حجاج کرام کیلیے خوشخبری زمزم لے جانے کی اجازت مل گئی

حکام کی جانب سے حجاج کو واپسی پر کسی مشکل سے بچنے کیلیے آگاہی مہم جاری ہے (فوٹو فائل)

---

لاہور: سعودی حکام نے حجاج کرام کے لیے اچھی خبر سناتے ہوئے اعلان کیا ہے کہ اللہ کے مہمان اپنے ممالک واپسی پر زم زم لے جا سکیں گے۔

مقامی میڈیا کے مطابق شاہ عبدالعزیز انٹرنیشنل ائرپورٹ انتظامیہ نے ہوائی اڈے ے مختلف مخصوص پوائنٹس سے بین الاقوامی پروازوں کے ذریعے اپنے ممالک واپس جانے والے حجاج کرام کو زم زم پیکیجز کی ترسیل کا اعلان کردیا ہے، جس کے مطابق حجاج کرام کو ہوائی اڈے پر مخصوص پوائنٹس سے اپنے ساتھ زم زم کا ایک پیکیج خریدنے کی اجازت ہوگی۔

علاوہ ازیں شاہ عبدالعزیز بین الاقوامی ائرپورٹ کی جانب سے مقامی ذرائع ابلاغ اور سوشل میڈیا کے ذریعے حجاج کرام کو مختلف سہولیات اور اصول و ضوابط سے متعلق آگاہی کی مہم جاری ہے، جس کا مقصد حجاج کرام کی ہوائی اڈے آمد سے قبل ان کی مکمل تیاری اور کسی بھی قانونی زحمت سے بچنا ہے، جس میں زم زم، سامان، بیگ یا دستاویزات سے متعلق مکمل معلومات شامل ہیں۔

 

ZamZam News #Hajj pic.twitter.com/267PgpuDAA

- (@HaramainInfo) July 9, 2022

واضح رہے کہ رواں برس رمضان المبارک میں شروع ہونے والے عمرہ سیزن میں کچھ پروازوں پر زم زم لانے کی اجازت نہیں دی گئی تھی، جس کی وجہ سے عازمین حج و عمرہ تشویش کا شکار تھے اور موجودہ حج سیزن میں بھی یہ صورت حال غیر یقینی تھی کہ شاہ عبدالعزیز انٹرنیشنل ائرپورٹ سے حکام زم زم لانے کی اجازت دیں گے یا نہیں۔

سعودی انتظامیہ کی جانب سے حاجیوں کے لیے سنائی گئی خوش خبری کے بعد غیر یقینی کی صورت حال ختم ہو گئی اور حجاج میں خوشی کی لہر دوڑ گئی ہے۔