خوابوں کی تعبیر

آپ کے خوابوں کی تعبیریں جانیے۔ فوٹو : فائل

---

دوست نسوار دیتے ہیں
فرحان، لاہور

خواب : میں نے خواب دیکھا کہ میں اپنے دوستوں کے ساتھ مارکیٹ میںکچھ کھا پی رہا ہوں۔ اسی دوران ایک پٹھان چیزیں بیچنے آتا ہے تو میرے دوست مذاق میں مجھے نسوار خرید کر دیتے ہیں۔ میں بھی مذاق میں اسے کھا لیتا ہوں مگر اس کا ذائقہ مجھے اس قدر برا لگتا ہے کہ میں فوراً تھوک دیتا ہوں۔

تعبیر : یہ خواب اس بات کو ظاہر کرتا ہے کہ اللہ نہ کرے کوئی مشکل پیش آ سکتی ہے۔گھر کا ماحول بھی کچھ پریشان ہو سکتا ہے۔ گھریلو سطح پہ تعلقات بھی متاثر ہو سکتے ہیں۔ کاروبار میں بھی مشکل پیش آ سکتی ہے جس سے مال و وسائل میں کمی آ سکتی ہے۔ آپ یاحی یا قیوم کا زیادہ سے زیادہ ورد کیا کریں ۔ نماز پنجگانہ کی پابندی کیا کریں ۔

خود کو مدینہ شریف میں دیکھنا
اکبر رضوان ، لاہور

خواب : میں نے دیکھا کہ میں اور سب گھر والے مدینہ شریف میں ہیں اور بہت خوش ہیں کہ اللہ نے ہم کو اس قابل سمجھا۔ برائے مہربانی مجھے اس کی تعبیر بتا دیں ۔

تعبیر : اچھا خواب ہے جو اس بات کو ظاہر کرتا ہے کہ اللہ تعالی کی مہربانی سے آپ کی عزت و وقار میں اضافہ ہو گا۔ علم حاصل کرنے کی جانب توجہ ہو گی اور ذھن میں بزرگی آئے گی ۔گھر میں بھی آرام و سکون ملے گا۔ اللہ کے گھر کی زیارت بھی ممکن ہے۔ آپ نماز پنجگانہ ادا کیا کریں اور کثرت سے یا حی یا قیوم کا ورد کیا کریں۔ ممکن ہو سکے تو کچھ صدقہ و خیرات بھی کیا کریں۔

بد مزہ کھانا
مدثرکوثر ، اسلام آباد

خواب : میں نے خواب دیکھا کہ میرے گھر والے سب کہیں گئے ہوئے ہیں اور میں اپنی دوست کے ساتھ پیپر کی تیاری کر رہی ہوں۔ بھوک لگنے پہ ہم کچھ کھانے کے لئے کچن میں آتے ہیں اور کھاتے ہیں مگر کھانا اس قدر کڑوا ہوتا ہے کہ ہم ایک لقمے کے بعد کچھ بھی مزید نہیں لے پاتے اور دونوں ہی تھوک دیتے ہیں۔

تعبیر: اس خواب سے اندازہ ہوتا ہے کہ اللہ نہ کرے کسی پریشانی یا غم کا سامنا ہو سکتا ہے۔ بیماری یا تعلیمی سلسے میں کوئی رکاوٹ پیش آ سکتی ہے۔کاروباری معاملات میں کسی غیر یقینی صورتحال کا سامنا ہونے کا امکان ہے۔آپ نماز پنجگانہ ادا کیا کریں اور کثرت سے ہر نماز کے بعد استغفار کیا کریں۔ آپ کے لئے محفل مراقبہ میں دعا کرا دی جائے گی۔ ممکن ہو تو کچھ صدقہ و خیرات کیا کریں۔

دولت کا لالچ
شگفتہ ناز، لاہور

خواب : یہ خواب میرے بھائی نے دیکھا ہے اور وہ دیکھتے ہیں کہ ان کے پاس کوئی چابی ہے جس کو وہ مختلف لوگوں کے گھر لگا لگا کر دیکھ رہے ہیں کہ کسی کے گھر سے پیسے مل جائیں۔ خواب میں بھی وہ خود کو پیسوں کی تلاش میں مارا مارا پھرتا دیکھ رہے ہیں۔ مگر ان کا لالچ ختم نہیں ہو رہا۔

