز پر دوبارہ تعمیر اور دیواروں پر قدیمی طرز کا پلستر کرنے کی ہدایت کی ہے۔

پشاور میں قدیم اور تاریخی عمارتوں کی صورتحال کا جائزہ لینے کے ڈپٹی کمشنر پشاور آفاق وزیر کی زیر صدارت اجلاس ہوا جس میں پشاور نشتر آباد میں قائم تاریخی قائد اعظم ہاؤس کی تزئین و آرائش اور تاریخی حیثیت کی بحالی کا فیصلہ کیا گیا۔ اجلاس میں قائد اعظم ہاؤس کے مالک کو بھی خصوصی طور پر مدعو کیا گیا تھا۔

خستہ حال قائد اعظم ہاوس کی تزئین و آرائش کی جائے گی اور پرانے طرز کے ٹف ٹائلزجبکہ چھتوں کی پرانی طرز پر دوبارہ تعمیر اور دیواروں پر قدیم طرز کا سرخ پلستر کیا جائے گا۔ پشاور ڈبگری میں قائم سکھوں کے تاریخی گوردوارہ کی تزئین و آرائش اور اس کی تاریخی حیثیت کی بحالی کا بھی فیصلہ کیا گیا ہے۔