آرمی ایکٹ کے تحت 3 سابق افسران کی سزاؤں کی تفصیلات طلب

رٹائرڈ افسر کا ٹرائل فوج نہیں کرسکتی‘ جائزہ لینگے سزا کس قانون کے تحت ہوئی، عدالت عظمیٰ

Reporting Team November 28, 2019

افسران پر شق 292 کا اطلاق ہوا‘ رٹائرڈ افسر کیخلاف بھی کارروائی ہو سکتی ہے، اٹارنی جنرل فوٹو: فائل

سپریم کورٹ میں آرمی چیف کی توسیع کے متعلق کیس کی سماعت کے دوران عدالت نے آرمی ایکٹ کے تحت 3 سابق افسران کی سزاؤں کی تفصیلات طلب کرلیں۔

سپریم کورٹ میں آرمی چیف کی توسیع کے متعلق کیس کی سماعت کے دوران اٹارنی جنرل نے آرمی ایکٹ پر بھی دلائل دیے، اس دوران عدالت نے ریمارکس دیے کہ سیکشن 255 کے تحت 3 ریٹائرڈ افسران کو بحال کر کے سزا دی گئی،اگر ریٹائرمنٹ معطل نہیں کی تو تینوں افسران کو سزا کس قانون کے تحت ہوئی؟ رٹائرڈ افسر کا ٹرائل فوج نہیں کر سکتی۔

اس موقع پر اٹارنی جنرل نے کہاکہ جرم کرنے والوں کو سیکشن 255 کے تحت نہیں بلایا جاتا، ان افسران پر آرمی ایکٹ کی شق 292 کا اطلاق ہوتا ہے۔ ایکٹ میں واضح ہے کہ ریٹائرڈ افسر کے خلاف کارروائی ہو سکتی ہے۔ اس موقع پر عدالت نے سزا یافتہ تینوں سابق اعلی فوجی افسران کی تفصیلات طلب کرتے ہوئے آبزرویشن دی کہ تفصیلات دیکھ کر جائزہ لیں گے سزا کس قانون کے تحت ہوئی۔