تعبیر : یہ خواب ظاہر کرتا ہے کہ آپ کا دماغ بہت زیادہ دنیا داری میں لگا ہوا ہے۔ اور زیادہ تر وقت پیسوں اور دنیا کے متعلق سوچتے ہوئے گزرتا ہے۔ بہتر ہے کہ اس دنیا داری کو ذھن سے نکال کر اللہ کی طرف دھیان لگائیں۔ نماز پنجگانہ کی پابندی کریں۔ رات کو سونے سے پہلے سیرت النبی کا مطالعہ کیا کریں جو کہ ہمارے لئے مشعل راہ ہے ۔ کثرت سے یاحی یا قیوم کا ورد کیا کریں ۔

پیسے گم ہونا
یعقوب ارسلان ،گوجرانوالہ

خواب : میں نے دیکھا کہ میں آفس کے کام کے سلسلے میں کراچی آیا ہوا ہوں اور بنک کی چھٹی ہونے کی وجہ سے کلائنٹ سے پیسے خود ہی لے کر واپس پنڈی آ گیا ہوں پھر نہ جانے وہ پیسے کدھر گئے۔ میں سارا گھر تلاش کر رہا ہوں، ساتھ میں سب فیملی بھی ہے مگر کسی کو بھی نہیں مل رہے۔ پریشانی اتنی ہے کہ جب میری آنکھ کھلی تب بھی میرا دل بہت پریشان تھا ۔

تعبیر : اس خواب سے ظاہر ہوتا ہے کہ اللہ نہ کرے کوئی پریشانی غم یا خوف مسلط ہو سکتا ہے ۔کاروبار میں رکاوٹ آ سکتی ہے۔ رزق میں بھی اس کی وجہ سے کمی ہو سکتی ہے ۔ آپ نماز پنجگانہ ادا کیا کریں اور کثرت سے یا حی یا قیوم کا ورد کیا کریں ۔

سانپ حملہ کرتا ہے
سدرہ علی، لاہور

خواب : میں نے خواب دیکھا کہ میں اپنی ساس کے ساتھ کہیں چہل قدمی کر رہی ہوں اور وہاں اچانک ہم کو سانپ نظر آتا ہے۔ ہم دونوں یہ دیکھ کر بہت ڈر جاتے ہیں اور تیزی سے واپس بھاگتے ہیں، وہ بھی اسی تیزی سے ہمارے پیچھے آتا ہے۔ میری ساس جانے کدھر غائب ہو جاتی ہیں اور میں اپنی جان بچانے کے لئے خوفزدہ حالت میں تیزی سے بھاگتی چلی جا رہی ہوں۔ اس کے بعد میری آنکھ کھل گئی ۔

تعبیر : اس خواب سے ظاہر ہوتا ہے کہ کوئی دشمن نقصان پہنچانے کی کوشش کر رہا ہے۔ ممکن ہے کہ وہ اپنی اس کوشش میں کامیاب ہو جائے جس کی وجہ سے گھریلو کاروباری یا تعلیمی معاملات میں کوئی رکاوٹ آپ کے لئے پریشانی کا باعث بنے۔ آپ نماز پنجگانہ کی پابندی کیا کریں اور کثرت سے یا حی یا قیوم کا ورد کیا کریں۔

باغ میں بزرگ سے ملاقات
ہمایوں علی، لاہور

خواب : میں نے دیکھا کہ میں کسی بہت سر سبز باغ میں ہوں اور ٹھنڈی ہوا اور موسم سے لطف اٹھا رہا ہوں ، اسی دوران کوئی بزرگ آتے ہیں اور مجھے بتاتے ہیں کہ یہ باغ ان کا ہے۔ میں ان کے سرسبز باغ کی تعریف کرتا ہوں۔ وہ بہت خوش ہوتے ہیں اور مجھے اپنے ساتھ نماز کی دعوت دیتے ہیں۔ اور میں اندر ان کے باغ کے ساتھ بنی چھوٹی سی مسجد میں نماز ادا کرنے چلا جاتا ہوں ۔

