عقیدۂ ختم نبوتؐ کی اہمیت

خاتم الانبیاء رسول کریم ﷺ نے ارشاد فرمایا: ’’میں خاتم النبیینؐ ہوں اور میرے بعد کوئی نبی نہیں آئے گا۔‘‘

Sahib Zadah Zeeshan Kaleem Masoomi September 03, 2021

خاتم الانبیاء رسول کریم ﷺ نے ارشاد فرمایا: ’’میں خاتم النبیینؐ ہوں اور میرے بعد کوئی نبی نہیں آئے گا۔‘‘ فوٹو : فائل

ﷲ کے آخری نبی پاک، صاحب لولاک، آقائے کائنات، سیّد و امام الانبیاء اور فخر دو عالم ﷺ کی محبّت ایمان اور دین کی بنیاد ہے اور عقیدۂ ختم نبوتؐ اسلام کی اساس ہے۔

عقیدۂ ختم نبوت ﷺ کو جاننا اور اور اس پر ایمان ہر مسلمان پر فرض ہے۔ ہر مسلمان کا اس پر کامل ایمان ہے کہ حضور پاک ﷺ اﷲ کے آخری نبی و رسولؐ ہیں آپ ﷺ کے بعد روز محشر تک کوئی نبی یا رسول نہیں آئے گا، نا ہی کوئی کتاب اور شریعت نازل ہوگی۔ نبوت و رسالت اور وحی کا سلسلہ اﷲ نے اپنے محبوب کریم ﷺ پر ختم فرما دیا ہے۔

سرکار دو عالم ﷺ کی اس دنیا رنگ و بُو میں تشریف آوری کے بعد نبوت و رسالت کے دروازے اﷲ نے ہمیشہ کے لیے بند فرما دیے ہیں۔ جو سلسلہ سیّدنا حضرت آدمؑ سے شروع ہوا وہ آپؐ کی ذات پاک پر اﷲ تعالی نے ختم فرما دیا۔

ﷲ نے قرآن حکیم میں خود ارشاد فرما دیا کہ محمد ﷺ تمہارے مردوں میں سے کسی کے باپ نہیں، ہاں اﷲ کے رسول ہیں اور سب نبیوں کے خاتم اور اﷲ سب کچھ جانتا ہے۔ ختم نبوتؐ کے اس عقیدے پر قرآن مجید میں متعدد آیات کریمہ اور تقریبا دو سو سے زاید روایات موجود ہیں جن سے یہ عقیدۂ ختم نبوتؐ بڑی صراحت سے ثابت ہوتا ہے، ایسے تواتر اور قطعیت کی مثال کسی اور مسئلہ میں ملنا مشکل ہے۔

اس مسئلے پر ناصرف امّت رسول کریم ﷺ کا اجماع ہے بلکہ تمام انبیاء کرامؑ اور تمام کتب سماویہ کا بھی اس پر اجماع ہے عالم ارواح میں تمام انبیاء کرامؑ کا اس پر عہد و پیمان ہے آغاز انسانیت سے لے کر آج دن تک اور رہتی دنیا تک کہ اﷲ کے محبوب کریم ﷺ حضرت محمد مصطفیٰ ﷺ خاتم النبین ہیں اور سلسلۂ نبوت و رسالت آپؐ کی ذات با برکات پر ختم ہوگیا ہے۔

خود قرآن کریم درحقیقت خود ختم نبوتؐ کی دلیل ہے کیوں کہ قیامت تک کے لیے یہ راہ نجات ہے اور اگر حضور پاک ﷺ کے بعد کسی نبی یا رسول کی بعثت ہونا باقی ہوتی تو ظاہر ہے اس پر وحی کی صورت میں کچھ نازل ہوتا مگر چوں کہ حضور پاک ﷺ اﷲ کے آخری نبی و رسول برحق ہیں اسی لیے آپ ﷺ پر نازل کی گئی کتاب بھی آخری کلام ہے جو ہم سب کے لیے ہدایت کا سرچشمہ ہے۔

خود سرکار دو عالم ﷺ نے ارشاد فرمایا کہ میں خاتم النبیینؐ ہوں اور میرے بعد کوئی نبی نہیں آئے گا، پھر آپؐ نے فرمایا کہ بے شک میری اور مجھ سے پہلے انبیائے کرامؑؑ کی مثال ایسے شخص کی طرح ہے جس نے ایک گھر تعمیر کروایا اس کو بہت عمدہ اور خُوب صورت بنایا لیکن ایک کونے میں ایک اینٹ کی جگہ رہنے دی، لوگ اس گھر کے گرد چکر لگاتے، خوشی کا اظہار کرتے اور کہتے کہ یہ ایک آخری اینٹ کیوں نہیں لگائی، پس میں ہی یہ آخری ہوں اور میں ہی آخر ی نبیؐ ہوں۔

