اسلام آباد ایئرپورٹ پر رن وے کیساتھ ٹیکسی ٹریک بنانے کی منظوری

دھندمیں بھی فلائٹ آپریشن جاری رکھنے کیلیے نظام نصب کیا جائے، وزیراعظم کی ہدایت

فیاض ولانہ February 20, 2014

دھندمیں بھی فلائٹ آپریشن جاری رکھنے کیلیے نظام نصب کیا جائے، وزیراعظم کی ہدایت فوٹو : فائل

وزیر اعظم نواز شریف نے اپنے معاونِ خصوصی برائے ایوی ایشن ڈویژن شجاعت عظیم کی درخواست پر اسلام آباد ایئر پورٹ کے رن وے کے ساتھ ٹیکسی ٹریک بنانے، لاہور ایئر پورٹ کے توسیعی منصوبے اور دھند کے آئندہ سیزن سے قبل لاہور ایئر پورٹ پر دھند کے دوران بھی کامیابی سے فلائٹس آپریٹ کرنے کا خصوصی نظام نصب کرنے کی اصولی منظوری دیدی ہے۔

شجاعت عظیم نے بدھ کو وزیر اعظم ہائوس میں وزیر اعظم نواز شریف سے ملاقات کی اور انھیں ایوی ایشن ڈویژن بالخصوص پی آئی اے کی بہتری کے منصوبوں پر تفصیلی بریفنگ دی ۔ ذرائع کے مطابق وزیر اعظم نے قومی ایئر لائن کی تعمیر نو کیلیے شجاعت عظیم کی جانب سے شروع کئے گئے ہنگامی اقدامات اور ان کے مثبت نتائج برآمد ہونے پر ان کی تعریف کی۔

شجاعت عظیم نے وزیر اعظم کو بتایا کہ پی آئی اے کو نئے جہازوں کی فوری ضرورت ہے جس کیلیے قومی اور بین الاقوامی اخبارات میں ٹینڈرزکی طلبی کے اشتہارات دے دیے گئے ہیں، 10 نئے جہازوں کی خریداری کیلیے 5 مارچ کو ٹینڈرز کھولے جائیں گے، وزیر اعظم کو یہ بھی بتایا گیا کہ اسلام آباد ایئر پورٹ پر فوری طور پر رن وے کیساتھ ایک ٹیکسی ٹریک بنانے کی ضرورت ہے کیونکہ یہاں لینڈ کرنیوالے جہاز موجودہ رن وے کو ہی ٹیکسی ٹریک کے طور پر استعمال کر رہے ہیں جس سے وقت ضائع ہونے کے باعث کم تعداد میں فلائٹس لینڈ کرتی ہیں۔ وزیر اعظم نے رن وے کیساتھ ٹیکسی ٹریک کی فوری تعمیر کی منظوری دی جبکہ لاہور ایئر پورٹ کے توسیعی منصوبے پر بھی کام کے آغاز کی بھی منظوری دی، ذرائع کے مطابق وزیر اعظم نے ہدایت کی کہ لاہور ایئر پورٹ کے توسیعی منصوبے میں اس ایئر پورٹ کے ماسٹر پلان کو ملحوظِ خاطر رکھا جائے۔