تعبیر: خواب بہت اچھا ہے اور بزرگی کی طرف دلیل کرتا ہے۔ اللہ کے فضل سے آپ کے علم و بزرگی میں اضافہ ہو گا ۔ جس سے زندگی میں سکون و برکت ہو گی ۔آپ نماز پنجگانہ کی پابندی کیا کریں اور کثرت سے یاحی یا قیوم کا ورد کیا کریں۔ ممکن ہو سکے تو ہر جمعرات کچھ صدقہ و خیرات کر دیا کریں ۔

عرس پر ڈھول بجانا
خادم حسین ، لاھور

خواب : میں نے خواب دیکھا کہ میں اپنے شہر کے ایک میلے میں شرکت کرتا ہوں۔ وہاں ایک بزرگ کا ہر سال میلہ لگتا ہے۔ میں دیکھتا ہوں کہ وہاں ڈھول والوں کا ایک گروہ ڈھول بجا رہا ہوتا ہے ۔ میں بھی ان کے پاس کھڑا ہو کر ان کو بجاتے دیکھتا ہوں توا ن سے لے کر خود بجانے لگتا ہوں۔

تعبیر : یہ خواب اس بات کو ظاہر کرتا ہے کہ اللہ نہ کرے کوئی راز جو آپ نے ابھی تک پوشیدہ رکھا ہوا ہے وہ فاش ہو جائے گا ۔ مقاصد میں گڑ بڑ ہو سکتی ہے جس سے مال و وسائل میں کمی آ سکتی ہے ۔کاروبار میں جن لوگوں پر آپ کو اعتماد تھا وہ بھی آپ کے اعتماد کو ٹھیس پہنچا سکتے ہیں ۔کاروبار میں عقل سے کام لیں اور منصوبہ بندی کے تحت کاروبار کریں۔ آپ نماز پنجگانہ ادا کریں اور کثرت سے یا حی یا قیوم کا ورد کیا کریں ۔

باغ کی سیر
نسیم احمد،لاہور

خواب : میں نے دیکھا کہ میں ایک باغ میں سیر کرنے جاتا ہوں۔ باغ میں بہت رونق ہوتی ہے۔ بہت زیادہ خواتین و حضرات سیر کرنے آئے ہوتے ہیں۔ میں بھی سیر کے لئے باغ کا چکر لگانا شروع کر دیتا ہوں۔ اس وقت باغ میں بہت ٹھنڈی ہوا چل رہی ہوتی ہے۔ اس سے میری طبیعت بہت خوش ہوتی ہے۔ پھر میں ایک جگہ بنچ پر بیٹھ جاتا ہوں۔ اس کے بعد میری آنکھ کھل جاتی ہے۔

تعبیر : اچھا خواب ہے جو اس بات کو ظاہر کرتا ہے کہ اللہ تعالی کی مہربانی سے آپ کو راحت و آرام نصیب ہو گا۔ پریشانیوں سے نجات ملے گی۔ یہ بھی ہو سکتا ہے کہ کوئی خوشخبری ملے ۔ کاروبار میں بھی اضافہ ہو گا جس سے گھر میں آرام و سکون ہو گا۔ آپ نماز پنجگانہ ادا کیا کریں اور کثرت سے یا حی یا قیوم کا ورد کیا کریں ۔

جوتا گم ہونا
تنویر علی، اسلام آباد

خواب : میں نے خواب دیکھا کہ میں کسی خانقاہ پہ آیا ہوں۔ واپسی پہ جب میں جوتا تلاش کرتا ہوں تو مجھے ملتا نہیں البتہ ایک پرانا سا جوتا مل جاتا ہے جس کو پہن کر میں گھر جاتا ہوں مگر دل میں بہت زیادہ پریشانی ہوتی ہے ۔

تعبیر : یہ خواب ظاہر کرتا ہے کہ اللہ نہ کرے گھریلو زندگی میں کوئی مسلہ ہو سکتا ہے جس کی وجہ سے گھر میں پریشانی و نا چاقی ہو سکتی ہے۔آپ نماز پنجگانہ ادا کیا کریں اور اور ہر نماز کے بعد استغفار کثرت سے کیا کریں ۔ مراقبہ میں بھی دعا کرا دی جائے گی۔

