ناقص کارکردگی کے حامل درجنوں حج ٹور آپریٹرز کو نوٹس جاری

حج سیزن 2013 کے دوران عازمین حج کوقواعد کے مطابق سہولتیں فراہم نہیں کی تھیں

Nasiruddin March 09, 2014

اس وقت ملک بھر میں745پرائیویٹ حج ٹورآپریٹرز عازمین حج کو سہولتیں فراہم کر رہے ہیں۔ فوٹو: ایکسپریس/فائل

وفاقی وزارت مذہبی امور نے ناقص کارکردگی کے حامل درجنوں حج ٹور آپریٹرز کو نوٹس جاری کردیے، کوٹا منسوخ ہونے کا امکان ہے۔

ٹور آپریٹرز نے حج سیزن 2013 کے دوران عازمین حج کو قواعد و ضوابط کے مطابق سہولتیں فراہم نہیں کیں جس کی وجہ سے عازمین حج کو سعودی عرب میں مشکلات پیش آئیں۔وفاقی وزارت مذہبی امور نے حج سیزن2013 میں فریضہ حج ادا کرنے والے حجاج کرام سے کہا تھا کہ وہ ان حج ٹورآپریٹرز کی نشاندہی کریں جنھوں نے حج سیزن کے دوران عازمین حج کو قواعد و ضوابط کے مطابق سہولتیں فراہم نہیں کیں جس کے جواب میں وزارت مذہبی امور کو بے شمار شکایات موصول ہوئیں ان شکایات کا وزارت مذہبی امور نے سخت نوٹس لیا ہے اور ٹورآپریٹرز سے وضاحت طلب کر لی ۔

ذرائع کے مطابق سنگین نوعیت کی شکایات کے حامل حج ٹورآپریٹرز کا کوٹا منسوخ کردیا جائے گا۔ واضح رہے کہ اس وقت ملک بھر میں745پرائیویٹ حج ٹورآپریٹرز عازمین حج کو سہولتیں فراہم کر رہے ہیں حکومت پاکستان کی پالیسی کے تحت پرائویٹ ٹورآپریٹرز پچاس فیصد عازمین حج کو فریضہ حج کرانے کے انتظامات کرتے ہیں جبکہ پچاس فیصد عازمین حج کے لیے سرکاری اسکیم کے تحت انتظامات کیے جاتے ہیں۔وفاقی وزیرمذہبی امور سردار یوسف نے ایکسپریس سے گفتگو کرتے ہوئے کہا کہ وفاقی وزارت مذہبی امور ہرسال پرائویٹ حج ٹورآپریٹرز کی کارکردگی کو مانیٹر کرتی ہے اور جن ٹورآپریٹرز کیخلاف سنگین نوعیت کی شکایات ہوں گی ان کیخلاف کارروائی ہوسکتی ہے۔