بے چارہ مستقبل کا مؤرخ

ہمیں مستقبل کے مؤرخ پر بڑا ترس آتا ہے، کیوں کہ اس بے چارے سے لوگوں نے بڑی امیدیں باندھ لی ہیں۔

Muhammad Usman Jami January 05, 2020

ہمیں مستقبل کے مؤرخ پر بڑا ترس آتا ہے، کیوں کہ اس بے چارے سے لوگوں نے بڑی امیدیں باندھ لی ہیں۔

جس معاشرے میں سچ پر خوف طاری ہو، حقائق بیان کرتے صحافی پر سنگ باری ہو اور صاف گو دانش ور پر وار کاری ہو، اُس سماج میں سچائی جاننے کے لیے ساری انحصاری مستقبل کے مؤرخ پر ہوتی ہے۔ یہی حال ہمارا ہے۔ ہم جن دو حضرات کی آمد کی آس لگائے بیٹھے ہیں ان میں ایک تو ہے ''کوئی مسیحا'' اور دوسرا ہے ''مستقبل کا مؤرخ۔''

ہمیں مستقبل کے مؤرخ پر بڑا ترس آتا ہے، کیوں کہ اس بے چارے سے لوگوں نے بڑی امیدیں باندھ لی ہیں، ہمیں ڈر ہے کہ وہ ان بندھی امیدوں کو دیکھ کر کہیں آتے ہی جانے کے لیے بستر نہ باندھ لے۔

اتنا ہی نہیں، لوگ تو یہ بھی طے کر چکے ہیں کہ مستقبل کا مورٔخ کیا لکھے گا۔ سوال یہ ہے کہ سب کچھ مستقبل کا مؤرخ ہی کیوں لکھے، آخر حال کا مؤرخ کیا کر رہا ہے؟ ہماری خواہش تو یہ ہے کہ کہ کوئی مؤرخ حال بلکہ اس قوم کے حال کی تاریخ لکھے اور ہم کہہ اُٹھیں

''مؤرخ'' مرحبا بروقت بولا

تِری آواز مَکّے اور مدینے

ہمارے ہی اس سوال کا جواب ہمارے ہی خیال میں یہ ہے کہ حال کا مؤرخ حالات حاضرہ ختم ہونے کا انتظار کر رہا ہے۔ وہ خوف زدہ ہے کہ اگر حال میں رہتے ہوئے حال پر لکھا تو حال سے بے حال کردیا جائے گا، اور تاریخ لکھنے کے کچھ دنوں بعد ہی اس کے چالیسویں کی تاریخ کا اعلان ہورہا گا یا پھر اس کے لاپتا ہونے کے مقدمے میں تاریخ پر تاریخ دی جارہی ہوگی۔ اس صورت حال میں ہمارا مؤرخ تاریخ طبری کے بہ جائے تاریخ ۔۔۔جبری ہی لکھ کر سکون سے رہ سکتا ہے۔

رہا مستقبل کا مؤرخ تو اس سے امید رکھنے والوں کو مایوسی کے سوا کچھ ہاتھ نہ آئے گا۔ بات یہ نہیں کہ مورٔخ تاریخ لکھنے کی کوشش نہیں کرے گا، کرے گا اور پوری نیک نیتی اور دل جمعی سے کرے گا، لیکن کام یاب نہیں ہوپائے گا۔ ہوگا یوں کہ وہ بے چارہ تحریری مواد کھنگالنے کے لیے کسی کُتب خانے میں بیٹھا ہوگا کہ اس کے اسمارٹ فون پر بیوی کا پیغام آئے گا،''کہاں ہیں؟'' ماضی کے اوراق میں گُم مورٔخ دھیان نہیں دے گا، کچھ دیر بعد بیوی کا دوسرا پیغام آئے گا،''جواب تو دیں''، وہ فون کی طرف دیکھے گا بھی نہیں، پھر تواتر سے آنے والے پیغامات میں شوہر کی بے گانگی، بے حسی، بے پروائی، سنگ دلی کی تاریخ درج ہوگی۔

جس کے آخری باب کا عنوان ہوگا،''ضرور کسی کَل موہی کے ساتھ ہیں۔'' پھر واٹس ایپ پر کال آئے گی اور مؤرخ کا سارا استغراق یہ تقریر سُن کر درہم برہم کرجائے گا کہ ''آج مہینے کی دس تاریخ ہوگئی ہے لیکن آپ نے میرے ہاتھ پر کچھ نہیں رکھا، اب تک مُنے کی فیس نہیں گئی ہے، ٹماٹر خریدنے کے لیے کمیٹی ڈالی تھی اس کی قسط نہیں بھر پائی ہوں، بانوآپا سے دو چلغوزے ادھار لیے تھے، وہ واپسی کا تقاضا کر رہی ہیں، یہاں حال خراب ہے اور آپ کو تاریخ کی پڑی ہے۔'' یہ سب سُن کر مستقبل کا مؤرخ ماضی کی دستاویزات ایک طرف پٹخے گا اور یہ کہتے ہوئے گھر کی راہ لے گا،''چھڈو جی، دفع کرو، کوئی ہور کَم کریے۔'' کچھ دنوں بعد وہ ڈرائی کلینر کی دکان کھولے رسیدوں پر دھلے ہوئے کپڑون کی واپسی کی تاریخ ڈال رہا ہوگا یا ہومیوپیتھ بن کر کسی مریض کے مرض کی ہسٹری جان رہا ہوگا۔

