دورۂ آسٹریلیا نوجوان بھارتی ٹیم کا پستی سے بلندی کا سفر

ایڈیلیڈ ٹیسٹ میں بھارت کی شرمناک کارکردگی کے بعد گابا میں تاریخی فتح تک کا سفر کسی معجزے سے کم نہ تھا

کامران سرور January 22, 2021

بھارتی ٹیم نے 33 سال تک ناقابل شکست رہنے والی آسٹریلوی ٹیم کو شکست سے دوچار کردیا۔ (فوٹو: انٹرنیٹ)

کرکٹ کا جنون بچپن سے ہی میرے سر پر سوار ہے اور کرکٹ کی وجہ سے جتنی مار میں نے کھائی شاید ہی کسی کے حصے میں آئی ہو۔ مجھے آج بھی یاد ہے اتوار کے دن کرکٹ ٹورنامنٹ کی وجہ سے دیر سے گھر آنے پر میری بھرپور خاطر تواضع کی جاتی تھی۔ اگلے روز یہ سلسلہ اسکول میں بھی دہرایا جاتا اور ہوم ورک نہ کرنے کی وجہ سے باقاعدہ ڈنڈوں سے استقبال کیا جاتا تھا لیکن بقول امی جان ''بہت ہی کوئی ڈھیٹ چمڑی ہے تیری''۔

بہرحال زندگی کی مصروفیات میں اب کرکٹ کھیلنے کا وقت تو نہیں رہا لیکن دیکھنے کی حد تک یہ جنون اب بھی برقرار ہے۔ آسٹریلیا کی بھارت کے ہاتھوں شکست دیکھ کر بچپن کا واقعہ یاد آگیا۔ جب بھی کسی ٹیم کے خلاف سیریز کے پہلے میچ میں شکست ہوتی تو یہ کہتے ہوئے رونا دھونا شروع کردیتے '' ہم دوسرا میچ نہیں کھیل رہے تم بڑے لڑکے لائے ہو''۔

SURVIVE AND CONQUER 💪👏

It takes 20 men for 🇮🇳 to retain the Border-Gavaskar Trophy, and they become the first visiting team to win a Test at the Gabba since 1988 🏆🙌 #AUSvIND pic.twitter.com/FZyqs9qTsu
— ESPNcricinfo (@ESPNcricinfo) January 19, 2021

بھارت کے بچوں نے بھی برسبین ٹیسٹ میں 33 سال تک ناقابل شکست رہنے والی ٹیم کا غرور خاک میں ملا کر وہ تاریخ رقم کی جو مدتوں یاد رکھی جائے گی۔ ایڈیلیڈ ٹیسٹ میں تاریخی پستی (اپنے کم ترین اسکور 36) پر آؤٹ ہونے اور میچ میں بدترین شکست کے بعد گابا میں چمتکار (33 سالہ ریکارڈ فتح) تک کا سفر کسی معجزے سے کم نہیں تھا۔ تاریخ میں اس سے پہلے کسی بھی ملک کی بی ٹیم نے آسٹریلیا کو گھر میں گھس کو ایسے مات نہیں دی ہوگی۔ یہاں پر ہمیں اجینکا رہانے کی بھی تعریف کرنی ہوگی کہ کیسے انہوں نے بھارت کے اسٹار بلے باز اور کپتان ویرات کوہلی کی غیرموجودگی میں زمین بوس ٹیم کو آسمان کی بلندیوں تک پہنچادیا۔

درحقیقت یہ صرف ٹیم یا کپتان کی جیت نہیں بلکہ بھارت کے ڈومیسٹک سسٹم کی جیت ہے، جس میں وہ کئی سال سے سرمایہ کاری کررہے تھے اور اب اس کے نتائج آنا شروع ہوئے ہیں۔ یہاں پر روی شاستری اور راہول ڈریوڈ کا نام نہ لینا زیادتی ہوگی۔ بھارتی ٹیم کے ہیڈ کوچ روی شاستری نے ٹیم کے اہم کھلاڑیوں کے اَن فٹ ہونے کے باوجود کس طرح ٹیم کے ڈریسنگ روم کا ماحول بنائے رکھا، وہ قابل ستائش ہے۔

