ریلوے پولیس نے ڈاکٹری نسخے سے مسافر ڈھونڈ کر سونے سے بھرا پرس لوٹا دیا

ٹریس کرنے پر قیمتی پرس کو تصدیق کے بعد باحفاظت خاتون کے حقیقی بیٹے کے حوالے کیا گیا

---

ریلویز پولیس راولپنڈی ڈویژن نے ایمانداری اور فرض شناسی کا مظاہرہ کرتے ہوئے چکلالہ ریلوے اسٹیشن پر گم ہونے والا مسافر خاتون کا قیمتی پرس ڈھونڈ کر اسکے بیٹے کےحوالے کردیا۔

تفصیلات کے مطابق اسلام آباد کی رہائشی خاتون مسافر بشرٰی ٹرین 103 اپ میں سفر کرنے کے بعد ریلوے اسٹیشن چکلالہ اتری جہاں پر وہ اپنا قیمتی پرس جس میں 1 لاکھ 44 ہزار روپے، لاکھوں مالیت کی چار سونے کی انگوٹھیاں، اے ٹی ایم اور شناختی کارڈ موجود تھا بھول گئی تھی۔

چکلالہ ریلوے اسٹیشن پر تعینات ریلویز پولیس کے اے ایس آئی ادریس نے پرس کو اپنی تحویل میں لیکر پرس میں موجود ڈاکٹری نسخہ میں درج نمبر کے ذریعے مسافر خاتون کو ٹریس کیا۔

ٹریس کرنے پر قیمتی پرس کو تصدیق کے بعد باحفاظت خاتون کے حقیقی بیٹے کے حوالے کیا گیا۔قیمتی پرس کی باسلامت واپسی پر خاتون نے ریلویز پولیس کی ایمانداری اور قابلِ تحسین اقدام پر اسٹاف کا شکریہ ادا کیا۔