آبشار سے پانی پینا
نائلہ اکرم خان، اسلام آباد

خواب : میں نے خواب دیکھا کہ میں اپنے میاں کے ساتھ کہیں پہاڑی مقام پہ ہوں اور کسی آبشار کے پاس کھڑی ہوں۔ ہم اس کے پانی کو پیتے ہیں جو کہ انتہائی میٹھا ہوتا ہے۔ میں اپنے میاں سے کہتی ہوں کہ اس کو بوتل میں بھر کے ساتھ لئے چلتے ہیں اس کے بعد مجھے یاد نہیں۔

تعبیر : اچھا خواب ہے جو اس بات کو ظاہر کرتا ہے کہ اللہ تعالی کی مہربانی سے ہر چیز میں برکت ہو گی۔ اگر بیمار ہیں تو شفا ملے گی۔کاروبار میں بھی بہتری ہو گی جس سے مال و وسائل میں بہتری آئے گی ۔ آپ نماز پنجگانہ ادا کیا کریں اور کثرت سے یا حی یا قیوم کا ورد جاری رکھیں۔

قید سے نجات
نصرت حمید، لاہور

خواب : میں نے دیکھا کہ جیسے کسی جرم کی وجہ سے مجھے قید میں رکھا گیا ہے مگر بعد میں بری کر دیا جاتا ہے۔ باہر آنے کے بعد مجھے بہت خوشی ہوتی ہے۔ میرے گھر والے بھی مجھے لینے آتے ہیں اور وہ سب بھی بہت خوش ہیں ۔

تعبیر: اچھا خواب ہے جو اس بات کو ظاہر کرتا ہے کہ اللہ تعالی کی مہربانی سے ہر قسم کی پریشانیوں سے نجات ملے گی ۔ اگر خدانخواستہ کسی مقدمے میں پھنسے ہیں تو بھی اللہ تعالی کی مہربانی سے خلاصی ہو گی ۔ آپ کی عزت و توقیر میں اضافہ ہو گا ۔ آ پ نماز پنجگانہ ادا کیا کریں اور نماز کے بعد استغفار کیا کریں ۔

دوستوں کی محفل
خالد اکرم ، لاہور

خواب : میں نے خواب دیکھا کہ میں اپنے گاوں میں ہوں اور اپنے دوستوں کے ساتھ چوپال میں بیٹھا ہوں ۔ سردی بہت زیادہ ہوتی ہے اور پھر وہاں بیٹھے کچھ لوگ آگ روشن کر کے اس کے گرد بیٹھے ہیں ۔ آگ جلانے کے بعد سب پرسکون ہو جاتے ہیں۔ اور اطمینان سے گفتگو سے لطف اندوز ہونا شروع کر دیتے ہیں ۔

تعبیر: اچھا خواب ہے جو اس بات کو ظاہر کرتا ہے کہ آپ کو کاروباری معاملات یا تعلیمی میدان میں کامیابی و ترقی ملے گی ۔ رزق میں بھی اس کی بدولت اضافہ ہو گا جس سے مال و وسائل میں بہتری آئے گی۔ آپ نماز پنجگانہ ادا کیا کریں اور کثرت سے یا شکور یا حفیظ کا ورد کیا کریں۔ اور کچھ صدقہ و خیرات بھی کیا کریں ۔

نانی کے گھر آم کھانا
علی عمران کمبوہ، لاہور

خواب : میں نے دیکھا کہ میں اپنی نانی کے گھر گیا ہوا ہوں اور کھانا کھا رہا ہوں ۔ میرے ماموں اور ممانی میرے لئے آم لے کر آتے ہیں۔ میں کھانے کے بعد بہت خوشی سے ان ٹھنڈے میٹھے آموں کو کھاتا ہوں ۔ اس کے بعد میری آنکھ کھل جاتی ہے ۔

تعبیر : اچھا خواب ہے جو اس بات کو ظاہر کرتا ہے کہ اللہ کی مہربانی سے آپ کے رزق میں اضافہ ہو گا۔ آپ کے کارو بار میں برکت ہو گی جس سے آپ کے وسائل میں اضافہ ہو گا۔ اللہ تعالی غیب سے مدد فرمائیں گے۔ رات کو سونے سے پہلے نبی کریمﷺ کی سیرت کا مطالعہ کیا کریں ۔

