سویڈن میں قرآن پاک کی بے حرمتی مذاہب کو لڑانے کی سازش ایکسپریس فورم

ہمارے لیے قرآن پاک اور حضرت محمدؐ سے بڑھ کر کوئی ہستی نہیں ہے، مولانا عبدالخبیر آزاد

احسن کامرے/اجمل ستار ملک July 06, 2023

عید کے دن یہ دلخراش واقعہ سوچ سمجھ کر کیا،سویڈن حکومت کا خاموش رہنا افسوسناک، آرچ بشپ سباسٹین شا۔ فوٹو: ایکسپریس

سویڈن میں قرآن پاک کی بے حرمتی مذاہب کو آپس میں لڑانے کی سازش ہے، عالمی امن یقینی بنانے کیلیے اقوام متحدہ اور یورپی یونین، تمام مذاہب اور مقدسات کی توہین کے حوالے سے سخت قانون سازی کریں۔

اگر آزادی اظہار رائے کی آڑ میں سازش کرنے دی گئی تو سب کا نقصان ہوگا۔ قرآن کریم اور ناموس رسالتؐ کا تحفظ ہر مسلمان پر فرض ، اسلام ہماری ریڈ لائن ہے ، سویڈن کی عدالت اور حکومتی سرپرستی میں قرآن پاک کی جو بے حرمتی کی گئی آج پوری امت مسلمہ کا ہر فرد سراپا احتجاج ہے ان خیالات کا اظہار مختلف مذاہب کے رہنمائوں نے قرآن پاک کی بے حرمتی کے قبیح عمل کے حوالے سے منعقدہ ''ایکسپریس فورم'' میں کیا۔

چیئرمین مرکزی رویت ہلال کمیٹی پاکستان وخطیب امام بادشاہی مسجد لاہور مولانا سید محمد عبدالخبیر آزاد نے کہا سویڈن نے ایک بار پھر قرآن کریم کی بے حرمتی کر کے دو ارب مسلمانوں کے جذبات کو مجروح کیا ہے، ہم کسی کو بھی قطعاََ یہ اجازت نہیں دینگے کہ وہ قرآن کریم یاہمارے نبی کریم ؐکی توہین کرے ، قرآن پاک اور نبی حضرت محمدؐ سے بڑھ کر ہمارے لیے کوئی ہستی نہیں ہے،ہم ان پر مر مٹنا اپنے ایمان کا حصہ سمجھتے ہیں۔

آرچ بشپ سباسٹین شا نے کہا مسیحی برادری قرآن پاک کی بے حرمتی کی پر زور مذمت کرتی ہے ، اقوام متحدہ اور یورپی یونین سے مطالبہ کرتی ہے اس معلون کے خلاف سخت کارروائی کی جائے، اسے سرعام سزا دے کر نشان عبرت بنایا جائے تاکہ آئندہ کوئی ایسی جسارت نہ کرے۔ عید کے دن یہ دلخراش واقعہ سوچ سمجھ کر کیا گیا ہیعالمی برادری سے ہمارا مطالبہ ہے کہ مذاہب اور مقدسات کی توہین کے حوالے سے قانون سازی کرے۔

سابق صدر گوردوارہ سکھ پربندھک کمیٹی سردار بشن سنگھ نے کہا قرآن پاک کی بے حرمتی پر پوری دنیا سراپا احتجاج ہے، پاکستان میں بسنے والے سکھ بھی اس عمل کی پرزور مذمت کرتے ہیں۔انہوں نے کہا کسی کو بھی یہ حق حاصل نہیں ہے کہ وہ کسی دوسرے مذہب ، مقدس مقام، مقدس کتاب، پیغمبر، پیر، اولیاء کی توہین کرے، اقوام متحدہ سے مطالبہ ہے تمام مذاہب کے مقدسات کا تقدس یقینی بنانے کیلئے قانون سازی کی جائے۔