انٹیلی جنس ڈائریکٹوریٹ ریپڈ فورس کے قیام کی منظوری جدیدآلات صوبوں کے حوالے

خطرناک ملزموں کوکیفرکردارتک پہنچانے کیلیے تحفظ پاکستان آرڈیننس سے فائدہ اٹھایاجائے،نوازشریف

فیاض ولانہ March 19, 2014

خطرناک ملزموں کوکیفرکردارتک پہنچانے کیلیے تحفظ پاکستان آرڈیننس سے فائدہ اٹھایاجائے،نوازشریف فوٹو: فائل

وزیراعظم نوازشریف نے ملک میں امن وامان کی صورتحال بہتربنانے کیلیے انسداددہشتگردی کے قومی ادارے ' نیکٹا' کے ماتحت نیشنل انٹیلیجنس ڈائریکٹوریٹ اورقومی،صوبائی سطح پرریپڈ رسپانس فورسزکے جلدقیام کی منظوری دے دی ہے۔

منگل کو اعلیٰ سطح کے اجلاس میں انھوں نے صوبوں کواس مقصدکیلیے وفاق کی جانب سے فنڈزکی فراہمی کی یقین دہانی بھی کرائی۔ اجلاس میں چاروںوزرائے اعلیٰ ،آرمی چیف جنرل راحیل شریف، وفاقی وزیرداخلہ چوہدری نثار،وزیرسائنس وٹیکنالوجی زاہد حامداورڈی جی آئی ایس آئی بھی موجودتھے۔وزیراعظم نوازشریف کومحکمہ شہری دفاع کی جانب سے صوبوں کے حوالے کیے جانے والے انسداددہشت گردی آلات کے بارے میں تفصیلی بریفنگ دی گئی اوربتایا گیا کہ آئندہ 2ماہ تک 4 روبوٹ بھی حکومت کومل جائیں گے۔ وزیراعظم نے خود چاروںوزرائے اعلیٰ کوبم ڈسپوزل وہیکل کے کاغذات اورچابیاں حوالے کیں جبکہ دیگرآلات میںبم ڈسپوزل سوٹ،رات کودیکھنے والے آلات،جامرز،بم ناکام بنانے کیلئے خصوصی طورپرباہرسے منگوائے گئے ڈرم بھی شامل ہیں۔ ذرائع نے بتایا کہ اجلاس میںخفیہ اداروںمیں انٹلی جنس شیئرنگ کا معاملہ تونیشنل جوائنٹ انٹلی جنس ڈائریکٹوریٹ کے نام سے نیا ادارہ بنا کرحل کرلیا گیا مگراس کا کنٹرول اورسربراہی عسکری قیادت کے پاس رہے گی یا سول قیادت کے ہاتھوںمیں، اس کا فیصلہ بعدمیں کیا جائیگا۔

چاروںصوبوں،وفاق اورفوجی قیادت نے نئی داخلی پالیسی پرمکمل اتفاق رائے کا اظہارکیا۔وزیراعظم نے تحفظ پاکستان آرڈیننس کے حوالے سے بعض سیاسی رہنماؤں اورصوبوں کے اعتراضات کا ہنگامی بنیادوں پرجائزہ لینے کیلئے وفاقی وزیرزاہدحامدکوہدایات جاری کیں۔ انہوں نے دوران اجلاس میں وزرائے اعلیٰ کوکہا کہ سنگین جرائم میں ملوث ملزموں کوجلدکیفرکردارتک پہنچانے کیلیے تحفظ پاکستان آرڈیننس میں دی گئی سہولت سے فائدہ اٹھایا جائے کیونکہ اس میںوڈیولنک کے ذریعے شہادتوں کوقابل قبول بنائے جانے کی سہولت دی گئی ہے۔ عدالتوں اورعدالتی کارروائی کودوسرے صوبوں میں بھی منتقل کیا جاسکتا ہے۔ دہشت گردی کے خلاف عملی اقدامات کا وقت آگیا ہے۔ وزیراعظم نے کہا کہ پاکستان کی اقتصادی ترقی ملک میں سیکیورٹی اورامن وامان سے جڑی ہوئی ہے۔ تمام صوبوں کواس سلسلے میں بھرپورکردارادا کرنا ہوگا۔ اس موقع پرصوبائی سطح پرریپڈ رسپانس فورسزکے قیام کیلیے وزیراعظم نے بم ناکارہ بنانیوالے جدیدآلات سے لیس جدید گاڑیاں چاروں وزرائے اعلیٰ کے حوالے کیں۔ مجموعی طور پر 65 جدید گاڑیاںصوبوں کودی جائیں گی۔

اجلاس کے بعد وفاقی وزیر داخلہ چوہدری نثارنے میڈیا کوبتایاکہ چاروں صوبوں،وفاق اورفوجی قیادت نے نئی قومی سلامتی کی داخلی پالیسی پرمکمل اتفاق رائے کا اظہارکیا ہے۔ صوبوں کووفاق کی جانب سے بم ناکارہ بنانے کیلیے دیے گئے جدیدآلات سے پولیس کی استعدادکارمیں اضافہ ہوگا اورانسانی جانوں کے ضیاع کے امکانات نہیں ہونگے۔ اجلاس4 گھنٹ ے جاری رہا جس میں فیصلہ کیا گیا کہ اس پالیسی پرغورکے حوالے سے مزیداجلاس ہونگے تاہم پالیسی پرتمام شرکا میں مکمل اتفاق رائے پایا گیا۔ پالیسی پرعملدرآمدکیلیے ٹائم فریم پربھی غورکیا گیا۔ خفیہ معلومات کا صوبوں،سول آرمڈ فورسزکے ساتھ تبادلہ کیا جائیگا۔ آئندہ چندماہ میں ایسا نظام لائیں گے کہ اپنے آپ کوزیادہ محفوظ تصور کرسکیں۔ انھوں نے ایک سوال پرکہا کہ اجلاس میں طالبان سے مذاکرات کے حوالے سے تازہ ترین صورتحال پربھی بریفنگ دی گئی۔ بی بی سی نے بتایا کہ اجلاس کے دوران نوازشریف نے آئین کے اندرطالبان سے مذاکرات کرنے کا عزم دہرایا اورمذاکرات میں پیشرفت پراطمینان کا اظہار کرتے ہوئے کہا کہ طالبان کومذاکرات کی مخالفت کرنے والے گروہوں سے خودنمٹنا چاہیے۔ایکسپریس نیوزنے بتایا کہ اجلاس میں وفاقی حکومت کی جانب سے پنجاب میں6 جیلوں کوہائی سیکیورٹی جیل قراردینے اوردہشت گردی کے مقدمات کیلیے اسلام آبادسمیت4 ریجنل ہیڈ کوارٹرزقائم کرنے کے معاملات پربھی تبادلہ خیال کیا گیا۔