دوسری جانب 1996 سے 2012 تک ملک کی نمائندگی کرنے کے بعد راہول ڈریوڈ نے کوچنگ کے میدان میں قدم رکھا اور 2016 سے 2019 تک انڈر نائنٹین اور اے ٹیم کی کوچنگ کی۔ ان کی کوچنگ کے دوران بھارتی ٹیم 2016 میں فائنل میں پہنچنے میں کامیاب رہی اور 2018 میں ورلڈ چیمپئن بنی۔ جب کہ آج کل ڈریوڈ بھارت کی نیشنل کرکٹ اکیڈمی میں بطور ڈائریکٹر فرائض انجام دے رہے ہیں۔ بھارت نے آسٹریلیا میں جو کارنامہ انجام دیا وہ راہول ڈریوڈ کا ہی مرہون منت ہے۔

All I can see single digit number 😂 I was alive to see this kind of scorecard. Loved it. @hazlewood congratulations for 200 wickets. Amazing 5 wickets for 8 runs. #AUSvIND #Cricket #2020 pic.twitter.com/oQCWaGRqXA
— Mir Yeameen Zaiem (@Zaiem30) December 19, 2020

اب ذرا بات کرلیتے ہیں اچانک بھارتی ٹیم کیسے زیربحث آئی؟ تو اس کےلیے ہمیں تقریباً ایک ماہ پیچھے جانا پڑے گا جب 19 دسمبر کو ایڈیلیڈ میں شروع ہونے والے ٹیسٹ میں بھارت اپنی ٹیسٹ تاریخ کے کم ترین اسکور پر آؤٹ ہونے کی وجہ سے پوری دنیا میں ذلیل و رسوا ہوا۔ لیکن پھر اگلے ہی میچوں میں اس ٹیم کے بچوں نے بے خوفی اور ہمت کی مثال قائم کرتے ہوئے 19 جنوری کو آسٹریلیا میں جو کیا، وہ بھی قابل دید تھا۔

پہلے میچ کی شکست کے بعد وہ موقع بھی آیا جب بھارتی ٹیم کے ڈریسنگ روم کو ایمرجنسی وارڈ سے تشبیہ دی گئی۔ کیوں کہ گابا ٹیسٹ تک پہنچتے پہنچتے آدھی بھارتی ٹیم اَن فٹ ہوچکی تھی، جس کی وجہ سے اس اہم دورے میں ایک دو نہیں بلکہ 5 کھلاڑیوں کا ڈیبیو ہوا۔ شبمن گل، محمد سراج، واشنگٹن سندر، شاردل ٹھاکر، نترجن اور نودیب سینی نے سینئرز کی غیر موجودگی میں موقع کا بھرپور فائدہ اٹھاتے ہوئے تاریخ رقم کرنے میں اپنا کردار ادا کیا۔ متعدد بار ٹاپ آرڈر کی ناکامی کے باوجود کبھی مڈل آرڈر تو کبھی لوئر آرڈر نے مزاحمت کی تاریخ رقم کی۔ مزاحمت کی بات کی جائے تو چتیشور پچارا کی صورت میں بھارت کو راہول ڈریوڈ کے بعد ایک اور ''دیوار'' میسر آچکی ہے، جس نے وکٹ بچانے کی خاطر پیٹ کمنز اور ہیزلووڈ کے باؤنسرز کا اپنے جسم سے دفاع کیا۔

ایڈیلیڈ ٹیسٹ میں بھارت نے پہلے بیٹنگ کرتے ہوئے 244 رنز بنائے، جس کے جواب میں آسٹریلیا 191 رنز پر آؤٹ ہوگئی اور بھارت کو 53 رنز کی برتری حاصل ہوئی۔ لیکن دوسری اننگز میں بھارتی بلے باز جوش ہیزلے ووڈ اور پیٹ کمنز کی بولنگ کا سامنا نہ کرسکے اور حیران کن طور پر کوئی ایک کھلاڑی بھی ڈبل فیگر میں داخل نہیں ہوا اور پوری ٹیم اپنی تاریخ کے کم ترین اسکور 36 رنز پر آؤٹ ہونے کے بعد تیسرے ہی روز میچ بھی ہار گئی۔

A dramatic turnaround on day three!

