ٹیکسٹائل برآمدات میں مسلسل آٹھویں ماہ بھی کمی کا رجحان

رواں مالی سال کے11ماہ میں ٹیکسٹائل برآمدات 14.7 فیصد کمی سے15.03 ارب ڈالر رہی

عثمان حنیف June 18, 2023

برآمدات میں کمی کی وجہ عالمی معاشی بحران اور ملک کے اندرونی حالات ہیں، عاصم حسن (فوٹو فائل)

ٹیکسٹائل سیکٹر کی برآمدات میں مسلسل آٹھویں ماہ بھی کمی کا رجحان رہا، جو صنعت کو درپیش مسائل کی نشاندہی کرتا ہے۔

اگرچہ مئی کے مہینے میں ٹیکسٹائل سیکٹر کی برآمدات میں مثبت رجحان رہا اور یہ 7 فیصد اضافے کے ساتھ 1.32 ارب ڈالر پر پہنچ گئی، لیکن سالانہ بنیادوں پر 20 فیصد تک کمی کا رجحان رہا۔

اے ایچ ایل ریسرچ کے مطابق مئی میں مثبت رجحان کے باجود رواں مالی سال کے گیارہ ماہ کے دوران مجموعی طور پر ٹیکسٹائل کی برآمدات میں 14.7 فیصد کی کمی کے ساتھ15.03 ارب ڈالر رہی ہے۔

ٹاپ لائن سیکیورٹیز کے تجزیہ کار نشید ملک کے مطابق ٹیکسٹائل ایکسپورٹ مسلسل آٹھ ماہ سے تنزلی کا شکار ہے، مئی کے مہینے میں ٹیکسٹائل ایکسپورٹس ماہانہ بنیادوں پر 7 فیصد اضافے کے ساتھ 1.32 ارب ڈالر رہی، جبکہ ویلیو ایڈڈ ٹیکسٹائل برآمدات بھی 3 فیصد اضافے کے ساتھ889 ملین ڈالر رہی۔

یہ بھی پڑھیں: تیل گیس کی پیداوار میں اضافہ، ٹیکسٹائل مصنوعات کی برآمدات میں کمی

تاہم، گزشتہ سال کے مئی سے موازنہ کریں تو ٹیکسٹائل برآمدات میں 20 فیصد کمی واقع ہوئی ہے، ویلیوایڈڈ مصنوعات میں21 فیصد اور بنیادی مصنوعات میں 19فیصد کمی ریکارڈ کی گئی ہے۔

رواں مالی سال کے گیارہ ماہ کے دوران ٹیکسٹائل کی مجموعی برآمدات سالانہ بنیادوں پر15 فیصد کمی کے ساتھ 15.03 ارب ڈالر رہی ہے، بنیادی مصنوعات میں22 فیصد جبکہ ویلیو ایڈڈ مصنوعات میں 13 فیصد کمی ریکارڈ کی گئی، اندازہ ہے کہ رواں مالی سال کے اختتام تک ٹیکسٹائل برآمدات 16 فیصد کمی کے ساتھ 16سے16.5 ارب ڈالر رہیں گی۔

انسائٹ ریسرچ کے تجزیہ کار عاصم حسن کا کہنا ہے کہ ٹیکسٹائل کی برآمدات میں کمی کی وجہ عالمی معاشی بحران اور ملک کے اندرونی حالات بھی ہیں۔