ندی پر نہانا
ارشد علی، اوکاڑہ

خواب : میں نے خواب دیکھا کہ میں اپنے شہر کی ندی پہ نہانے کے لئے جاتا ہوں۔ وہاں پہ بے شمار لوگ آئے ہوتے ہیں۔ لگتا ہے کہ سارا شہر ندی پہ نہانے آ گیا ہے۔ میں بھی ایک جگہ جہاں پانی کم ہوتا ہے۔کپڑے اتار کے نہانے لگتا ہوں۔ میں کافی دیر تک اس ٹھنڈے پانی سے نہاتا رہتا ہوں۔ پانی کچھ مٹی رنگ کا ہوتا ہے۔ مگر ٹھنڈا بہت ہوتا ہے۔ پھر میری آنکھ کھل جاتی ہے ۔

تعبیر: اچھا خواب ہے جو اس بات کو ظاہر کرتا ہے کہ اگر آپ بیمار ہیں تو اللہ تعالیٰ کی مہربانی سے شفا ملے گی۔ اگر گھر میں کوئی بیمار ہے تو بھی شفا ملے گی۔ آپ کی عزت اور توقیر میں اضافہ ہو گا ۔ آپ کے گھر میں آرام و سکون ملے گا ۔ آپ نماز پنجگانہ ادا کیا کریں اور کثرت سے یا حی یا قیوم کا ورد کیا کریں ۔

بلند آواز میں ذکر کرنا
خدا بخش، لاہور

خواب : میں نے دیکھا کہ میں اپنے محلے کی ایک مسجد میں ہوتا ہوں اور وہاں پر نماز ادا کرتا ہوں اور بعد میں اللہ تعالی سے نہایت عاجزی کے ساتھ توبہ کرتا ہوں ۔ پہلے تو میں آھستہ آھستہ استغفار کرتا ہوں پھر بلند آواز میں شروع کر دیتا ہوں۔ میرے پاس دو تین نمازی بھائی اکٹھے ہو جاتے ہیں اور وہ بھی خاموشی سے ذکر شروع کر دیتے ہیں۔ میرا بلند آواز میں ذکر کرنا ان کو اچھا نہیں لگتا اور سب مجھے غور سے دیکھتے ہیں جس پہ مجھے بہت شرمندگی ہوتی ہے۔

تعبیر: اچھا خواب ہے جو اس بات پہ دلیل کرتا ہے کہ اللہ تعالی کی مہربانی سے کوئی دلی مراد پوری ہو گی ۔ آپ کے کاروبار میں اضافہ ہو گا جس سے مال و وسائل میں بہتری ہو گی اور گھر میں بھی سکون ہو گا ۔ آپ کی عزت و توقیر میں اضافہ ہو گا ۔ آپ نماز پنجگانہ ادا کیا کریں اور کثرت سے ہر نماز کے بعد استغفار کیا کریں اور کچھ صدقہ و خیرات بھی کیا کریں۔

فضا میں اڑنا
ڈاکٹر وحید احمد، سرگودھا

خواب : میں نے خواب دیکھا کہ میں اپنے گھر کی چھت پہ لیٹا ہوں اور مجھے نیند آ رہی ہوتی ہے۔ پھر میں نے محسوس کیا کہ میں آسمان کی طرف اڑتا جا رہا ہوں ۔کافی اوپر جا کے میرا جسم آہستہ آہستہ زمین کی طرف واپس آنے لگتا ہے اور دوبارہ چھت پہ واپس آ جاتا ہوں ۔ اس کے بعد میری آنکھ کھل جاتی ہے ۔

تعبیر : اچھا خواب ہے جو اس بات کو ظاہر کرتا ہے کہ آپ کے درجات میں ترقی ہو گی ۔ علم و ہنر کی دولت آپ کو نصیب ہو گی ۔ آپ کے رزق میں اضافہ ہو گا اور اس سے کاروبار میں برکت ہو گی جو کہ مال و وسائل میں بھی برکت کا باعث بنے گی ۔ آپ نماز پنجگانہ ادا کیا کریں اور کثرت سے یا حی یا قیوم کا ورد کیا کریں ۔