Australia win by 8️⃣ wickets in Adelaide to take a 1-0 lead in the series 👏

Can you describe their performance in one word?#AUSvIND 👉 https://t.co/Q10dx0r4nX pic.twitter.com/uGMS0InEHm
— ICC (@ICC) December 19, 2020

ایڈیلیڈ ٹیسٹ میں شرمناک شکست کے بعد بھارتی ٹیم کی ملکی و بین الاقوامی میڈیا میں خوب چھترول کی گئی اور غیروں سمیت اپنوں نے بھی خوب تنقید کے نشتر برسائے۔ پہلے ٹیسٹ کے بعد بیٹی کی پیدائش کی وجہ سے بھارت واپس جانے والے کپتان ویرات کوہلی زد میں رہے کہ وہ کس طرح اس ٹیم کو آسٹریلین بولرز کے رحم وکرم پر چھوڑ کر جاسکتے ہیں۔

آسٹریلیا کے سابق کپتانوں سمیت بڑے بڑے کھلاڑیوں نے آسٹریلیا کے ہاتھوں بھارت کی ذلت آمیز شکست کی پیشگوئیاں کردیں اور بھارت کے 0-4 سے وائٹ واش کے خواب دیکھنا شروع کردیے تھے، جو تاریخی فتح کے بعد بھارتی کھلاڑی ایشون نے ری ٹوئٹ کیے۔

LHS ( not = ) RHS !

Yours happily
India tour of OZ 2020/21

Humbled by all the love and support we have received over the last 4 weeks!🙏 pic.twitter.com/nmjC3znglx
— Ashwin 🇮🇳 (@ashwinravi99) January 19, 2021

آسٹریلیا کےلیے دو ورلڈکپ ٹرافیاں اٹھانے والے رکی پونٹنگ نے کہا کہ ویرات کوہلی کی غیرموجودگی میں آسٹریلیا کےلیے اچھا موقع ہے وہ بھارت کو وائٹ واش کردیں۔ ایسی شکست کے بعد اس ٹیم کو کوئی انہیں اٹھا سکتا۔ 2015 ورلڈکپ کے فاتح کپتان مائیکل کلارک نے کہا کہ ویرات کوہلی کے بغیر بھارت کی بیٹنگ لائن اگلے دو ٹیسٹ میچوں میں شدید مشکلات کا شکار رہے گی۔ آسٹریلیا کے سابق کپتان مارک وا نے بھی سیریز میں آسٹریلیا کے 0-4 سے فتح کی پیشگوئی کرتے ہوئے کہا کہ مجھے نہیں لگتا کہ آسٹریلیا کے ہاتھوں تیسرے دن اس شکست کے بعد بھارت واپسی کرسکتا ہے۔ سابق انگلش کپتان مائیکل وان نے کہا کہ میں نے تو پہلے ہی کہہ دیا تھا، ٹیسٹ سیریز میں بھارت کو بہت مار پڑنے والی ہے۔ سابق وکٹ کیپر بلے باز بریڈ ہیڈن نے کہا میرا خیال تھا کہ بھارت کے پاس صرف ایڈیلیڈ ٹیسٹ جیتنے کا موقع تھا لیکن اب مجھے نہیں لگتا وہ مزید کچھ کرسکتے ہیں۔

باکسنگ ڈے ٹیسٹ میں بھارت نے آسٹریلیا کو 8 وکٹ سے شکست دے کر یہ ثابت کردیا کہ وہ ویرات کوہلی کے بغیر بھی کھیلنے کے قابل ہے۔ میچ میں ڈیبیو کرنے والے شبمن گل اور محمد سراج نے شاندار کھیل پیش کیا۔ کپتان اجینکا رہانے نے بھی ذمے دارنہ بیٹنگ کی۔ دوسرے ٹیسٹ میں بھارت ویرات کوہلی اور اپنے اسٹرائیک بولر محمد شامی کے بغیر میدان میں اترا۔ روہت شرما اور ایشانت شرما پہلے ہی سے اَن فٹ تھے، ایسے میں ٹیم میں 4 تبدیلیاں کرنی پڑیں۔ شبمن گل اور محمد سراج کو ٹیسٹ کیپ دی گئی، رویندرا جڈیجا اور ریشپ پانٹ کو بھی ٹیم میں شامل کیا گیا۔

