’ارطغرل غازی‘ پاکستان میں دکھایا جانا چاہئے یا نہیں پاکستانی فنکارآمنے سامنے

جب فنکار گھربیٹھے ہوں اور آپ دوسرے ممالک کے ڈراموں کو پیسہ دے کر پروموٹ کریں تو یہ بہت تکلیف دہ بات ہوتی ہے، ریما

زنیرہ ضیاء May 21, 2020

ارطغرل غازی ایک معلوماتی ڈراما ہے جس میں تاریخ اور اسلامی اقدار کا سبق دیاگیا ہے، فنکار فوٹوفائل

ISLAMABAD: اسلامی فتوحات پر مبنی ترکی کے مقبول ترین ڈرامے ''دیریلش ارطغرل'' کو پاکستان میں ''ارطغرل غازی'' کے نام سے پیش کیا جارہا ہے تاہم پاکستان شوبز انڈسٹری سے تعلق رکھنے والے فنکار ڈراما نشر کرنے پرتقسیم ہوگئے ہیں۔

وزیراعظم عمران خان کی ہدایت پر یکم رمضان المبارک سے پاکستان کے سرکاری چینل پی ٹی وی پر اسلامی تاریخ اور فتوحات پر مبنی ڈراماسیریل ''ارطغرل غازی'' پیش کیاجارہا ہے۔ ڈراما سلطنت عثمانیہ کے بانی عثمان اول کے والد ارطغرل غازی کی زندگی پر مبنی ہے اور ڈرامے کی کہانی تیرہویں صدی میں ترک مسلمانوں کی فتوحات کے گرد گھومتی ہے۔

یہ بھی پڑھیں: حلیمہ سلطان نے جب پریانکا چوپڑا کو سبق سیکھایا

اس ڈرامے کی پہلی ہی قسط نے پاکستان میں ریکارڈ کامیابی حاصل کی اور یوٹیوب پر ہر گزرتے دن کے ساتھ مقبولیت کے نئے ریکارڈ بنارہا ہے۔ تاہم جہاں پاکستانی عوام کی جانب سے اس ڈرامے کو پزیرائی مل رہی ہے وہیں کچھ فنکار اس ڈرامے کے خلاف بھی ہیں اور بڑھ چڑھ اس کی مخالفت میں بول رہے ہیں۔

ڈرامے کی مخالفت میں بولنے والے فنکار

''ارطغرل غازی'' کو پی ٹی وی پر پیش کرنے کے خلاف شان نے سب سے پہلے آواز اٹھاتے ہوئے وزیراعظم کو مخاطب کرتے ہوئے کہا تھا کہ اس معاشی بحران میں ہم بیرون ممالک کی چیزیں امپورٹ نہیں کرپارہے تو کیوں ثقافتی امپورٹ کھلی ہوئی ہے۔ پی ٹی وی کیوں بیرون ملک سے لایا گیا ڈراما دکھا رہا ہے۔ اپنی صلاحیت اور تاریخ پر یقین رکھیں۔ آپ کی مثبت پالیسیوں کے ساتھ ہم پاکستان کو دنیا بھر میں پہچان دلاسکتے ہیں۔

یہ بھی پڑھیں: ''ارطغرل'' کو نشر کرنے پر شان کی پی ٹی وی پر تنقید

شان کی بات سے اتفاق کرتے ہوئے اداکارہ ریما نے بھی ''ارطغرل غازی'' کو پی ٹی وی سے نشر کرنے کی مخالفت کی تھی۔ انہوں نے کہا تھا کہ جب آپ کے اپنے فنکار گھروں میں بیٹھے ہوں اور آپ دوسرے ممالک کے ڈراموں کو پیسہ دے کر پروموٹ کریں تو یہ بہت تکلیف دہ بات ہوتی ہے کیونکہ ٹیکس دوسرے ملک کے آرٹسٹ نہیں بلکہ ہمارے ملک کے آرٹسٹ دیتے ہیں۔

[instagram-post url="https://www.instagram.com/p/CAcXfBhBy85/"]

ڈرامے کی مخالفت کرنے والوں میں یاسر حسین بھی پیش پیش ہیں۔ چند روز قبل یاسر حسین نےانسٹاگرام پر کہا تھا کہ پی ٹی وی کو چاہئے کہ اپنے آرٹسٹ اور ٹیکنیشن کو لے کر ایک تاریخی ڈراما بنائے۔ ان آرٹسٹ کو جو ٹیکس دیتے ہیں اور قابلیت رکھتے ہیں۔ لنڈے کے کپڑے اور ترکی کے ڈرامے دونوں ہی مقامی انڈسٹری کو تباہ کردیں گے۔

یہ بھی پڑھیں: خلیل الرحمان قمر کا 'ارطغرل غازی' کی طرز پر ڈراما لکھنے کا اعلان

تاہم پاکستانیوں نے یاسر حسین کو اس بیان پر سراہنے کے بجائے ان پر خوب تنقید کی جس کے بعد انہوں نے ایک اوراسٹیٹس لگایا کہ جب آپ کے بھائی کو بینک سے، بہن کو اسکول سے اور ابو کو ان کی جاب سے نکال کر ترکیوں کو ملازمتیں دی جائیں گی تو شاید آپ کو اندازہ ہوگا کہ میں کیا کہہ رہا ہوں۔ پی ٹی وی قومی ٹی وی ہے یاد رکھیں۔ اگر ایک سال تک پی ٹی وی پر ترکش ڈراما چلے گا تو اس سلاٹ میں چلنے والے پاکستانی ڈرامے کا کیا ہوگا۔ اس کے اداکاروں کو کون کام دے گا، ٹیکنشن کا کیا ہوگا؟ اور یاد رہے میں اپنی بات نہیں کررہا کیونکہ میں پی ٹی وی پر کام نہیں کرتا۔