گھر کا خوبصورت داخلی دروازہ
عائشہ جبیں، ملتان

خواب : میں نے دیکھا کہ میرے گھر کا داخلی دروازہ بہت خوبصورت ہوتا ہے۔ اس پہ قدیم زمانے کے نقش و نگار کندہ ہوتے ہیں۔ میں غور سے دیکھتی ہوں تو ایسے محسوس ہوتا ہے جیسے وہ نقش ابھرے ہوئے ہوں ۔کافی دیر تک میں ان کی خوبصورتی کو دیکھتی رہتی ہوں جس سے مجھے بہت خوشی ہوتی ہے۔

تعبیر : اچھا خواب ہے جو اس بات کو ظاہر کرتا ہے کہ اللہ تعالی کی مہربانی سے آپ کی عزت و توقیر میں اضافہ ہو گا ۔گھر میں اور کاروبار میں بہتری ہو گی ۔ بچوں کی طرف سے بھی پیار و خوشی ملے گی۔ آپ نماز پنجگانہ ادا کیا کریں اور کثرت سے یا شکور یا حفیظ کا ورد کیا کریں ۔

کام سے دوسرے گاؤں جانا
سید احمد شاہ ، آزاد کشمیر

خواب : میں نے خواب دیکھا کہ میں اہنے گھر سے دوسرے گاوں جا رہا ہوتا ہوں۔ راستے میں ایک بڑا پل ہوتا ہے جس کو کراس کر کے ہم دوسرے گاوں جاتے ہیں۔ میں اس کو کراس کرتا ہوں تو سامنے سے میرا دوست مل جاتا ہے۔ ہم دونوں باتیں کرنے لگتے ہیں۔ چلتے چلتے میرا مطلوبہ گاوں آ جاتا ہے تو میں اپنے دوست سے اجازت لے کر داخلی راستے کی طرف مڑ جاتا ہوں ۔

تعبیر : اچھا خواب ہے جو اس بات کو ظاہر کرتا ہے کہ اللہ تعالی کی مہربانی سے آپ کی کوئی دلی مراد پوری ہو گی۔ اگر آپ کسی حکومتی ادارے میں کام کرتے ہیں تو وہاں پہ ترقی ہو گی۔ کاروباری و گھریلو معاملات میں بھی بہتری آئے گی۔ آپ نماز پنجگانہ ادا کریں اور کثرت سے وضو بے وضو یا حی یا قیوم کا ورد کیا کریں ۔

چاند گرہن
نسیم بیگم، جھنگ

خواب : میں نے دیکھا کہ میں اپنے کمرے میں ہوتی ہوں۔ پھر کھڑکی کھولتی ہوں تو میری نظر چاند پہ پڑتی ہے۔ میں دیکھتی ہوں کہ چاند کو گرھن لگا ہوا ہے۔ میں پریشانی میں کھڑکی بند کر دیتی ہوں اور اپنے بستر پہ آ کر لیٹ جاتی ہوں ۔ نجانے پھر مجھے کیا ہو جاتا ہے کہ میں دوبارہ اٹھ کے پردہ ہٹا کر چاند کو دیکھنا شروع کر دیتی ہوں اس کے بعد میری آنکھ کھل جاتی ہے۔

تعبیر : یہ خواب ظاہر کرتا ہے کہ اللہ نہ کرے کسی غم یا پریشانی کا سامنا ہو سکتا ہے۔ جس کی وجہ سے آپ کی صحت خراب ہو سکتی ہے۔ اس کا اثر گھریلو زندگی کے ساتھ ساتھ کاروباری معاملات پہ بھی ہو سکتا ہے۔ اگر آپ نوکری کرتی ہیں تو اس پہ بھی اثر ہو سکتا ہے۔ مال و وسائل کی کمی سے معاملات خرابی کی طرف جا سکتے ہیں ۔ آپ نماز پنجگانہ کی پابندی کریں اور ہر نماز کے بعد کثرت سے استغفار کیا کریں۔ ممکن ہو سکے تو کچھ صدقہ و خیرات بھی کیا کریں آپ کے لئے محفل مراقبہ میں دعا کرا دی جائے گی۔