معلوم ہوا جو کوئی اب تاقیامت تک نبوت کا دعویٰ کرے وہ جھوٹا کذّاب اور پوری امت کا متفقہ فیصلہ ہے کہ وہ واجب القتل، دجّال اور کافر ہے۔ نبی کریم ﷺ کے وصال مبارک کے بعد بہت سے جھوٹے کذابوں نے نبوت کے دعوے کیے جن میں مسلیمہ کذاب اور دیگر شامل ہیں۔

خلیفہ اوّل سیّدنا حضرت ابوبکر صدیقؓ نے ان کے خلاف جنگ کی اور ان کو واصل جہنم فرمایا، اس جنگ میں سیکڑوں حفاظ صحابہ کرامؓؓ شہید ہوئے۔ قرآن و سنّت کی ان تصریحات کے مطابق تمام صحابہ کرامؓؓ سے لے کر آج تک سب مسلمانوں کا یہ متفقہ عقیدہ ہے کہ جناب محمد رسول کریم ﷺ ہی آخری نبی ہیں اور آپؐ کے بعد نبوت کا دعویٰ کرنے والا جھوٹا، مکار اور کذاب ہے۔ حضور پاک ﷺ کے وصال مبارک کے بعد تمام صحابہ کرامؓ اور امت مسلمہ کا پہلا اجماع ہی اس پر ہوا کہ حضور خاتم النبین ﷺ ہیں اور نبوت کا کوئی بھی دعویٰ دار خارج از اسلام ہے۔

مسلمانوں نے ہر دور میں ان جھوٹے نبوت کے دعویٰ داران کے خلاف جہاد اور ان کو کافر قرار دے کر واصل جہنّم کیا ہے۔ ویسے تو آغاز اسلام سے ہی حضور پاک ﷺ کی بلند بالا ناموس اور شان میں ابولہب اور ابوجہل اور ان کے معاونین نے توہین کے پہلو تلاش کرنے کی مذموم کوشش شروع کی تھی لیکن خالق کائنات نے اپنے محبوب کریم ﷺ کی عظمتوں اور رفعتوں کی مزید بلندیاں اور عزت عطا فرمائی اور دشمنان اسلام کو ذلیل و رسوا کر دیا۔

ابولہب و ابوجہل کے بعد اس کے پیروکاروں نے اس گھٹیا اور ناپاک حرکت کو جاری رکھا اور کسی طرح حرمت مصطفی ﷺ پر حملوں کی ناپاک کوشش میں لگے رہے، لیکن ہر دور میں رسول کریم ﷺ کے غلاموں نے ان بے دین کافروں سے کلمۂ حق بلند کرکے جہاد کیا۔

توحید کے بعد عقیدۂ ختم نبوتؐ ہی وہ اسلام کا بنیادی عقیدہ ہے جس نے دنیا بھر کے ایک ارب تیس کڑور مسلمانوں کو ایک لڑی میں پرو رکھا ہے اور ہر مسلمان حضور پاکؐ کی محبت اور ختم نبوتؐ کو دنیا و آخرت کی نجات و تمام اعزازات کاسر چشمہ سمجھتا ہے اور جب بھی اس عقیدے پر کوئی زد نظر آتی ہے تو پوری دنیا کے مسلمان متحد نظر آتے ہیں اور اس کے تحفّظ کے لیے اپنا تن من دھن قربان کر نے کے لیے میدان عمل میں نکل آتے ہیں۔ کیوں کہ مومن کی متاع عزیز سرکار دو عالم ﷺ کی ذات سے محبّت ہے۔

علامہ ابن جریر طبریؒ خاتم النبیینؐ کے بارے میں فرماتے ہیں کہ آپؐ، اﷲ کے رسول ہیں اور خاتم النبیین ﷺ یعنی وہ عظیم ہستی جس نے سلسلۂ نبوت ختم فرما دیا اور اس پر مہر ثبت فرما دی ہے کہ قیامت تک یہ کسی کے لیے نہیں کھلے گی۔ علامہ ابن کثیرؒ فرماتے ہیں کہ حضور پاک ﷺ کے بعد کوئی نبی نہیں آئے گا اور جب نبی کا آنا محال ہے تو رسول کا آنا بہ درجہ اولیٰ محال ہے۔

امام فخر الدین رازیؒ فرماتے ہیں کہ آپؐ آخری نبی ﷺ ہیں آپؐ کے بعد کوئی نبی نہیں۔ امام جلال الدین سیوطیؒ فرماتے ہیں کہ اﷲ ہر چیز سے آگاہ ہے اور وہ جانتا ہے کہ حضور ﷺ کے بعد کوئی نبی نہ ہوگا اور جب حضرت عیسیٰ علیہ السلام دوبارہ نازل ہوں گے تو وہ بھی امّتی بن کے آئیں گے اور شریعت محمدیؐ کے پیروکار ہوں گے۔

اﷲ تعالی ہمیں حضور پاک ﷺ کی سچّی محبّت عطا فرمائے۔ آمین