ڈرامے کے حق میں بولنے والے فنکار

تاہم جہاں ان فنکاروں نے ترک ڈرامے کو پاکستان کے سرکای ٹی وی چینل پر پیش کرنے کی مخالفت کی وہیں بہت سے فنکار اس کے حمایت میں بھی آگے آئے جن میں اداکار جان ریمبو اور ان کی اہلیہ صاحبہ شامل ہیں۔ جان ریمبو نے ڈرامے کی تعریف کرتے ہوئے کہا تھا کہ ''میرے پاس الفاظ نہیں ہیں ارطغرل ڈرامے کے لیے، ایسا کام دیکھ کر ایک حسرت ہوتی ہے کہ کاش ہم سے بھی کام لیاجاتا یہاں تو ایک جیسا کام دے دے کر ایکٹر پر چھاپ لگادیتے ہیں۔ مجھے سمجھ نہیں آرہی کہ کچھ لوگ اس ڈرامے کے خلاف کیوں ہیں؟''

جان ریمبو کی بیوی اداکارہ صاحبہ نے بھی ڈرامے کی حمایت میں آگے آتے ہوئے کہا تھا پاکستانیوں نے ثابت کردیا کہ وہ مضبوط کہانی، باحجاب عورت اور بہادر مرد دیکھنا چاہتے ہیں۔

اداکار گوہر رشید نے بھی ''ارطغرل غازی'' کے حق میں بیان دیتے ہوئے کہا کوئی بھی غیر ملکی مواد جسے پاکستانیوں کی جانب سے پسند کیا جارہا ہو وہ ہمارے لیے خطرہ نہیں ہے بلکہ ایک مقابلہ ہے جیسا کہ کسی بھی کاروبار میں ہوتا ہے۔ اگر آپ کو اپنی ملازمت کے حوالے سے خطرات ہیں اور آپ جاب سیکیورٹی چاہتے ہیں تو ذمہ داری لیں اور بہتر کام تخلیق کریں۔

My two cents. Any foreign content which is being appreciated by our Pakistani audience is not a threat! It’s a competition like in any business!
If you want job security, take ownership, and create better content. Stop being petty. #TakeResponsibility #Ertugrul (1/2)
— Mirza Gohar (@GoharRsd) May 19, 2020

گوہر رشید نے مزید کہا مقابلے کے نام پر آپ سامنے والے پر تنقید نہ کریں بلکہ اپنی بہترین صلاحتیں بروئے کار لائیں اور اچھا کام کریں میں نے اپنے بڑوں سے یہی سیکھا ہے جیسے کہ ہمایوں بھائی۔ ہمیں مختلف کام کو اپنانا چاہئے نہ کہ اس سے خوفزدہ ہونا چاہئے۔

In the name of competition, you don’t criticize your competition, instead, bring your A-game on! Fix your attitude. That’s what I have learned from my seniors like Humayun bhai. We must embrace diversity and not be scared of it! #TakeResponsibility #Ertugrul (2/2)
— Mirza Gohar (@GoharRsd) May 19, 2020

اداکارہ نیلم منیر خان نے ارطغرل کی کہانی اور اس میں دکھائی گئی اسلامی فتوحات کے بارے میں کہا مجھے لگتا ہے یہاں مسئلہ ترکی یا پاکستانی مواد کا نہیں بلکہ ہمیں اس سے آگے نکل کر سمجھنا چاہئے کہ یہ اسلامی مواد ہے اور اس میں ہمیں اسلامی تاریخ اور اقدار دکھائی گئی ہیں۔ ڈرامے میں دکھایا گیا ہے کہ کیسے انہوں نے انصاف کے لیے اپنی جانیں قربان کیں اور اسلام کو زندہ رکھا۔

یہ بھی پڑھیں: ارطغرل نے ''میرا جسم میری مرضی'' کے نعرے کو دفن کردیا، وینا ملک

اداکارہ مہوش حیات نے بھی ارطغرل کے موضوع پر اپنی رائے کا اظہار کیا تاہم انہوں نے کسی کی مخالفت یا حمایت کے بجائے کہا مجھے نہیں معلوم کس بارے میں بحث ہورہی ہیں۔ لیکن آخر میں ہمیں ''دیریلش ارطغرل'' کو تسلیم کرنا پڑے گا۔ یہ ایک معلوماتی ڈراما ہے جس میں تاریخ اور اسلامی اقدار کا سبق دیاگیا ہے۔

I don’t know what the fuss is all abt? At the end of the day lets accept Dirilis #Ertugrul for wht it is; an educational drama series which has historical significance & gr8 moral lessons.I think Engin Altan Düzyatan is pretty hot. A bit like Leonardo Di Caprio no?#crushupdated♥
— Mehwish Hayat TI (@MehwishHayat) May 18, 2020