یہ امکان بھی ہے کہ کسی طبی پیچیدگی کی وجہ سے کل کا مورٔخ کسی صنعت کار، جاگیردار یا سیاست میں سرمایہ کاری کرکے صنعتیں لگانے اور سیاسی جماعت کے نام پر اپنی جاگیر بنانے والے سیاست داں کے گھر جنم لے، یعنی وہ منہ میں سونے کا چمچا لے کر پیدا ہو اور چمچے میں چلغوزے رکھے ہوں۔ اس صورت میں وہ بچوں کی فیس، کمیٹی اور مکان کے کرائے جیسی فکروں سے آزاد ہوگا، لیکن اس کے مسائل دوسرے ہوں گے۔

وہ سوچے گا تاریخ کی تحقیق میں کئی سال لگانے میں کہیں میں خود تاریخ کا حصہ نہ بن جاؤں، چناں چہ فوری نام وری کے لیے کسی اخبار میں کالم لکھنے لگے گا، ٹی وی چینلوں کے ٹاک شوز میں ماہرِتاریخ کی حیثیت سے جائے گا، جہاں حکم راں جماعت کے کسی راہ نما سے اس بحث میں وقت گنوائے گا کہ جسے وزیراعظم خلیل جبران کے سر منڈھ چکے ہیں وہ ٹیگور کا قول ہے۔ اس سب سے جو وقت بچے کا اس میں مستقبل کا مؤرخ فیس بک اور ٹوئٹر پر اپنے افکار عالیہ پوسٹ اور ٹوئٹ کرنے کے بعد اتنا تھک چکا ہوگا کہ تاریخی واقعات کی تحقیق، جائزے اور تجزیے کے بہ جائے تاریخ بگاڑ کر بنائی جانے والی کوئی بھارتی فلم جیسے ''پدماوتی'' دیکھے گا اور گانا ''نینوں والے نے چھیڑا من کا پیالہ'' سُن کر خراٹے چھلکاتا ہوا سوجائے گا۔

چلیے مستقبل کے مورٔخ نے اگر ساری مصروفیات تج اور مجبوریوں سے بے نیاز ہوکر تاریخ لکھنے کی ٹھان ہی لی تو خدشہ ہے کہ وہ سیاسی نعروں، سرکاری بیانات اور میڈیا کے رجحانات سے کنفیوز ہو کر خود بھی الجھے گا اور تاریخ کو بھی الجھا دے گا۔ مثال کے طور پر وہ ''شیرشاہ سوری ثانی'' کی کارکردگی دیکھ کر یہی سمجھے اور لکھے گا کہ اصل شیرشاہ سوری کسی بادشاہ کا نام زد کردہ ہندوستان کا وزیراعلیٰ تھا، جو بس بادشاہ سے تبادلۂ خیال اور افسران کے تبادلے کرتا تھا۔

اور یہ بھی اس کا خیال ہوتا تھا کہ وہ بادشاہ سے تبادلۂ خیال کررہا ہے، اس تبادلے میں ایک طرف حکم ہوتا تھا اور دوسری طرف سرِتسلیم خم۔ اسی طرح ''وسیم اکرم پلس'' کے خطاب سے اسے مغالطہ ہوسکتا ہے کہ اصلی وسیم اکرم کو کوچ گود میں اٹھا کر پچ پر لاتا ہوگا، اور وسیم اکرم کا ہاتھ اپنے ہاتھ میں لے کر گھماتا اور باؤلنگ کرواتا ہوگا۔ پھر چھکا لگنے پر وسیم اکرم کی کمر ٹھونک کر کہتا ہوگا ''یہ وسیم اکرم کی بول کا کمال تھا کہ صرف چھکا لگا، ورنہ تو اَٹّھا یا دَسّا لگتا۔''

مستقبل کا مورٔخ برسوں یہ عقدہ حل کرنے میں الجھا رہے گا کہ جب بھٹو کو پھانسی ہوگئی تو پھر وہ زندہ کیسے رہا؟ مؤرخ کو یہ پریشانی بھی لاحق رہے گی کہ ''کیوں نکالا'' کا شکوہ ن لیگ والوں نے نوازشریف کے اقتدار سے ہٹائے جانے پر کیا تھا یا میاں صاحب کے جیل سے لندن جانے پر تحریک انصاف والوں نے؟ آخر اکتا کر یہ طے کرلے گا کہ ''کیوں نکالا'' کے معاملے پر دونوں جماعتیں ایک پیج پر تھیں۔

جماعت اسلامی نے جس طرح جنرل ضیاء الحق کی حمایت کی ممکن ہے مورٔخ سراج الحق کی طرح ضیاء الحق کو بھی امیرجماعت اسلامی سمجھ بیٹھے۔ اس الجھن میں تو مورٔخ تاعمر مبتلا رہے گا کہ پُرانا پاکستان کہاں ختم اور نیا کہاں سے شروع ہوتا ہے، آخر جھنجھلاکر یوں تاریخ رقم کرے گا،''پُرانے اور نئے پاکستان کو ملاکر ڈیجیٹل پاکستان بنالیا گیا تھا، جو گوگل، فیس بک اور ٹوئٹر پر قائم ہوا تھا۔''