پاکستان پٹرولیم گروپ کا درآمدی بل نئی ریکارڈ سطح پر پہنچ گیا

مالی سال 2022 میں درآمدی بل کی مالیت 23 ارب 31 کروڑ ڈالر رہی، وفاقی ادارہ شماریات

Ehtisham Mufti July 23, 2022

2021 میں پٹرولیم مصنوعات کے درآمدی بل کی مالیت 11 ارب 35 کروڑ ڈالر تھی، رپورٹ (فوٹو فائل)

عالمی مارکیٹ میں خام تیل کی بڑھتی ہوئی قیمتوں کے باعث مالی سال 2022 کے دوران پاکستان پٹرولیم گروپ کا درآمدی بل تاریخ کی نئی ریکارڈ سطح پر پہنچ گیا۔

زیرتبصرہ مالی سال میں ملکی تاریخ میں پہلی بار پٹرولیم گروپ کے درآمدی بل کی مالیت 23 ارب 31 کروڑ ڈالر رہی ہے، وفاقی ادارہ شماریات کے اعداد و شمار کے مطابق مالی سال 2021 کے مقابلے مالی سال 2022 میں پیٹرولیم گروپ کی درآمدات میں 105 فیصد کا نمایاں اضافہ ریکارڈ کیا گیا ہے۔

رپورٹ کے مطابق مالی سال 21 میں پیٹرولیم مصنوعات کے درآمدی بل کی مالیت11ارب 35 کروڑ ڈالر تھی جبکہ مالی سال 22 میں پیٹرولیم مصنوعات کا درآمدی بل 133 فیصد اضافے سے 12.06 ارب ڈالر رہا، مالی سال 21 میں پیٹرولیم مصنوعات کا درآمدی بل 5.16 ارب ڈالر تھا جبکہ مالی سال 22 میں خام تیل کی درآمدات کی مالیت 80 فیصد کے اضافے سے 5.59 ارب ڈالر رہی۔

رپورٹ کے مطابق مالی سال 21 میں خام تیل کی درآمدات پر 3.10 ارب ڈالر خرچ کیے گئے تھے جبکہ مالی سال 22 میں ایل این جی کی درآمدات کی مالیت 90.65 فیصد اضافے سے4.98 ارب ڈالر رہی، مالی سال 21 میں ایل این جی کی درآمد پر 2.61 ارب ڈالر خرچ ہوئے تھے، مالی سال 22 میں ایل پی جی کی درآمد 40 فیصد اضافے سے 66 کروڑ ڈالر رہی، مالی سال 21 میں ایل پی جی کی درآمد پر66 کروڑ ڈالر خرچ ہوئے جبکہ مالی سال 21 میں ایل پی جی کی درآمد پر 47.20 کروڑ ڈالر خرچ ہوئے تھے۔