اداکار منیب بٹ مولانا طارق جمیل کے حق میں بول پڑے

منیب بٹ نے ٹوئٹ میں کہا کہ مولانا مسلمانو ں کے دل میں رہتے ہیں(فائل فوٹو)

---

لاہور: پاکستان شوبز انڈسٹری کے معروف اداکار منیب بٹ نے مولانا طارق جمیل کے حق میں ردِعمل دے دیا۔

سوشل میڈیا پر ایک پوسٹ وائرل ہورہی ہے جس میں اکرام اللہ نامی ایک صارف کی جانب سے مولانا طارق جمیل کے حالیہ سیاسی بیان کے حوالے سے دعویٰ کیا گیا ہے کہ انہیں تبلیغی جماعت کی شوریٰ سے نکال دیا گیا ہے۔

صارف نے لکھا تھا کہ مولانا طارق جمیل کو تبلیغی جماعت کی شوریٰ سے نکال دیا گیا ہے اور موصوف پر تبلیغی جماعت کے اجتماعات میں ہر قسم کے درس و بیان پر پابندی لگا دی گئی ہے۔

مولانا طارق جمیل کو تبلیغی جماعت کے شوری سے نکالا گیا ہے
اور موصوف پر ہر قسم کے تبلیغی جماعت کی اجتماعات میں بیان کرنے پر پابندی ہے
انکے کسی بھی فعل اور قول کو تبلیغی جماعت کے ساتھ نہ جوڑا جائے
کیونکہ انکا تبلیغی جماعت سے خارجہ کیا گیا ہے

- Ikramullah Naseem (@realikramnasim) August 8, 2022

صارف کے مطابق تبلیغی جماعت کی جانب سے کہا گیا ہے کہ مولانا طارق جمیل کے کسی بھی فعل اور قول کو تبلیغی جماعت کے ساتھ نہ جوڑا جائے، کیوں کہ انہیں تبلیغی جماعت سے خارج کر دیا گیا ہے۔

اس پوسٹ پر اداکار منیب بٹ نے پاکستانی معروف اسلامک اسکالر مولانا طارق جمیل سے اظہارِ عقیدت کرتے ہوئے ردعمل دیا ، انہوں نے کہا کہ 'مولانا مسلمانوں کے دل میں ہیں، تبلیغی جماعت سے تو نکال دیا، دل سے کیسے نکالیں گے'۔

Maulana musalmano k dil me hain tablighi jamaat se tu nikaldiya dil se kaisey nikaleingey @realikramnasim https://t.co/I6TZJIjEBF

- Muneeb Butt (@muneeb_butt9) August 8, 2022

یاد رہے کہ حال ہی میں مولانا طارق جمیل نے ایک نجی میڈیا چینل پر انٹرویو کے دوران سابق وزیرِ اعظم، چیئرمین پی ٹی آئی عمران خان کے 'امریکی سازش' کے بیانیے کو سچ قرار دیتے ہوئے موجودہ حکومت پر کڑی تنقید کی تھی جس کے بعد سوشل میڈیا پر ایک نئی بحث چھڑ گئی۔

واضح رہے کہ تاحال مولانا طارق جمیل کی جانب سے تبلیغی جماعت کی شوریٰ سے نکالے جانے سے متعلق کوئی بیان سامنے نہیں آیا ۔