دوسری فتح کے بعد بھارت کے حوصلے بلند ہوئے اور تجربہ کار بلے باز روہت شرما کے آنے سے کچھ سکھ کا سانس لیا۔ انہیں آؤٹ آف فارم ماینک اگروال کی جگہ ٹیم میں شامل کیا گیا۔ مین اسٹرائیک بولر اومیش یادو کے اَن فٹ ہونے پر نودیب سینی کو ٹیسٹ کیپ دی گئی۔ آسٹریلیا نے بھارت کو جیت کےلیے 407 رنز کا ہدف دیا، جس کے جواب میں بھارت نے 5 وکٹ پر 334 رنز بنائے۔ روہت شرما، چتشور بچارا نے نصف سنچریاں اسکور کیں اور ریشپ پانٹ نے صرف 118 گیندوں پر 97 رنز کی جارحانہ اننگز کھیلی۔ اگر وہ تھوڑی دیر اور وکٹ پر رک جاتے تو چوتھے میچ کی طرح یہ میچ بھی بھارت کی جھولی میں ڈال جاتے، لیکن وہ بدقسمتی سے آؤٹ ہوگئے۔ تاہم تیسرے میچ کے ہیرو روی چندر ایشون اور ہنوما وہاری ثابت ہوئے۔ جب آسٹریلیا کو جیت کےلیے صرف 5 وکٹیں درکار تھیں، یہ دونوں دیوار کی طرح آسٹریلیا کی بولنگ لائن کے آگے ڈٹ گئے اور بھارت آسٹریلیا کو یقینی شکست سے روکنے میں کامیاب رہا۔

"Can't wait to get you to the Gabba"

"Can't wait to get you to India, it will be your last series"

Tim Paine had plenty to say to Ravi Ashwin behind the sticks, but the Indian batsman wasn't fazed 👊

He even watched the Aussie keeper shell one the next over 👀 pic.twitter.com/pmUNhMVDIe
— Cricket on TNT Sports (@cricketontnt) January 11, 2021

گابا ٹیسٹ سے پہلے بھارتی اور آسٹریلوی بورڈ کے درمیان قرنطینہ کو لے کر کچھ مسائل بھی پیدا ہوئے تھے، جس پر آسٹریلیا نے شور مچانا شروع کردیا تھا کہ بھارتی ٹیم گابا کی باؤنس کے خوف سے بھاگ رہی ہے۔ یہی نہیں تیسرے میچ کے دوران آسٹریلیا کے کپتان ٹم پین نے بھی ایشون پر جملہ کسا ''کین ناٹ ویٹ ٹو سی یو ایٹ دی گابا'' یعنی گابا میں ملتے ہیں۔ جو بعد میں بہت مشہور ہوا اور ٹم پین کی خوب ٹرولنگ کی گئی۔

سیریز کے آخری اور فیصلہ کن ٹیسٹ کےلیے بھارت کی بدقسمتی رہی کہ تیسرے میچ کے ہیرو روی چندر ایشون اور ہنوما وہاری کے ساتھ ساتھ رویندرا جڈیجا اور آخری مین اسٹرائیک بولر جسپریٹ بمرا بھی اَن فٹ ہوگئے۔ ایسی صورتحال میں بھارت نے گابا کے باؤنسی ٹریک پر مزید دو کھلاڑیوں کو ٹیسٹ کیپ دے کر بمشکل اپنی ٹیم مکمل کی، لیکن وہ بھی بھارت کی ریگولر ٹیم نہیں تھی اور تقریباً پوری ٹیم ہی نئی تھی۔ تجربہ نہ ہونے کے باوجود نئے کھلاڑیوں کے حوصلے بلند تھے، جس کی بدولت ڈیبیو کرنے والے واشنگٹن سندر، نترجن اور اپنا دوسرا میچ کھیلنے والے شاردل ٹھاکر نے آسٹریلین بلے بازوں کو خوب پریشان کیا اور بھارتی ٹیم پہلی اننگز میں 369 رنز بناکر آؤٹ ہوئی۔

Unlucky to miss out on his maiden 💯 but that knock of 91 helped pave the way for #TeamIndia’s historic win 💥

One for the future, making the present his own! @RealShubmanGill 💪#AUSvIND #Test #Cricket pic.twitter.com/gbXQmV9pWP
— KolkataKnightRiders (@KKRiders) January 19, 2021

پہلی اننگز میں بھارت کے ٹاپ اور مڈل آرڈر کی ناکامی کے باوجود 7 ویں اور 8 ویں نمبر پر بلے بازی کےلیے آنے والے واشنگٹن سندر اور شاردل ٹھاکر نے بیٹنگ میں اپنا جوہر دکھاتے ہوئے نصف سنچریاں اسکور کیں اور بھارت کو فائٹنگ پوزیشن میں لاکھڑا کیا۔ اپنا تیسرا میچ کھیلنے والے محمد سراج نے دوسری اننگز میں اپنی بولنگ کا جادو دکھاتے ہوئے 5 کھلاڑیوں کو پویلین کی راہ دکھائی اور شاردل ٹھاکر نے یہاں بھی ان کا بھرپور ساتھ دیتے ہوئے 4 وکٹیں حاصل کیں۔ آسٹریلیا نے بھارت کو جیت کےلیے 328 رنز کا انتہائی مشکل ہدف دیا۔

Highest successful 4th innings chase at the Gabba: 236 (for 7 wickets) by Aus v WI, 1951.
Highest for a draw: 6-278, Eng, 1962.#AusvWI
— Ric Finlay (@RicFinlay) January 18, 2021

گابا ٹیسٹ کے آخری روز بھارت ڈرا کی نیت سے بھی میدان میں اترسکتا تھا، کیوں کہ آسٹریلیا کی مضبوط ٹیم کے آگے یہاں میچ ڈرا کرنا بھی کسی معجزے سے کم نہ ہوتا۔ لیکن بھارت کے نوجوان کھلاڑیوں کے دل میں تاریخ رقم کرنے کا جنون سوار تھا۔ بھارتی کھلاڑی صرف جیت کی نیت سے میدان میں اترے اور مثبت کرکٹ کھیل کر گابا میں آسٹریلیا کو شکست دے کر نہ صرف 33 سال پرانا ریکارڈ توڑا بلکہ چوتھی اننگز میں 328 رنز کا ہدف حاصل کرکے آسٹریلیا ہی کا 69 سالہ ریکارڈ بھی روند ڈالا۔

When the chips are down. You push harder.💪💪 A series we can never forget. 😍 Through the tough times we always believed and backed ourselves and this series win proves with belief you can achieve everything.💯🙏@BCCI pic.twitter.com/uPPhzmFHAT
— Rishabh Pant (@RishabhPant17) January 19, 2021

کھیل کے چوتھے روز ابتدا میں اپنا تیسرا میچ کھیلنے والے شبمن گل نے تجربہ کار آسٹریلوی بولنگ لائن کی خوب درگت بنائی اور 147 گیندوں پر 91 رنز کی تیز اننگز کھیلی۔ آخری لمحات میں جب میچ انتہائی سنسنی خیز مرحلے میں داخل ہوچکا تھا، ایسے میں ریشپ پانٹ نے ٹی ٹوئںٹی طرز کی کرکٹ کھیلنا شروع کی۔ ابھی میچ کے 3 اوورز باقی تھے لیکن ریشپ پانٹ تاریخ کے صفحات میں اپنا نام سنہری حروف میں درج کروا چکے تھے اور 138 گیندوں پر 89 رنز کی اننگز کھیل کر بھارت کےلیے تاریخ رقم کرچکے تھے۔

#TeamIndia creates history as they register a spectacular victory in #Gabba. Having been bowled for 36 in the first test, the Team showed remarkable character in wresting the Trophy. Congratulations.#INDvsAUS #BorderGavaskarTrophy @BCCI pic.twitter.com/etrgZPxbnI
— Himanta Biswa Sarma (@himantabiswa) January 19, 2021

آخر میں صرف یہی کہنا چاہوں گا کہ کسی بھی ٹیم میں صرف بڑے نام ہونے سے فرق نہیں پڑتا بلکہ میدان میں اترتے وقت ملک کی خدمت کا جذبہ اور جیت کی لگن ہو تو بچے بھی بڑے بڑوں کو چت کردیتے ہیں۔ آسٹریلیا کے کپتان اور کوچ نے بھی بھارت کے خلاف اپنی شکست تسلیم کرتے ہوئے کہا کہ ہم نے بھارت کو بہت ہلکا لے لیا تھا اور یہ غلطی ہم دوبارہ نہیں کریں گے۔ آسٹریلیا کے کوچ جسٹن لینگر کی اس بات پر مجھے پاکستانی ٹیم کے ہیڈکوچ مصباح الحق کا بیان یاد آیا جس میں انہوں نے نیوزی لینڈ کے خلاف شکست کا سارا ملبہ غیرتجربہ کار بولرز اور بابراعظم کی غیر موجودگی پر ڈال دیا تھا۔

نوٹ: ایکسپریس نیوز اور اس کی پالیسی کا اس بلاگر کے خیالات سے متفق ہونا ضروری نہیں۔

اگر آپ بھی ہمارے لیے اردو بلاگ لکھنا چاہتے ہیں تو قلم اٹھائیے اور 500 سے 1,000 الفاظ پر مشتمل تحریر اپنی تصویر، مکمل نام، فون نمبر، فیس بک اور ٹوئٹر آئی ڈیز اور اپنے مختصر مگر جامع تعارف کے ساتھ [email protected] پر ای میل کردیجیے۔